რიტა ლევი-მონტალჩინი

რიტა ლევი-მონტალჩინი
	რიტა ლევი-მონტალჩინი
	იტალ. Rita Levi-Montalcini
დაბადებაშ თარიღი:	22 პირელი, 1909
დაბადებაშ აბანი:	ტურინი, იტალია
ღურაშ თარიღი:	ქირსეთუთა 30, 2012 (103 წანერი)
ღურაშ აბანი:	რომი, იტალია
მენოღალობა:	იტალია; ააშ
ომენცარე სფერო:	ნეირომენცარობა
სამუშაშ აბანი :	ვაშინგტონიშ უნივერსიტეტი (სენტ-ლუისი)
ალმა-მატერი:	ტურინიშ უნივერსიტეტი
ჯილდოეფი დო პრემიეფი:	EMBO-შ მაკათური (1974); ლუიზა გროს-ჰორვიციშ პრემია (1983); ალბერტ ლასკერიშ პრემია (1986); ნობელიშ პრემია ფიზიოლოგაშ დო მედიცინაშ დარგის (1986); მენცარობაშ ერუანული მენდალი (1987); ომაფე ჯარალუაშ მაკათური (1995)
ხეშმოჭარუა:

რიტა ლევი-მონტალჩინი (იტალ. Rita Levi-Montalcini; დ. 22 პირელი, 1909, ტურინი, იტალია — ღ. 30 გერგობათუთა, 2012, რომი, იტალია) — იტალიარ ნეირომენცარი, ნერვიშ რდუალაშ ფაქტორიშ ძირაფაშ დო მენცარულ რკვიებაშ გეშა გინოჩეს ნობელიშ პრემია ფიზიოლოგიაშ დო მედიცინაშ დარგის 1986 წანას, ამერიკალ ბიოქიმიკოს სტენლი კოენიწკჷმა ართო.

ბიოგრაფია

რიტა ლევი-მონტალჩინიქ დებადჷ 1909 წანაშ 22 პირელს, იტალიაშ ნოღა ტურინს, ურიეფიშ ფანიას. გურაფულენდჷ ტურინიშ უნივერსიტეტიშ მედიცინაშ სკოლას. გურაფაშ თებაშ უკულ მუშენდჷ იტალიარ ანატომ დო ჰისტოლოგიშ ჯუზეპე ლევიშ ასისტენტო. ბენიტო მუსოლინიშ ანტისემიტურ რასისტულ მანიფესტიშ უკულi, მუშობაქ დო პრაქტიკაქ მიოტებელქ აჸუ. მაჟირა მოსოფელიშ ლჷმაშ ბორჯის, ლევი-მონტალჩინიქ მუშ ჸუდეს აკეთჷ კუსტარულ ლაბორატორია, სოდეთ შხვადოშხვა ექსპერიმენტეფს ორთუდჷ. 1943 წანას ლევი-მონტალჩინიშ ფანიაქ ოცხოვრებშა ფლორენციაშა გეგნორთჷ. ლჷმაშ თებაშ უკულ კინ ტურინშა დირთეს. 1946 წანას ლევი-მონტალჩინიქ გურაფა გაგინძორჷ ვაშინგტონიშ უნივერსიტეტის (სენტ-ლუისი). ვაშინგტონიშ უნივერსიტეტის გიმირკვიუ ლევი-მონტალჩინიქ ნერვიშ რდუალაშ ფაქტორი დო თიშ ფუნქციეფი. 1958 წანაშე ლევი-მონტალჩინ რდჷ ვაშინგტონიშ უნივერსიტეტიშ პროფესორი. 1962 წანას დარსხუ ლაბორატორია, რომს დო თექ ხოლო მუშენდჷ. 1961-1969 წანეფს ლევი-მონტალჩინ რდჷ რომიშ ნეირომენცარობაშ რკვიებაშ ცენტრიშ დირექტორი, 1969-1978 წანეფს რდჷ ციტოლოგიურ ლაბორატორიაშ დირექტორი. 2002 წანას ლევი-მონტალჩინიქ დარსხჷ ტვინიშ რკვიებაშ ევროპაშ ინსტიტუტ დო რდჷ თიშ დირექტორი. რიტა ლევი-მონტალჩინ რდჷ ნობელიშ პრემიაშ, ლუიზა გროს-ჰორვიციშ პრემიაშ, ლასკერიშ პრემიაშ, რალფ ჯერარდიშ პრემიაშ დო შხვა ჯილდოეფიშ ლაურეატი. 1987 წანას გინოჩეს მენცარობაშ ერუანული მენდალი. 1966 წანაშე რდჷ ამერიკაშ მენცარობაშ დო ხელუანობაშ აკადემიაშ მაკათურ დო 1995 წანაშე ომაფე ჯარალუაშ მაკათური. 1974 წანაშე რიტა ლევი-მონტალჩინ რდჷ ევროპაშ მოლეკულურ ბიოლოგიაშ ორგანიზაციაშ (EMBO) მაკათური.

რესურსეფ ინტერნეტის