ტედროს ადჰანომ ღებრეისუსი
| ტედროს ადჰანომ ღებრეისუსი ამჰ. ቴዎድሮስ አድሓኖም ገብረኢየሱስ | ||
_(cropped).jpg) დოქტორი ტედროს ადჰანომ ღებრეისუსი 2017 წანას | ||
 ჭყანთხილუაშ მოსოფელიშ ორგანიზაციაშ მა-8 გენერალური დირექტორი  | ||
|---|---|---|
| თეჟამიანი პოსტი | ||
| დეკინჷ | 1 კვირკვე, 2017 | |
| წიმოხონი | მარგარეტ ჩანი | |
 ეთიოპიაშ გალენური საქვარეფიშ მინისტრი  | ||
| პოსტის გერინაშ ბორჯი | ||
| 29 გერგობათუთა, 2012 – 1 გერგობათუთა, 2016 | ||
| პრემიერ-მინისტრი | ჰაილემარიამ დესალენი | |
| წიმოხონი | ჰაილემარიამ დესალენი | |
| მონძე | ვორკნეჰ გებეიეჰუ | |
| ეთიოპიაშ ჭყანთხილუაშ მინისტრი | ||
| პოსტის გერინაშ ბორჯი | ||
| 12 გჷმათუთა, 2005 – 29 გერგობათუთა, 2012 | ||
| პრემიერ-მინისტრი | მელეს ზენაუი, ჰაილემარიამ დესალენი | |
| წიმოხონი | კებედე ტადესე | |
| მონძე | კესეტებირან ადმასუ | |
| დუნაბადი | 3 მელახი, 1965 ასმერა, ეთიოპია | |
| მენოღალობა | ეთიოპია | |
| პოლიტიკური პარტია | ტირგაიშ ოკათე გოდუდიშულაფაშ ფრონტი | |
| გონათაფა | ასმერაშ უნივერსიტეტი ლონდონიშ უნივერსიტეტი ნოტინგემიშ უნივერსიტეტი | |
| ვებ-საიტი | https://www.who.int/dg | |
ტედროს ადჰანომ ღებრეისუსი (ამჰ. ቴዎድሮስ አድሓኖም ገብረኢየሱስ; დ. 3 მელახი 1965, ასმერა, ეთიოპია) — ეთიოპიარი სახენწჷფო დო პოლიტიკური მოღალე, ეთიოპიაშ გალენური საქვარეფიშ მინისტრი 2012-2016 წანეფს, ჭყანთხილუაშ მოსოფელიშ ორგანიზაციაშ დირექტორი 2017 წანაშ 1 კვირკვეშე.
ბიოგრაფია
[რედაქტირაფა | წყუშ რედაქტირაფა]1965 წანაშ 3 მელახის დებადჷ ტედროს ადჰანომ ღებრეისუსიქ, ასმერას (ასე ერიტრეა), ინჟინერიშ ფანიას.
1986 წანას, ბაკალავრიშ ხარისხით გათუ ასმერაშ უნივერსიტეტი ბიოლოგიაშ სპეციალობათ დო ლაბორანტო მუშენდჷ ეთიოპიაშ ჭყანთხილუაშ ომინისტრეს. 1991 წანას, მენგისთუ ჰაილე მარიამიშ ოურდუმე რეჟიმიშ დორაგვაფაშ უკული მეშქაშობაქ ქიმიაჩჷ გურაფა ხურგაშგალე გუდგჷნძორებუდუკო. 1992 წანას გათუ ლონდონიშ უნივერსიტეტიშ მაგისტრატურა ინფექციური ლახარეფიშ იმუნოლოგიშ სპეციალობათ. 2000 წანას, ნოტინგემიშ უნივერსიტეტის მიღჷ დოქტორიშ ხარისხი ჯარალობური ჭყანთხილუაშ სფეროს. თიში ოდისერტაციე ნახანდი ეძღვინებუდჷ ეთიოპიაშ ტიგრაიშ რეგიონს მალარიაწკჷმა ბურჯაფიშ პრობლემეფს. გეძინელი ოგონათუე კურსეფი მუკორთჷ დანიას დო შვედეთის.
2001-2003 წანეფს, ტიგრაიშ რეგიონიშ ჭყანთხილუაშ დეპარტამენტიშ მადუდე რდჷ. 2003 წანას ქჷდარინეს ეთიოპიაშ ჭყანთხილუაშ მინისტრიშ გამაკოჩო. 2005-2012 წანეფს, ეთიოპიაშ ჭყანთხილუაშ მინისტრი რდჷ. თე პოსტის მუშობაშ ბორჯის თიქ მანჯჷ ქიანაშ ჭყანთხილუაშ სისტემაშ რეფორმა, მოუძინჷ ომედიცინე ნინალაშ ხემიოჭირინაფობა. თე პერიოდის გიჭყჷ 3 500 ჭყანთხილუაშ ცენტრიქ დო 16 000 ომედიცინე პუნქტიქ. 7-შა მიძინჷ ჭყანთხილუაშ მოხანდეეფიშ მუდანობაქ.
2012-2016 წანეფს, ეთიოპიაშ გალენური საქვარეფიშ მინისტრი რდჷ. 2013 წანას — აფრიკაშ რსხუშ ელაჸონაფალი სხუნუშ მადუდე რდჷ.
2016-2017 წანეფს, ეთიოპიაშ პრემიერ-მინისტრიშ სპეციალური ელმაჩამალი რდჷ. 2017 წანაშე — ჭყანთხილუაშ მოსოფელიშ ორგანიზაციაშ გენერალურ დირექტორო ქჷდარინეს. თე პოსტის მუშობაშ ბორჯის თიში ხუთი თარი პრიორიტეტი რე ჭყანთხილუაშ არძაშული მეჭირინაფეფიშ გობჟინაფა; ჭყანთხილუაშ უგნუდვალუ შვანეფი; ოსურეფიშ, ბაღანეფიშ დო მარდუეფიშ ჭყანთხილუა; კლიმატიშ თირუაშ დო ელმოლიშ გოლინა ადამიერიშ ჭყანთხილუაშა; დო ჭყანთხილუაშ მოსოფელიშ ორგანიზაციაშ რეფორმირაფა.