სოკრატეშახჷ ფილოსოფია
| ფილოსოფოსეფი | წჷმოძინაშ პერიოდი (წანა, ჯვ.წ.) |
|---|---|
| თალესი | 585 |
| ანაქსიმანდრე | 550 |
| ანაქსიმენე | 545 |
| პითაგორა | 530 |
| ქსენოფანე | 530 |
| ჰერაკლიტე | 500 |
| პარმენიდე | 500 |
| ზენონი | 450 |
| ანაქსაგორა | 450 |
| ემპედოკლე | 445 |
| მელისუსი | 440 |
| პროთაგორა | 440 |
| ლევკიპე | 435 |
| გორგია | 430 |
| ანტიფონე | 430 |
| დემოკრიტე | 420 |
| ფილოლაოსი | 420 |
| სოკრატე | 420 |
სოკრატეშახჷ ფილოსოფია, თაშნეშე ორდოიანი ბერძენული ფილოსოფია — ანტიკური ბერძენული ფილოსოფია სოკრატეშ ბორჯიშახჷ. სოკრატეშახჷ ფილოსოფოსეფი ოქიანუშ დო ორთაშობური მოლინეფიშ გოჭყაფაშ ენწყუმას ოცადუდეს უმოს რაციონალურო დო ვახვილუდეს მითოლოგიას. თინეფიშ იდეეფი გერსხილი რდჷ ორთაშობურ კანონეფს დო ვართ რელიგიურ დო მითოლოგიურ დოგმეფს.
სოკრატეშახჷ ფილოსოფიაქ დიჭყჷ ჯვ.წ. VI ოშწანურას, იონური სკოლაშ წჷმმარინაფალეფით: თალესით, ანაქსიმანდრეთ დო ანაქსიმენეთ. თალესიშო ირფელიშ დაჭყაფური სუბსტანცია, არქე რდჷ - წყარი, ანაქსიმანდრეშო აპეირონი დო ანაქსიმენეშო ჰაერი. ჰერაკლიტეს არქეთ დაჩხირი მიოჩქუდჷ.
პითაგორაშ აზრით ოქიანუ აკმოდირთუდჷ რიცხუეფიშე.
მახუთა ოშწანურაშ ელეიარეფიშ ბუნაშ წჷმმარინაფალეფიშ (პარმენიდე, ზენონი, მელისუსი) აზრით არსებენს ხვალე ართი პრინციპი ნამუთ ვეთირუ. ანაქსაგორა დო ემპედოკლე ოქიანუშ გოჭყაფაშ იდეას უჯინედეს პლურალისტურო. ლევკიპე დო დემოკრიტე ფირქენდეს, ნამდა არსებენდჷ ხვალე ფირუტა დო მატერია. ლევკიპე დო დემოკრიტე უმოსო შინელი რენა ატომიზმით.
სოკრატეშახჷ ფილოსოფიას უღუდჷ კაბეტი შანულობა. ჸეთი პერიოდიშ ფილოსოფოსეფქ დარსხუეს ბჟადალური ცივილიზაციაშ თარი კონცეფციეფი, მაგალთო ნატურალიზმი დო რაციონალიზმი. თინეფიშ იდეეფქ მიშეღჷ დიდი კონტრიბუცია უკულიანი პერიოდიშ მენცარული მეთოდოლოგიაშ გოვითარაფაშა.
სოკრატეშახჷ ფილოსოფოსეფიშ ნახანდეფს ვამუჭირინუაფჷ თეხანური ბორჯიშა. ფრაგმენტეფს, თინეფიშ იდეეფშე შეთმოფხვადუთ უკულიანი პერიოდიშ ავტორეფიშ ნაჭარეფს. სოკრატეშახჷ ფილოსოფოსეფს ციტირენა პლატონი, არისტოტელე, პლუტარქე, ციცერონი, სექსტუს ემპირიკუსი დო შხვეფი.