ქორდიანეფი (Chordata) — მაჟირალბუკამი ჩხოლარეფიშ უმაღალაში ტიპი. თინეფს ორსხველჷნა დაცხამეფი, ხოკოშ უმუშოეფი, გაგაჩამეფი. ქორდიანეფშო დჷმახასიათაფალი რე ქორდა, ოჭიშიშ ნერვული მილი დო ლაჸურშიშ ნოწკირეფი. ქორდიანეფიშ ართ ნორთის ქორდა ედომუშამი თელარაშ გოძვენას უღუ, კანკალეს — გოვითარაფაშ ორდოშიან პერიოდის. გაგაჩამეფიშ ოჭიშიშ ნერვული მილიშ წჷმიანი ნორთი აკმოქიმინუნს დუდიშ ტვინს, კაბეტ ასციდიეფს ნერვულ მილს ნერვული განგლიონი თირანს. ლაჸურშიშ ნოწკირეფი სქირონაშ ქორდიანეფს ხვალე ლარვაშ ვარდა გოვითარაფაშ ორდოშიან ოკუჩხალეშე უღჷნა, წყარიშ ფორმეფს — ედომუშამი თელარაშ გოძვენას. ქორდიანეფს ოხასიათჷნა მეტამერია, ნამუთ ჯგირო აფჷნა გიმოხანტილი ხოკოშ უმუშოეფს დო გაგაჩამეფს დო თინეფიშ არღამი გოვითარაფაშ პერიოდის.
