ჟიული შარტავა

ჟიული შარტავა
აფხაზეთიშ ა/რ-იშ მინისტრეფიშ სხუნუშ მადუდე
პოსტის გერინაშ ბორჯი
11 ღურთუთა, 1990 – 27 ეკენია, 1993 (ღურაშახ)
პრეზიდენტი	ედუარდ შევარდნაძე
წიმოხონი	თამაზ ნადარეიშვილი
მონძე	ლონდერ ცაავა
აფხაზეთიშ დუდთხილუაშ სხუნუშ მადუდე
პოსტის გერინაშ ბორჯი
1992 – 27 ეკენია, 1993
პრეზიდენტი	ედუარდ შევარდნაძე
დუნაბადი	7 მელახი, 1944 სანაკი, საქორთუოშ სსრ
ნაღურა	ეკენია 27, 1993 (49 წანერი) სოხუმი, საქორთუო
მენოღალობა	საქორთუო
ერუანობა	ქორთუ
მუმა	კალისტრატე შარტავა
ნანა	ნინი (ფენია) დარასელია
ალმასქუ	ლია ჯალაღონია
სქუალეფი	კახა დო ირაკლი შარტავეფი
პროფესია	ტექნიკურ მენცარობეფიშ აკადემიური დოქტორი
საქვარუა	ინჟინერი
ჯილდოეფი	გენერალ-მაიორი

ჟიული შარტავა (დ. 7 მელახი, 1944 — ღ. 27 ეკენია, 1993) — ქორთუ პოლიტიკური, სახენწჷფო დო ოჯარალე მოღალე, აფხაზეთიშ ავტონომიური რესპუბლიკაშ მინისტრეფიშ სხუნუშ დო დუდთხილუაშ სხუნუშ მადუდე 1993, გენერალ-მაიორი. 1993 წანაშ 27 ეკენიას – სოხუმიშ დონთხაფაშ დღას გორხვეს სეპარატისტეფქ. ღურაშ უკული მენიჭებული აფუ საქორთუოშ ერუანული გერგეზიშ ტიტული.

თებული აფუდჷ საქორთუოშ პოლიტექნიკური ინსტიტუტი. გურაფულენდჷ ასპირანტურას; უკული რდჷ კომსხუნურ დო პარტიულ პოსტეფს ქართის დო რუსთავს. 1980-იან წანეფს რდჷ საქორთუოშ სსრ უმაღალში სხუნუშ მაკათური. 1992 წანაშე – საქორთუოშ რესპუბლიკაშ პარლამენტიშ დეპუტატი რუსთავიშ მაჟორიტარული ოლქიშე. აფხაზეთის აკოანჯარაფილი კონფლიქტიშ ბორჯის, 1993 წანაშ მანგის, საქორთუოშ სახენწჷფოშ მადუდეშ ზოჯინით დარინუეს აფხაზეთიშ ავტონომიური რესპუბლიკაშ მინისტრეფიშ სხუნუშ დო აფხაზეთიშ დუდთხილუაშ სხუნუშ მადუდეთ. 1993 წანაშ 27 ეკენიას უშქაშეთ დუდენდჷ თარობაშ ჸუდეშ თხილუაშ ოპერაციას, ნამუშ ბორჯის აფხაზურ სეპარატისტულ დჷნობუნაქ წორომალიმორეფწკჷმა ართი ტყვეთ გეჭოფეს დო გორხვეს. მოგვიანაფათ, ჟიული შარტავაშ ცხედარქ ქორთულ კუნთხუს გეგნაჩჷ. ნთხორილი რე ქართის, ვაკეშ პანთეონს. 2004 წანას, ღურაშ უკული, დაჯილდუეს ერუანული გერგეზიშ ორდენით.

ბიოგრაფია

ჟ. შარტავაშ არკვანი

დებადჷ სანაკის, 1944 წანაშ 7 მელახის, პედაგოგეფიშ, კალისტრატე დო ნინო შარტავეფიშ ფანიას. 1951-1961 წანეფს გურაფულენდჷ სანაკიშ მაჟირა საჯარო სკოლას, ნამუსჷთ ასე თიშ ჯოხო გეძჷნ.

