მიგელ დელიბესი

მიგელ დელიბესი
	მიგელ დელიბესი
	; დელიბესი 1998 წანას
დაბადებაშ თარიღი:	17 გჷმათუთა, 1920
დაბადებაშ აბანი:	ვალიადოლიდი, ესპანეთი
ღურაშ თარიღი:	მელახი 12, 2010 (89 წანერი)
ღურაშ აბანი:	ვალიადოლიდი, ესპანეთი
ერუანობა:	ესპანარი
საქვარუა:	ჭარუ, ნოველისტი, ჟურნალისტი
Magnum opus:	კვიპაროსიშ ორო გინძე რე (1947); შარა (1950); სიესტა ობჟათეშ ბორიაწკჷმა (1957); ჭითა ფურცელი (1959); ერეტიკოსი (1998)
ნინა:	ესპანური ნინა
ჯილდოეფი:	ნადალიშ პრემია (1947); ერუანული ლიტერატურული პრემია საუჯგუშო თხობელუაშო (1955, 1999); ფასტენრატიშ პრემია (1957); ასტურიაშ პრინციშ პრემია (1982); ხელუანობეფიშ დო ლიტერატურაშ ორდენი (1985); ესპანური ლიტერატურაშ ერუანული პრემია (1991); სერვანტესიშ პრემია (1993); ვალიადოლიდიშ პროვინციაშ ორქოშ მენდალი (1993)

მიგელ დელიბეს სეტიენი (ესპ. Miguel Delibes Setién; დ. 17 გჷმათუთა, 1920, ვალიადოლიდი, ესპანეთი — ღ. 12 მელახი, 2010, ვალიადოლიდი, ესპანეთი) — ესპანარი ჭარუ, ნოველისტი დო ჟურნალისტი. 1975 წანაშე ღურაშახ რდჷ ესპანეთიშ ომაფე აკადემიაშ მაკათური.

