ჟან II (საფრანგეთი)
| ჟან II Jean II | ||
 ჟან II-შ პორტრეტი ლუვრის | ||
| საფრანგეთიშ მაფა | ||
|---|---|---|
| პოსტის გერინაშ ბორჯი | ||
| 22 მარაშინათუთა, 1350 – 8 პირელი, 1364 | ||
| წიმოხონი | ფილიპ VI | |
| მონძე | შარლ V | |
| დუნაბადი | 26 პირელი, 1319 ლე-მანი, საფრანგეთი | |
| ნაღურა | 8 პირელი, 1364 (44 წანერი) სავოიშ დოხორე, ლონდონი, ინგლისი | |
| ნთხორუ აბანი | სენ-დენიშ ბაზილიკა | |
| მუმა | ფილიპ VI | |
| ნანა | ჟანა ბურგუნდიალი | |
| ალმასქუ | 1. ბონა ლუქსემბურგალი 2. ჟანა I ოვერნალი | |
| სქუალეფი | შარლ V, საფრანგეთიშ მაფა ლუი I, ანჟუშ ჰერცოგი ჟანი, ბერიშ ჰერცოგი ფილიპ II, ბურგუნდიაშ ჰერცოგი ჟანა, ნავარიშ დიაფალი მარი, ბარიშ ჰერცოგინია იზაბელა, ვერტუშ გრაფინია | |
| ხეშმოჭარუა |  | |
ჟან II კეთილი (ფრანგ. Jean II le Bon, დ. 26 პირელი, 1319 — ღ. 8 პირელი, 1364) — საფრანგეთიშ მაფა 1350-1364 წანეფს, ვალუეფიშ დინასტიაშ წჷმმარინაფალი. ჟანიშ მართუალაშ დაჭყაფური წანეფიშე საფრანგეთის სერიოზული პრობლემეფი არსებენდჷ: უჩა ჭირი, ნამუქჷთ საფრანგეთიშ მახორობაშ დახე გვერდი გოჭყვიდჷ, თაშნეშე არჸებეფი - ჟაკერია, რუტერეფი, ნამუეფქჷთ ძალამს დადაღარეს სახენწჷფო ეკონომიკურო დო ინგლისარეფიშ აგრესიული პოლიტიკა (ოშწანიანი ლჷმა).
ჟან II რდჷ ფილიპ VI-შ დო თიში ალმასქუ ჟანა ბურგუნდიალიშ ქომოლსქუა. ხვისტაშა ეშართჷ 1350 წანას. ოშწანიანი ლჷმაშ მიმალობაქ კატასტროფულქ იჸუ საფრანგეთიშო. სახენწჷფოს სერიოზული ფინანსური პრობლემეფი უღუდჷ დო ჭირდჷ ლჷმაშ გაგინძორაფა. ჸათე პრობლემაშ გინოჭყვიდუაშ ღანკით, ჟანიქ 1355 წანას მიჭანუ დუდიშული შტატეფი, ნამუქჷთ ჟანის ქიმეჩჷ სუბსიდია ოურდუმე კამპანიაშ გაგინძორებელო. 1356 წანაშ პუატიეშ ბურჯაფის ინგლისარეფქ კონწარო დამარცხეს ფრანგეფი დო ტყვეთ ხეშა ქაშეჸოთეს ჟან II. ინგლისარეფქ ჟანი ლონდონშა მიდეჸონეს დო ჯიხას ქუდახუნეს. ჟანიშ სქუა შარლი ძალამს ოცადუდჷ მუმაშ დარსხებას. ჸათე ღანკით თიქ ინგლისარეფიწკჷმა ქუდოდვჷ ბრეტინიშ ზე, ნამუშ ნძალათ საფრანგეთიქ ინგლისის შანულამი ტერიტორიეფი დუთმუ დო კაბეტი მუდანობათ ოგაფური ხოლო გინუგჷ. ინგლისარეფქ ჟანი გადუდიშულეს მარა მითხის მძევალეფი, ნამუეფიშე ართ-ართი რდჷ ჟანიშ მაჟირა ქომოლსქუა ლუი, ანჟუშ ჰერცოგი. მარა ლუიქ ინგლისარეფს ენტუ დო საფრანგეთიშა დირთჷ. ჸათეშ უკულ ჟან II-ქ მორალური ვალდვალირობათ მირჩქინჷ ინგლისიშა დორთინა დო ინგლისარეფს ჩებარჷ. ჟანიქ ღურჷ ინგლისის, სავოიშ დოხორეს, 1364 წანას. თიში ღურაშ უკულ, საფრანგეთიშ ომაფე ხვისტაშა ეშართჷ ჟანიშ უნჩაში ქომოლსქუაქ შარლ V-ქ.