მუშით გოჭყაფა
მუშით გოჭყაფა — მენცარული თეორია, ნამუშ მეჯინათ შორდგუმილი ორგანიზმეფი გითმიჭყაფჷ ვაშურდგუმილი მატერიაშე, დო ჸათე პროცესი მუთმოხვადუ ფშხირას დო რეგულარულო. ორდოიანი პერიოდიშე ფირქენდეს ნამდა ჭანდეფქ შილებე გორჩქინდესკო მაგალთო ნტვერიშე, მუნტურეფქ ნძორიშე. მუშით გოჭყაფაშ თეორიაშ ართ-ართ დუმარსხუაფალო მერჩქინელი რე ჯვეში ბერძენი მენცარი, ფილოსოფოსი არისტოტელე, ნამუშ იდეეფი გერსხილი რდჷ შხვა, წოხოლიანი პერიოდიშ ფილოსოფოსეფიშ რკვიებეფს.
მუშით გოჭყაფაშ თეორია დომინირენდჷ მოსოფელიშ მასშტაბით დოხოლაფირო ჟირი ანთასი წანაშ გოძვენას დო თინა მერჩქინელი რდჷ მუჭოთ მენცარული ფაქტი. მავითოშკვითა დო მავითობრუო ოშწანურეფიშე მენცარეფქ (მაგალთო იტალიარი ბიოლოგეფქ: ფრანჩესკო რედიქ, ლაზარო სპალანცანიქ) შხვადოშხვა ექსპერტეფიშ გიმორინაფათ ქიდიჭყეს ჸათე თეორიაშ კრიტიკა. მავითოჩხორა ოშწანურას, ფრანგი ლუი პასტერიშ დო ირლანდიარი ჯონ ტინდალიშ რკვიებეფით დენტკიცინჷ ნამდა მუშით გოჭყაფაშ თეორია რეალური ვარდჷ.
თეხანური მენცარეფს უმოს რეალურო მიოჩქუნა აბიოგენეზი — თელარაშ გორჩქინა ორთაშობური პროცესეფით ვაორგანული სუბსტანციეფიშე. ჸათე იდეათ, თელარაქ დიხაუჩას გიჭყჷ დოხოლაფირო 3.5 მილიარდი წანაშ კინოხ უჯაჭული ფორმათ დო უკულ, ბორჯიშ გოძვენას, გინირთჷ კომპლექსურო.