სონდერს მაკლეინი

ვიკიპედია-შე
ნავიგაციაზე გადასვლა ძიებაზე გადასვლა
სონდერს მაკლეინი
ინგლ. Saunders Mac Lane
Saunders MacLane.jpg
დაბადებაშ თარიღი:

4 მარაშინათუთა, 1909

დაბადებაშ აბანი:

ტაფტვილი, კონექტიკუტი, ააშ

ღურაშ თარიღი:

პირელი 14, 2005 (95 წანერი)

ღურაშ აბანი:

სან-ფრანცისკო, კალიფორნია, ააშ

მენოღალობა:

ამერიკაშ აკოართაფილი შტატეფიშ შილა ააშ

ომენცარე სფერო:

მათემატიკა

სამუშაშ აბანი :

ჰარვარდიშ უნივერსიტეტი
კორნელიშ უნივერსიტეტი
ჩიკაგოშ უნივერსიტეტი
კოლუმბიაშ უნივერსიტეტი

ალმა-მატერი:

იელიშ უნივერსიტეტი
ჩიკაგოშ უნივერსიტეტი
გეტინგენიშ უნივერსიტეტი

ომენცარე ხემანჯღვერი:

ჰერმან ვაილი
პაულ ბერნაისი

ჯოხოშინელი მოგურაფეეფი:

დევიდ ეიზენბადი
ირვინგ კაპლანსკი
რობერტ სოლოვეი
ჯონ გრიგს ტომპსონი

ჯილდოეფი დო პრემიეფი:

შოვენეშ პრემია (1941)
მენცარობეფიშ ერუანული აკადემიაშ მაკათური (1949)
უილიამ პროქტერიშ პრემია (1979)
ჰუმბოლდტიშ პრემია (1982/83)
სტილიშ პრემია (1986)
მენცარობაშ ერუანული მენდალი (1989)

სონდერს მაკლეინი (ინგლ. Saunders Mac Lane; დ. 4 მარაშინათუთა, 1909, ტაფტვილი, კონექტიკუტი, ააშ — ღ. 14 პირელი, 2005, სან-ფრანცისკო, კალიფორნია, ააშ) — ამერიკალი მათემატიკოსი, სამუელ ეილენბერგიწკჷმა ართო კატეგორიეფიშ თეორიაშ დუმარსხუაფალი.

სონდერს მაკლეინი გურაფულენდჷ ქიმიას იელიშ უნივერსიტეტის. მალას ქიმიაშ გურაფა მიოტუ დო დეინტერესჷ მათემატიკათ დო ფიზიკათ. ბაკალავრიშ ხარისხი მიპალუ 1930 წანას. ჸათე პერიოდის მაკლეინიქ გჷმაბჟინუ მუში მაართა მენცარული სტატია ფიზიკას (ირვინგ ლენგმიურიწკჷმა ართო). იელიშ უკულ მაკლეინიქ გურაფა გაგინძორჷ ჩიკაგოშ უნივერსიტეტის, სოდეთ მიპალუ მაგისტრიშ ხარისხი 1931 წანას. 1931 წანას მაკლეინიქ საირქიანო გონათაფაშ ინსტიტუტიშ სტიპენდიათ, ოგურაფუშა გეტინგენიშ უნივერსიტეტიშა მიდართჷ. ოდოქტორე დისერტაცია თხილუ 1934 წანას ჰერმან ვაილიშ ხემანჯღვერობათ. 1934-1938 წანეფს მაკლეინი მუშენდჷ იელიშ, ჰარვარდიშ, კორნელიშ დო ჩიკაგოშ უნივერსიტეტეფს. 1941 წანას, მიჩიგანიშ უნივერსიტეტიშ მუშობაშ ბორჯის მაკლეინიქ გეჩინებაფუ სამუელ ეილენბერგი, ნამუწკჷმა ართო კოლაბორაციათ დარსხუ კატეგორიეფიშ თეორია. 1944-1945 წანეფს მაკლეინი მუშენდჷ კოლუმბიაშ უნივერსიტეტის. 1947 წანას კინ ჩიკაგოშ უნივერსიტეტიშა დირთჷ. გუგენჰაიმიშ სტიპენდიათ მაკლეინიქ 1947-1948 წანეფს იმუშუ ციურიხიშ ფედერალური ტექნოლოგიეფიშ ინსტიტუტის ხოლო.

სონდერს მაკლეინი რდჷ ამერიკაშ მენცარობეფიშ ერუანული აკადემიაშ დო ამერიკაშ ფილოსოფიური ჯარალუაშ ვიცე-პრეზიდენტი დო ამერიკაშ მათემატიკაშ ჯარალუაშ პრეზიდენტი. 1974–1980 წანეფს მაკლეინი რდჷ მენცარობაშ ერუანული ბორდიშ მაკათური. მენცარობეფიშ აკადემიაშ მაკათური რდჷ 1949 წანაშე. 1989 წანას გინოჩეს მენცარობაშ ერუანული მენდალი.

რესურსეფი ინტერნეტის[რედაქტირაფა | წყუშ რედაქტირაფა]