ნაბუქოდონოსორ II

	ნაბუქოდონოსორ II
	; "ბაბილონიშ ყორშიშ სტელა"-შ ნორთი, სოდეთ ჩქუ ნაბუქოდონოსორ II მარძგვანშე დო ბაბილონიშ კაბეტი ზიქურათი (ეტემენანკი) კვარჩხანშე
ბაბილონეთიშ მაფა
პოსტის გერინაშ ბორჯი
	ჯვ. წ. 605 – ჯვ. წ. 562
წიმოხონი	ნაბოპალასარი
მონძე	ამელ-მარდუქი
ნაღურა	ჯვ. წ. 562 წანაშ 7 გჷმათუთა (80 წანერი); ბაბილონი
მუმა	ნაბოპალასარი
ალმასქუ	ამიტა (?)
სქუალეფი	კაშაია; ამელ-მარდუქი; ნიტოკრისი (?)

ნაბუქოდონოსორ II (დ. დოხოლაფირო ჯვ. წ. 642 — ღ. ჯვ. წ. 562 წანაშ 7 გჷმათუთა) — ახალი ბაბილონიშ მაფა ჯვ. წ. 605-562 წანეფს. ხვისტაშა ეშართჷ მუამუშიშ ნაბოპალასარიშ ღურაშ უკულ. ნაბუქოდონოსორი მირჩქინუაფჷ ახალი ბაბილონიშ უდუდაში მაფათ. შინელი რდჷ ოურდუმე კამპანიეფით, თაშნეშე შხვადოშხვა პროექტეფით. თის მითმიოჭარანა ბაბილონიშ მუკობუნაფილი ბაღეფიშ ეგაფას.

მუამუშიშ მართუალაშ ბორჯის, ნაბუქოდონოსორი მონაწილენდჷ ლჷმეფს ასურეთიშ მეხჷ. ჯვ. წ. 605 წანაშ ქარხემიშიშ ბურჯაფის, ნაბუქოდონოსორქ კონწარო დამარცხჷ ეგვიპტარეფი. ჸათე ოურდუმე ექსპედიციეფს ნაბუქოდონოსორქ დუდი გიმირჩქინჷ მუჭოთ ნიჭიერი მანჯღვერთარქ. ნეო-ასურული იმპერიაშ მოჯალაგუაშ უკულ, წორეთ ახალი ბაბილონიშ ომაფექ გინირთჷ უნძალიერაში სახენწჷფოთ არხო ბჟაეიოლს.

ნაბუქოდონოსორიშ მართუალაშ დაჭყაფური წანეფი ვეხასიათებუდჷ სერიოზული ოურდუმე წჷმოძინეფით. თინა ოცადუდჷ ეგვიპტეშ დოჸუნაფას, მარა უშედეგეთ. უკულ ლევანტის, არდგილი უღუდჷ არჸებეფს ნაბუქოდონოსორიშ ხეშუულებაშ მეხჷ. მარა ჯვ. წ. 580-იანი წანეფიშო პოლიტიკური სიტუაციაქ ნაბუქოდონოსორიშ სასარგებლოთ დითირჷ. თიქ მუში ვასალეფიშ არყებეფი ზისხირს ქინაშკვიდუ დო ძალამს დადაღარჷ ეგვიპტარეფიშ გოლინა ლევანტიშ რეგიონს. ჯვ. წ. 587 წანას ნაბუქოდონოსორქ გემშეჭკირჷ დო მოჯალაგუ იუდეარეფიშ ომაფე დო თიში ნანანოღა იერუსალიმი. ნაბუქოდონოსორქ იერუსალიმიშ დო ხოლოს მადვალუ ტერიტორიეფიშ მახორუეფი ბაბილონიშა გეგნახორუ. იერუსალიმიშ მოჯალაგუათ დო ფინიკიური ნოღა ტვიროსიშ ეჭოფუათ ნაბუქოდონოსორქ გასურჷ ბაბილონიშ ომაფეშ ტრანსფორმაცია არხო ბჟაეიოლიშ დომინანტური სახენწჷფოთ.

წჷმოძინელი ოურდუმე კამპანიეფიშ მოხ, ნაბუქოდონოსორი ხემანჯღვერენდჷ შხვადოშხვა რეკონსტრუქციული პროექტეფს. თიქ მიშეღჷ კაბეტი თია ნოღა ბაბილონიშ გოახალაფაშა.

ლიტერატურა