მუჰამედ ალი ჯინა
| მუჰამედ ალი ჯინა محمد علی جناح | ||
 მუჰამედ ალი ჯინა 1945 წანას | ||
| პაკისტანიშ მაართა გენერალ-გუბერნატორი | ||
|---|---|---|
| პოსტის გერინაშ ბორჯი | ||
| 14 მარაშინათუთა, 1947 – 11 ეკენია, 1948 | ||
| მონარქი | ჯორჯ VI | |
| პრემიერ-მინისტრი | ლიაკათ ალი ხანი | |
| წიმოხონი | პოსტიქ გიჭყჷ | |
| მონძე | ხავაჯა ნაზიმუდინი | |
| პოსტის გერინაშ ბორჯი | ||
| 11 მარაშინათუთა, 1947 – 11 ეკენია, 1948 | ||
| წიმოხონი | პოსტიქ გიჭყჷ | |
| მონძე | მაულვი თამიზუდინ ხანი | |
| დუნაბადი | 25 ქირსეთუთა, 1876 კარაჩი, ბომბეიშ პროვინცია, ბრიტანეთიშ ინდოეთი (ასეიანი სინდი, პაკისტანი) | |
| ნაღურა | ეკენია 11, 1948 (71 წანერი) კარაჩი, ფედერალური ნანანოღაშ ტერიტორია, პაკისტანი (ასეიანი სინდი, პაკისტანი) | |
| ნთხორუ აბანი | ჯინაშ მავზოლეუმი, კარაჩი, სინდი, პაკისტანი | |
| მენოღალობა |  ბრიტანეთიშ ინდოეთი (1876-1947) პაკისტანი (1947-1948) | |
| პოლიტიკური პარტია | ინდოეთიშ ერუანული კონგრესი (1906-1920) ედომუშამო ინდოეთიშ მუსულმანეფიშ ლიგა (1913-1947) მუსულმანეფიშ ლიგა (1947-1948) | |
| მუმა | ჯინანბჰაი პუნჯა | |
| ნანა | მითჰიბაი ჯინა | |
| ალმასქუ | ემიბაი ჯინა რატანბაი ჯინა | |
| სქუალეფი | დინა ვადია | |
| გონათაფა | ლინკოლნს-ინი | |
| საქვარუა | იურისტი, პოლიტიკოსი | |
| ხეშმოჭარუა |  | |
მუჰამედ ალი ჯინა (ურდუ. محمد علی جناح, ინგლ. Muhammad Ali Jinnah, დ. 25 ქირსეთუთა, 1876 — ღ. 11 ეკენია, 1948), დაბადებაშ ჯოხო მაჰომედალი ჯინანბჰაი — მუსლიმი პოლიტიკოსი, იურისტი, პაკისტანიშ დუმარსხუაფალი. 1913-1947 წანეფს რდჷ ედომუშამო ინდოეთიშ მუსულმანეფიშ ლიგაშ ლიდერი დო უკულ ღურაშახ რდჷ პაკისტანიშ დომინიონიშ მაართა გენერალ-გუბერნატორი.
დებადჷ კარაჩის. გურაფულენდჷ იურისპრუდენციას ლინკოლნს-ინის, ლონდონს. ინდოეთიშა დორთინაშ უკულ, ნინალენდჷ ბომბეიშ უმაღალაში სასამართალოს. ჸათე პერიოდის დეინტერესჷ ერუანული პოლიტიკათ. მუჭოთ ართ-ართი შანულამი მაკათურქ, ჯინაქ პოლიტიკური წჷმოძინეფს მიოჭირინუ ინდოეთიშ ერუანული კონგრესის. პოლიტიკური კარიერაშ დაჭყაფური წანეფს ჯინა რდჷ ინდურ-მუსულმანური გოართოიანაფაშ პროპონენტი დო მიშეღჷ კაბეტი თია ლაქნაუშ პაქტიშ დოდვალაშა. პაქტის ხე მაჭარეს 1916 წანაშ ქირსეთუთას ინდოეთიშ ერუანული კონგრესიშ დო მუსულმანეფიშ ლიგაშ მაკათურეფქ. ჯინაქ, მუსულმანეფიშ პოლიტიკური ნებეფიშ ოთხილარო წჷმარინუ ვითაანთხი პუნქტი. 1920 წანას ჯინაქ ქიდიტუ ერუანული კონგრესი, მუშენდა ჯინა ოპონირენდჷ სატიაგრაჰაშ ჸარაფის, ნამუსჷთ თინა პოლიტიკური ანარქიათ თვალუნდჷ.
1940-იან წანეფიშე ჯინა ფირქენდჷ ნამდა ინდოეთიშ სუბკონტინენტიშ მუსულმანეფს ოკო უღუდესკო მუნეფიშ ზოხორინელი სახენწჷფო. 1940 წანას მუსულმანეფიშ ლიგაქ მიღჷ ლაჰორიშ რეზოლუცია, ნამუშ ნძალათ მუსულმანეფიშ ლიგაშ მაკათურეფქ მითხის ზოხორინელი სახენწჷფოშ დორსხუაფა ინდოეთიშ მუსულმანეფიშო. მაჟირა მოსოფელიშ ლჷმაშ ბორჯის ლიგაშ გოლინაქ გენძალიერჷ. 1946 წანას ბრიტანეთიშ ინდოეთიშ პროვინციეფს იტარინჷ გიშაგორუეფქ. მუსულმანეფიშ არდგილეფიშ 87% მიპალუ მუსულმანეფიშ ლიგაქ. ლიგაშ მაკათურეფქ დუდი გეგმაცხადეს ინდოეთიშ მუსულმანეფიშ ოფიციალური წჷმმარინაფალეფო. კონგრესიშ დო ლიგაშ მაკათურეფს პოლიტიკური ხეშუულებაშ გორთუალაშ ფორმულაშა ვემიაჭირინეს დო ართი, გოართოიანაფილი ინდოეთიშ მანგიორო გინოჭყორდჷ ინდუსეფიშ ინდოეთიშ დო მუსულმანეფიშ პაკისტანიშ გოჭყაფაქ.
მუჭოთ პაკისტანიშ მაართა გენერალ-გუბერნატორქ ჯინა ოცადუდჷ თარობაშ ფორმირაფას, თაშნეშე ოხვარუდჷ მიგრანტი მუსულმანეფს, ნამუეფქჷთ ინდოეთი ქიდიტეს დო პაკისტანიშა გეგნიხორეს. ჯინაქ ღურუ 1948 წანაშ ეკენიას, 71 წანერქ, ბრიტანეთიშე პაკისტანიშ ზოხორინელობაშ მეღებაშე ართი წანაშ უკულ. ჯინას პაკისტანარეფი უძახჷნა დიდი ლიდერს, ერიშ მუმას დო თიში დაბადებაშ დღა მერჩქინელი რე ერუანული დღახუთ. ჯინაშ ბიოგრაფიშ, გიშარჩქინელი ამერიკალი ისტორიკოსიშ დო ინდოლოგიშ სტენლი უოლპერტიშ აზრით, ჯინა რდჷ პაკისტანიშ უდიდაში ლიდერი.