ნანანოღა
| შილა
|
გერბი
|
|
|
|
რაბატი (არაბ الرباط, ფრანგ. Ville de Rabat; ესპან. Ciudad de Rabat) — მაროკოშ ომაფეშ ნანანოღა დო სიკაბეტათ ქიანაშ მაშკვითა უშხუაში ნოღა, ნამუშ მახორობა 2014 წანაშ ეჭარუათ 577,827 ადამიერს აკმადგინანს. რაბატი თაშნეშე წუმარინუანს რაბატ-სალე-კენისტრაშ ადმინისტრაციული რეგიონიშ ნანანოღას. ნოღა ატლანტიშ ოკიანეშ წყარპიჯის უდვალუაფუ წყარმალუ ბოუ რეგრეგიშ მიშაკათუწკუმა, ნოღა სალეშ აწმარენჯ აკანს.
რაბატი მა-12 ოშწანურას დარსხუეს ალმოჰადეფქ მუჭოთ ოურდუმე ნოღა, ნამუეფით თიმ ბორჯის ოორუე აფრიკაშ კაბეტ ნორთის აკონტროლენდეს. ნოღა ირო ივითარებუდუ, ვინდარო თეს ალმოჰადეფიშ სახალიფეშ დონთხაფათ დო რაბატიშ კაბეტი ხანით დოდაღარაფაქ მაჸუნუ. მა-17 ოშწანურას, რაბატი ბარბარალი კორსანტეფიშ მიკაფორალო გინირთუ. 1912 წანას, საფრანგეთიქ მაროკოს პროტექტორატი გეგმაცხადუ დო ნოღაქ თიშ ადმინისტრაციულ ცენტრო გინირთუ, მაროკოქ — ზოხორინალა 1955 წანას მიპალუ დო რაბატით თინწკუმა გეგმაცხადუ მუშ ნანანოღათ.
რაბატი, ტემარა დო სალე ართო 1.8 მილიონიან აგლომერაციას აკმოქიმინუნა. მაროკოშ თარი ნოღეფი ართიანს რკინაშარაშ მეშქაშობათ არსხუაფუნა, ნანანოღას რე რაბატ-სალეშ ჯოხოთ ჩინებული აეროპორტი. ლამწკუმა მერსხილ პრობლემეფქ გეურკუ ნანანოღაშ როლს ნოღას რინელ ონიშოლიშოთ, მარა რაბატი დო სალე იშენით სქიდუნა შანულამ ნოღეფო ტექსტილიშ, ხერეჭუაშ დო აკოგაფაშ ინდუსტრიული ჸურე. თეშ მოხ, ტურიზმი დო ნანანოღას აკოშაყარელი ოჸენჯეეფიშ რინა რაბატის ქიანას ართ-ართ უშანულამაშ ნოღათ გინმართინუანს. მაროკოშ ნანანოღას CNN-ქ 2013 წანას მუშ გუნაბჟინა ''TOP ომაშარე აბანეფს'' შქას მაჟირა აბანი მეჩუ. ნოღა მაროკოშ ოთხი იმპერიული ნოღაშე ართ-ართი რე, რაბატიშ მედინა — იუნესკოშ მოსოფელიშ კულტურული მონძალაშ ერკებულშა რე მიშაღალირი.