ოშქაშე სკოლაშ ორქოშ მედალშა თებაშ უკული ჟიული შარტავაქ აბარჷ პოლიტექნიკურ ინსტიტუტის ავტომატიკაშ დო გჷმოკოროცხუაფონი ტექნიკაშ ფაკულტეტის. თინა აქტიურო ოკათუდჷ სტუდენტური ომენცარე კონფერენციეფიშ საქვარუას. ინსტიტუტიშ წჷმოჩინებულო თებაშ უკული ჟიული შარტავაქ ინირიცხჷ ასპირანტურას, მარა ახალნორდი მენცარქ ვეშილებუ აკადემიური კარიერაშ გოგჷნძარაფა – თინა გეგშაგორეს უმაღალაშ ოგურაფალიშ კომრსხუშ კომიტეტიშ მელამოსეთ დო თე ბორჯიშე, ედომუშამო, ჯარალობურ-პოლიტიკურ მოღალობაშა გეგნორთჷ. მალას ჟიული შარტავას აწუკინეს საქორთუოშ ალკკ ცენტრალური კომიტეტიშა, დიო მაჟირა მელამოსეშ, უკული მაართა მელამოსეშ პოსტიშა. თე პოსტის თიქ 8 წანას იხანდჷ დო მიარე ნოვატორული წჷმოჭყაფა ბოლოშა ქჷმიჸონჷ. ჟიული შარტავაშ ჯოხოს არსხუაფუ შავნაბადას ახალნორდული კომპლექსიშ დორსხუაფა.

ჟიული შარტავაშ საქორთუოშ ალკკ ცენტრალური კომიტეტიშ მაართა მელამოსალაშ პერიოდის არსხუაფუ თაშნეშე ირწანური ქორთულ-აფხაზური ახალნორდული ზეიმეფიშ მონწყუალა რუხის. ჩინებული რე თიშ გიშარჩქინელი ერუანული პოზიცია 1978 წანაშ 14 პირელიშ კრიზისიშ ბორჯის, მაუჟამსჷთ ქორთუ ახალნორდობა გერგეზულო აწურედჷ ორსხუე ცენტრიშ ცადებას საქორთუოშ სსრ-შ ახალი კონსტიტუციაშე გეშუღალდესკონ ბირგული ქორთული ნინაშ სახენწჷფო სტატუსიშ გეშან.

1980 წანას, ჟიული შარტავას დჷთმარინუანა საქორთუოშ კომპარტიაშ ცენტრალური კომიტეტიშ პროპაგანდიაშ დო აგიტაციაშ, მოგვიანეთ - ორგანიზაციულ-პარტიული ხანდაშ გიმნართიშ ხემანჯღვერო. ზუსტაშ თე ბორჯიშე გინმირთუ თინა საქორთუოშ პარტიული ლიდერიშ ედუარდ შევარდნაძეშ უახოლაში წორომალიმორო. ჟიული შარტავა თიშ საეგებიო „მონძეთ“ ხოლო მიარზებუდჷ რესპუბლიკაშ მაართა პიჯიშ პოზიციას, მარა, თიშ კარიერულ წჷმიულას ხეშუშალჷ ხეშუულებაშ თირუაქ 1985 წანას. ჟიული შარტავას ცენტრალური კომიტეტიშე ოულარქ აჸუ დო პარტიული ხანდა რუსთავს გაგჷნძორჷ.

რესურსეფი ინტერნეტის

• ქართის 7 მელახის ერუანული გერგეზიშ ჟიული შარტავაშ დაბადებაშ 58 წანაშ დუდი ეიშინუეს^{[ღურელი რსხილი]}. „ახალი ამბები - საქართველო“, 07/ 03/ 2005
• შარტავა ჟიული: პარლამენტიშ მაკათურობაწკჷმა მერსხილი ინფორმაცია. საქორთუოშ პარლამენტი, 1992

(რუსული) ჟ. შარტავაშ მემორიალური ხასჷლა