მირმეკოლოგია

ვიკიპედიაშე

მირმეკოლოგია (ბერძ. μύρμηξ - ჭკიჭკიტია, λόγος - გურაფა, რკვიება) — ენტომოლოგიაშ დარგი, ნამუთ მენცარულო ირკვიენს დო გურაფულენს ჭკიჭკიტიაშობურეფს. ორდოიანი პერიოდიშ მირმეკოლოგეფს ჭკიჭკიტიეფიშ ჯარალუა მიოჩქუდეს ჯარალუაშ იდეალურ ფორმათ დო ადამიერეფიშ პრობლემეფიშ გინაჭყვიდალო, გურაფულენდეს ჭკიჭკიტიეფს დო თინეფიშ სოციალურ სისტემას. ტერმინი მირმეკოლოგია მიშეღჷ ამერიკალ ენტომოლოგიქ დო ჰარვარდიშ უნივერსიტეტიშ პროფესორქ უილიამ მორტონ უილერიქ (1865–1937). ართ-ართი მაართა მენცარი, ნამუთ ჭკიჭკიტიეფს მენცარულო გურაფულენდჷ რდჷ შვეიცარიალი მირმეკოლოგი დო ფსიქიატრი ოგიუსტ ფორელი (1848–1931). ფორელიქ გიმირკვიუ ჭკიჭკიტიეფიშ ტვინიშ სტრუქტურა დო თიში ფუნქციეფი. ფორელიქ გიმირკვიუ ჭკიჭკიტიეფიშ ინსტიქტეფი, ჭკიჭკიტიეფიშ კოლონიეფიშ, ჯარალუეფიშ ფუნქციეფი დო შხვა. ფორელიქ ეჭარჷ ჭკიჭკიტიეფიშ კოლონიეფიშ მონოდომია დო პოლიდომია. ფორელის მიოჩქუდჷ ნამდა ტროფალაქსისი (ოჭკომალიშ გინოჩამა ჟარალუაშ მაკათურეფ შქას) რდჷ ჭკიჭკიტიეფიშ ჯარალუაშ ფუნდამენტური პრინციპი. უკულიან წანეფს ბიოლოგიაშ, გენეტიკაშ დო ეთოლოგიაშ გოვითარაფაქ შელებუ ჭკიჭკიტიეფიშ ხოლო უჯგუშო რკვიება. მირმეკოლოგიაშ გოვითარაფაშა დიდი მენცარული კონტრიბუცია მიშეღეს ჯონ ობადია ვესტვუდიქ, ერიხ ვასმანიქ, ედვარდ ოსბორნ უილსონიქ, როი სნელინგიქ, ვალტერ ვოლფგანგ კემპფიქ დო შხვეფქ.

რესურსეფი ინტერნეტის[რედაქტირაფა | წყუშ რედაქტირაფა]