ბიოგრაფია

მიგელ დელიბესიქ დებადჷ 1920 წანაშ 17 გჷმათუთას, ესპანეთიშ ნოღა ვალიადოლიდის. გურაფულენდჷ ვალიადოლიდიშ კოლეჯის. ესპანეთიშ ომენოღალე ლჷმაშ ბორჯის დელიბესიქ ესპანეთიშ ოზუღე ნძალეფს ქაკათჷ დო ნაციონალისტეფს ალურდჷ. 1939 წანას ვალიადოლიდიშა დირთჷ დო ქიდიჭყჷ კომერციაშ დო იურისპრუდენციაშ გურაფა. გურაფაშ თებაშ უკული მუშობა ქიდიჭყჷ ვალიადოლიდიშ ართ-ართი გაზეთიშ El Norte de Castilla-შ კარიკატურისტო. ლიტერატურული კარიერა დელიბესიქ 1940-იან წანეფს დიჭყჷ. მაართა რომანი ნამუთ დელიბესიქ გჷმაბჟინუ, რდჷ "კვიპაროსიშ ორო გინძე რე". ჸათე ნაწარმებიქ ავტორს პოპულარობა მოუღჷ დო მუპალუ ნადალიშ პრემია. 1950 წანას გიშართჷ დელიბესიშ ართ-ართ პოპულარულ და საინტერესო რომანქ "შარა". 1950-იან წანეფი იხასიათებუ ახალი პერიოდით დელიბესიშ ლიტერატურულ კარიერას. ჸათე პერიოდის გიშართჷ ნაწარმებეფქ: "ჩქიმი სქუა სისი", "ულა", "მონადირეშ დღარეფი", "სიესტა ობჟათეშ ბორიაწკჷმა", "ემიგრანტიშ დღარეფი" დო "ჭითა ფურცელი". 1958 წანას დელიბესიქ გაზეთი El Norte de Castilla-შ დირექტორო გინირთჷ. 1960-იან წანეფს დელიბესიქ გჷმაბჟინუ "ჯვეში კასტილიაშ ჯვეში ამბები", "ჸათე მოსოფელეფს", "ვირთხეფი". 1963 წანას, ესპანეთიშ ინფორმაციაშ დო ტურიზმიშ მინისტრიშ მანუელ ფრაგა ირიბარნეწკჷმა კონფლიქტიშ გეშა, დელიბესიქ El Norte de Castilla-შ დირექტორიშ პოსტიშე გეგნოდირთჷ. 1964 წანას ამერიკაშა მიდართჷ, სოდეთ ამშვი თუთას იმუშუ მერილენდიშ უნივერსიტეტიშ ურცხოული ნინეფიშ დო ლიტერატურაშ ფაკულტეტიშ პროფესორო. ესპანეთიშა დორთინაშ უკულ ჭარუ რომანი "ხუთი საათი მარიოწკჷმა", ნამუთ დელიბესიშ ართ-ართ შედევრო რე მერჩქინელი. დელიბესიშ ჰობი ნადირუა რდჷ დო 1970-იან წანეფიშ დელიბესიშ ბრელი ნაწარმებეფიშ თარი თემა ნადირუა რე. 1973 წანას დელიბესიქ გინირთჷ ესპანეთიშ ერუანული აკადემიაშ მაკათურო. თის აკადემიაშ მაკათურობაშ ბორჯის უკებუდჷ არდგილი "E", ნამუთ დელიბესიშ ღურაშ უკული ვაკანტური რე. 1973 წანაშე დელიბესი რდჷ ამერიკაშ ესპანური ჯარალუაშ მაკათური ხოლო. 1974 წანას დელიბესის ოსურქ დუღურუ. ჸათე ტრაგედიას დიდი ნეგატიური გოლინა ოღუდჷ დელიბესიშ ცხოვრებაშო და კარიერაშო. 1981 წანას გიშართჷ დელიბესიშ ართ-ართ საუჯგუშო ნაწარმებიქ "უდუშებუ წიმინდეეფი". ჸათე წინგიშ სიუჟეტის რე გერსხილი ფილმი, ნამუსჷთ დიდი პოპულარობა უღუდჷ. თარ როლეფს ალფრედო ლანდა დო ფრანსისკო რაბალი არსულენა. დელიბესიშ ეკონია წინგი რე "ჭყოლირი დიხაუჩა", ნამუქჷთ 2005 წანას გიშართჷ დო თარი თემა რე დიხაუჩაშ კლიმატიშ დო შხვა ორთაშობური კატაკლიზმეფი. დელიბესიქ ღურუ 2010 წანაშ 12 მელახის, 89 წანერქ, კოლინჯიშ კიბოთ.

მიგელ დელიბესი რდჷ შხვადოშხვა პრემიეფიშ დო ჯილდოეფიშ ლაურეატი. 1947 წანას მიპალუ ნადალიშ პრემია, 1955 დო 1995 წანეფს ერუანული პრემია საუჯგუშო თხობელუაშო, 1957 წანას ფასტენრატიშ პრემია, 1982 წანას ასტურიაშ პრინციშ ლიტერატურული პრემია, 1991 წანას ესპანური ლიტერატურაშ ერუანული პრემია დო 1993 წანას სერვანტესიშ პრემია. 1985 წანას საფრანგეთიშ თარობაქ დელიბესის გინოჩჷ ხელუანობეფიშ დო ლიტერატურაშ ორდენი. 1993 წანას მიპალუ ვალიადოლიდიშ პროვინციაშ ორქოშ მენდალი. დელიბესი რდჷ ვალიადოლიდიშ, მადრიდიშ, ზაარლანდიშ, ალკალაშ დო სალამანკაშ უნივერსიტეტეფიშ საპატიო დოქტორი.

რესურსეფი ინტერნეტის

Wikiquote

ვიკიციტატეფს რე სტატია:

მიგელ დელიბესი