სტენლი კოენი

სტენლი კოენი
	სტენლი კოენი
	ინგლ. Stanley Cohen
დაბადებაშ თარიღი:	17 გერგობათუთა, 1922
დაბადებაშ აბანი:	ბრუკლინი, ნიუ-იორკი, ააშ
ღურაშ თარიღი:	ფურთუთა 5, 2020 (97 წანერი)
ღურაშ აბანი:	ნეშვილი, ტენესი, ააშ
მენოღალობა:	ააშ
ომენცარე სფერო:	ბიოქიმია
სამუშაშ აბანი :	ვანდერბილტიშ უნივერსიტეტი; ვაშინგტონიშ უნივერსიტეტი (სენტ-ლუისი)
ალმა-მატერი:	მიჩიგანიშ უნივერსიტეტი; ობერლინიშ კოლეჯი; ბრუკლინიშ კოლეჯი
ომენცარე ხემანჯღვერი:	ჰოვარდ ბ. ლუისი
ჯილდოეფი დო პრემიეფი:	ლუიზა გროს-ჰორვიციშ პრემია (1983); ალბერტ ლასკერიშ პრემია (1986); ნობელიშ პრემია ფიზიოლოგიაშ დო მედიცინაშ დარგის (1986); მენცარობაშ ერუანული მენდალი (1986); ფრანკლინიშ მენდალი (1987)

სტენლი კოენი (ინგლ. Stanley Cohen; დ. 17 გერგობათუთა, 1922, ბრუკლინი, ნიუ-იორკი, ააშ — ღ. 5 ფურთუთა, 2020, ნეშვილი, ტენესი, ააშ) — ამერიკალი ბიოქიმიკოსი, ნერვიშ რდუალაშ ფაქტორიშ იზოლაციაშ დო ეპიდერმალური რდუალაშ ფაქტორიშ ძირაფაშ დო რკვიებაშ გეშა გინოჩეს ნობელიშ პრემია ფიზიოლოგიაშ დო მედიცინაშ დარგის 1986 წანას (რიტა ლევი-მონტალჩინიწკჷმა ართო).

ბიოგრაფია

სტენლი კოენიქ დებადჷ 1922 წანაშ 17 გერგობათუთას, ნიუ-იორკის, ბრუკლინს, ურიეფიშ ფანიას. გურაფულენდჷ ბიოლოგიას დო ქიმიას, ბრუკლინიშ კოლეჯის, სოდეთ მიპალუ მენცარობაშ ბაკალავრიშ ხარისხი 1943 წანას. ბრუკლინიშ კოლეჯიშ უკულ გურაფა გაგინძორჷ ობერლინიშ კოლეჯის, სოდეთ ზოოლოგიას გურაფულენდჷ. 1945 წანას კოენიქ მიპალუ მენცარობაშ მაგისტრიშ ხარისხი. 1948 წანას თხილუ ოდოქტორე დისერტაცია მიჩიგანიშ უნივერსიტეტიშ ბიოქიმიაშ ფაკულტეტის. გურაფაშ თებაშ უკულ მუშენდჷ დიო კოლორადოშ უნივერსიტეტის დო უკულ ვაშინგტონიშ უნივერსიტეტის (სენტ-ლუისი). ვაშინგტონიშ უნივერსიტეტის დიო მუშენდჷ რადიოლოგიაშ დეპარტამენტის, სოდეთ იზოტოპეფიშ მეთოდოლოგიას ირკვიენდჷ დო უკულ მუშობა გაგინძორჷ ზოოლოგიაშ დეპარტამენტის. 1959 წანას სტენლი კოენიქ ომუშებუშა გინილჷ ვანდერბილტიშ უნივერსიტეტიშ მედიცინაშ სკოლაშა. ჸათაქ იმუშუ 1999 წანაშა. სტენლი კოენი რდჷ შხვადოშხვა პრემიეფიშ დო ჯილდოეფიშ ლაურეატი. 1983 წანას კოენის დო რიტა ლევი-მონტალჩინის კოლუმბიაშ უნივერსიტეტიქ გინოჩჷ ლუიზა გროს-ჰორვიციშ პრემია. 1986 წანას კოენიქ მიპალუ ნობელიშ პრემია, 1986 წანას მენცარობაშ ერუანული მენდალი. 1987 წანას კოენის გინოჩეს ფრანკლინიშ მენდალი. 1985 წანას სტენლი კოენიქ მიპალუ გაირდნერიშ პრემია.

რესურსეფი ინტერნეტის