მაქს ვოლფი

ვიკიპედია-შე
ნავიგაციაზე გადასვლა ძიებაზე გადასვლა
მაქს ვოლფი
გერმ. Max Wolf
Max Wolf.jpg
დაბადებაშ თარიღი:

21 მანგი, 1863

დაბადებაშ აბანი:

ჰაიდელბერგი, ბადენიშ დიდი ოჰერცოგე

ღურაშ თარიღი:

გჷმათუთა 3, 1932 (69 წანერი)

ღურაშ აბანი:

ჰაიდელბერგი, გერმანია

მენოღალობა:

გერმანიაშ შილა გერმანია

ომენცარე სფერო:

ასტრონომია

სამუშაშ აბანი :

ჰაიდელბერგიშ უნივერსიტეტი

ალმა-მატერი:

ჰაიდელბერგიშ უნივერსიტეტი

ომენცარე ხემანჯღვერი:

ლეო კენიგსბერგერი

ჯოხოშინელი მოგურაფეეფი:

ავგუსტ კოპფი
ჰაინრიხ ფოგტი
ვილჰელმ ლორენცი

ჯილდოეფი დო პრემიეფი:

ჟანსენიშ პრემია (1912)
ასტრონომიაშ ომაფე ჯარალუაშ ორქოშ მენდალი (1914)
ბრიუსიშ მენდალი (1930)
მენცარობეფიშ ერუანული აკადემიაშ მაკათური (1913)

მაქსიმილიან ფრანც იოზეფ კორნელიუს ვოლფი (გერმ. Maximilian Franz Joseph Cornelius Wolf; დ. 21 მანგი, 1863, ჰაიდელბერგი, ბადენიშ დიდი ოჰერცოგე — ღ. 3 გჷმათუთა, 1932, ჰაიდელბერგი, გერმანია) — გერმანალი ასტრონომი, ასტროფოტოგრაფიაშ პიონერი, ჰაიდელბერგიშ უნივერსიტეტიშ ასტრონომიაშ პროფესორი დო ჰაიდელბერგ-კენიგშტულიშ ობსერვატორიაშ დირექტორი 1902 წანაშე ღურაშახ.

ბიოგრაფია დო მენცარული რკვიებეფი[რედაქტირაფა | წყუშ რედაქტირაფა]

მაქს ვოლფიქ დებადჷ 1863 წანაშ 21 მანგის, ჰაიდელბერგის, ექიმიშ ფრანც ვოლფიშ ფანიას. ფრანც ვოლფის ოკოდჷ მუში სქუაქ მენცარობათ დეინტერესუკო დო ჸათეშ გეშათ, მუში ოზეს ობსერვატორია მანწყუ. 1884 წანას მაქს ვოლფიქ ჸათე ობსერვატორიაშე მიოგორუ კომეტას 14P/ვოლფი.

მაქს ვოლფი გურაფულენდჷ ჰაიდელბერგიშ უნივერსიტეტის, სოდეთ 1888 წანას, 25 წანერი მაქს ვოლფიქ მიპალუ მენცარობაშ დოქტორიშ ხარისხი. 1890 წანას მუჭოთ პრივატ-დოცენტიქ მუშობა ქიდიჭყჷ ჰაიდელბერგიშ უნივერსიტეტის. 1902 წანაშე ვოლფი რდჷ ასტრონომიაშ პროფესორი დო ჰაიდელბერგ-კენიგშტულიშ ობსერვატორიაშ დირექტორი.

ობსერვატორიაშ ტელესკოპეფიშ პროექტიშ დაფინანსებელო ვოლფიქ ამერიკაშა მიდართჷ, სოდეთ გეჩინებაფუ გიშარჩქინელი ამერიკალი ფილანთროპი კეტრინ ბრიუსი, ნამუქჷთ ვოლფი ვითი ანთასი ამერიკული დოლარით დაფინანსჷ. ჸათე ფინანსეფით ვოლფიქ რეფრაქტორული ტელესკოპი ქიჸიდჷ.

მაქს ვოლფიშ ხემანჯღვერობათ ჰაიდელბერგიშ უნივერსიტეტიქ გინირთჷ ევროპაშ ასტრონომიული რკვიებეფიშ ცენტრო.

ვოლფიქ მუში მენცარული კარიერაშ პერიოდის მიოგორუ 248 ასტეროიდის, ბრელი ჭიჭე პლანეტას დო კომეტას. თიქ თაშნეშე მიოგორუ ოთხი სუპერნოვას. თაშნეშე, ვოლფიქ დიდი თია მიშეღჷ რუმე ნირსეულიშ რკვიებაშა.

1919 წანას ვოლფიქ გჷმაბჟინუ დოხოლაფირო ანთასი მურიცხიშ ლოკაციეფიშ დო ჸარაფიშ კატალოგი. ართ-ართი მურიცხი ნამუსჷთ ვოლფიქ მიოგორუ რდჷ ვოლფი 359, ნამუთ რე ბჟაშ სისტემაშ ხოლოს მადვალუ ჭითა ჯუჯა.

მაქს ვოლფი რდჷ შხვადოშხვა პრემიეფიშ დო ჯილდოეფიშ ლაურეატი. თიქ 1912 წანას მიპალუ ჟანსენიშ პრემია, 1914 წანას ასტრონომიაშ ომაფე ჯარალუაშ ორქოშ მენდალი დო 1930 წანას ბრიუსიშ მენდალი. ვოლფი რდჷ ამერიკაშ მენცარობეფიშ ერუანული აკადემიაშ, პრუსიაშ მენცარობეფიშ აკადემიაშ, შვედეთიშ მენცარობეფიშ ომაფე აკადემიაშ დო შხვა ორგანიზაციეფიშ დო აკადემიეფიშ მაკათური.

ვოლფიშ ჯოხონობაშ რე ართი კრატერი თუთას, ჟირი ასტეროიდი დო ართი ჭიჭე პლანეტა.

რესურსეფი ინტერნეტის[რედაქტირაფა | წყუშ რედაქტირაფა]