მაფშალია

მაფშალია

მაფშალია, იადონი (ლათ. Luscinia) — ბაღირეშობურეფიშ რანწკიშ ფურინჯეფიშ გვარი. საქორთუოს ხე მაფშალიაშ 2 გვარობა; რჩქვანელობური მაფშალიაშ რსხული 160-190 მმ სიგჷრძაში რე, წონა - 25 გრამშახ. გოფაჩილიე ბჟაეიოლ ევროპას დო ბჟადალ ციმბირს. საქორთუოს ხვალე გჷნოფურინუაშ პერიოდის (პირელი-მესის დო ქირსეთუთას) მუთმოფხვადჷნა. ობჟათური მაფშალია მაგვაჯე გჷნმოფურინე მაფურინჯე რე. გოფაჩილი რე ბჟადალ დო ობჟათე ევროპას, ოორუე-ბჟაეაიოლ აფრიკას დო წიმი დო შქა აზიას. საქორთუოს პირელშე ეკენიაშა მუთმოფხვადჷნა. მაფშალია ხე ქვერჩხონს, წყურგილ-ღალუეფს, წყარმალუეფიშ წყარპიჯის, ტყაპიჯის, გვალაშ კართეფს დო ბაღეფს; უჸორს წყარიშ სიარხოვე. მესიშ ბოლოს სქჷნს 4-5 მარქვალიას, მოკუხაფა 2 მარაშახ იგჷნძორებუ. ჭკომუნს ჭანდეფს, ძალამი მერკეთ კენკრას. მაფშალია არძოშე უჯგუში მოღურჭულე მაფურინჯე რე.

გვარობეფი

• ინდური მაფშალია Luscinia brunnea (Hodgson, 1837)
• ორქოშკუდელამი მაფშალია Luscinia chrysaea Hodgson, 1845
• ჭითაკიდირამი მაფშალია Luscinia hyperythra (Blyth, 1847)
• მორჩე მაფშალია Luscinia indica (Vieillot, 1817)
• ტაივანური მაფშალია Luscinia johnstoniae (Ogilvie-Grant, 1906)
• რიუკიუური მაფშალია Luscinia komadori (Temminck, 1835)
• რჩქვანელობური მაფშალია, ბჟაეიოლური მაფშალია Luscinia luscinia (Linnaeus, 1758)
• ობჟათური მაფშალია, ბჟადალური მაფშალია Luscinia megarhynchos (C.L.Brehm, 1831)
• მოუჩე მაფშალია Luscinia obscura (Berezowski et Bianchi, 1891)
• დავიდიშ მაფშალია Luscinia pectardens (David, 1877)
• ჭითადუდამი მაფშალია, რჯღალდუდამი მაფშალია Luscinia ruficeps (Hartert, 1907)
• ლენი მაფშალია Luscinia svecica (Linnaeus, 1758)
• ჭითაკინჩხე მაფშალია Luscinia calliope (Pallas, 1776)

მაფშალიაშ ღურჭული

რჩქვანელობური მაფშალიაშ ღურჭული

ობჟათური დო ბჟადალური მაფშალიაშ ღურჭული

ლიტერატურა

• ჟორდანია რ., ქორთული სხუნუეფიშ ენციკლოპედია, ტ. 2, ხს. 559, ქართი, 1977 წანა.

ათე სტატია მერკე რე. თქვა შეგილებუნა ქიმეხვარათ ვიკიპედიას დო გაგშათინათ დო გახვეიანათინ.