ფერდინანდ II (საღორონთო რომიშ იმპერატორი)
| ფერდინანდ II Ferdinand II | ||
.jpg) ფერდინანდ II-შ პორტრეტი, 1614 წ. | ||
| საღორონთო რომიშ იმპერატორი | ||
|---|---|---|
| პოსტის გერინაშ ბორჯი | ||
| 28 მარაშინათუთა, 1619 – 15 ფურთუთა, 1637 | ||
| წიმოხონი | მათე | |
| მონძე | ფერდინანდ III | |
| დუნაბადი | 9 კვირკვე, 1578 (ახ.სტ. 19 კვირკვე, 1578) გრაცი, შტირია, საღორონთო რომიშ იმპერია | |
| ნაღურა | 15 ფურთუთა, 1637 (58 წანერი) ვენა, ავსტრია, საღორონთო რომიშ იმპერია | |
| ნთხორუ აბანი | გრაციშ მავზოლეუმი (რსხული) ჯეგე ავგუსტინეშ ოხვამე (გური) | |
| მუმა | კარლ II | |
| ნანა | მარია ანა ბავარიალი | |
| ალმასქუ | 1. მარია ანა ბავარიალი 2. ელეონორა გონძაგა | |
| სქუალეფი | ფერდინანდ III, საღორონთო რომიშ იმპერატორი მარია ანა, ბავარიაშ კურფიურსტი სესილია რენატა, პოლონეთიშ დიაფალი ერცჰერცოგი ლეოპოლდ ვილჰელმი | |
| რელიგია | კათოლიციზმი | |
| ხეშმოჭარუა |  | |
ფერდინანდ II (გერმ. Ferdinand II; დ. 9 კვირკვე, 1578 — ღ. 15 ფურთუთა, 1637) — საღორონთო რომიშ იმპერატორი 1619-1637 წანეფს, თაშნეშე ბოჰემიაშ, უნგრეთიშ დო ხორვატიაშ მაფა დო ავსტრიაშ ერცჰერცოგი, ჰაბსბურგეფიშ დინასტიაშ წჷმმარინაფალი. რდჷ ავსტრიაშ ერცჰერცოგიშ კარლ II-შ დო თიში ალმასქუ მარია ანა ბავარიალიშ ქომოლსქუა. ფერდინანდი გურაფულენდჷ ინგოლშტადტიშ იეზუიტეფიშ კოლეჯის. 1590 წანაშ 10 კვირკვეს კარლ II-ქ დოღურჷ დო ფერდინანდიქ მონძეობათ მიპალუ დინახალენი ავსტრია-შტირია, კარინტია, კარნიოლა დო შხვა ჭიჭე პროვინციეფი.
საღორონთო რომიშ იმპერატორქ რუდოლფ II-ქ ფერდინანდის ქუდავალჷ ხორვატიაშ, სლავონიაშ დო ობჟათე-ბჟაეიოლი უნგრეთიშ თხილუა ოსმალეფიშ მიშაჭკირუეფიშე. 1598 წანაშე ფერდინანდიქ წიმიჭყჷ კონწარი ანტი-რეფორმაციული პოლიტიკა დო გამათხოზჷ პროტესტანტეფს. 1600 წანას ოსმალეფქ გემშეჭკირეს დო გეჭოფეს ნადკანიჟა დო უკულ, ოურდუმე ექსპედიცია გაგინძორეს შტირიას. ფერდინანდი ოცადუდჷ ნადკანიჟაშ დორთინაფას, მარა უშედეგეთ.
XVII ოშწანურაშ დაჭყაფუშე მიშჷ კონფლიქტი იმპერატორიშ რუდოლფ II-შ დო თიში ჯიმაშ მათეშ შქას. მათე არწუმენდჷ რუდოლფის გეგნოდირთუკო. ჸათე კონფლიქტის, ფერდინანდი დუდშე მათეს ალურდჷ. მარა უკულ, მათექ პროტესტანტეფიშ მეხჷ სერიოზული დათმებეფიშა მიდართჷ უნგრეთის, ავსტრიას დო ბოჰემიას. მათეშ ჸათე პოლიტიკა ფერდინანდის ვამოწონდჷ. ფერდინანდი ოცადუდჷ კოალიციური გოართოიანაფაშ აკოქიმინუას, ნამუშ ღანკი კათოლიკური ეკლესიაშ განძალიერაფა იჸუაფუდჷ. 1610 წანას კათოლიკე თარეფქ ქუდარსხის კათოლიკური ლიგა, მარა ჸათე ალიანსიშ გოჭყაფას ფერდინანდი ვამონაწილენდჷ.
უკულ ფერდინანდიქ ესპანეთიშ ჰაბსბურგეფიშ ალარინათ გინირთჷ უსქე მათეშ მონძეთ. საგამათ, 1617 წანას ფერდინანდიქ დათმუ ელზასი დო იმპერიული დიხეფი იტალიას. თე წანას ბოჰემიაშ რაიხსტაგიქ ფერდინანდი ქიჩინჷ ბოჰემიაშ მაფათ. მარა 1619 წანას ბოჰემიაშ პროტესტანტული რაიხსტაგიქ ფერდინანდი გეგთარაგუ დო ახალი მაფათ გეგშაგორჷ ფრიდრიხ V. ფაქტიურო ჸათე მოლინათ ქიდიჭყჷ ეჩდოვითწანიანი ლჷმაქ. 1619 წანაშ 28 მარაშინათუთას, ფერდინანდი გიშაგორილქ იჸუ საღორონთო რომიშ იმპერატორო. 1620 წანაშ 8 გერგობათუთას, კათოლიკურია ლიგაშ დო ესპანარი ჰაბსბურგეფიშ ალარინათ, ფერდინანდიშ ჯარეფქ პრაღაშ გოხოლუას დამარცხეს არჸებულეფი დო პრაღა გეჭოფეს. უკულ ფერდინანდიქ არჸებული ბოჰემიარი დიდებუანეფს ქონებეფი გეგლანწყჷ დო ქიდიჭყჷ ბოჰემიაშ ნძალათ გაკათოლიკაფა.
ფერდინანდიშ კონწარი პოლიტიკას შიშით ოკვირუდეს ოორუე გერმანალი პროტესტანტეფი, ნამუეფით ფირქენდეს ნამდა იმპერატორი თინეფიშ გაკათოლიკაფას ხოლო ეცადებუდჷ. ჸათეშ გეშათ თინეფქ ხოლო ეარყეს იმპერატორიშ მეხჷ. პროტესტანტეფს ქალუდირთჷ დანიაშ მაფაქ. ფერდინანდიშ ჸურე რდეს ესპანარი კათოლიკე ჰაბსბურგეფი. ბოჰემიას გომორძგუეფიშ უკულ, იმპერატორქ მანწყუ ლესქერობა ოორუე გერმანიას დო დამარცხჷ დანიაშ ჯარეფი. 1630 წანას ეჩდოვითწანიანი ლჷმაშა გემშართჷ შვედეთიქ, ნამუშ პროტესტანტი მაფა გუსტავ ადოლფის ფინანსურო საფრანგეთი ოხვარუდჷ. საფრანგეთიშ ღანკი ჰაბსბურგეფიშ დოდაღარაფა რდჷ. დუდშე გერმანალი ლუთერანეფი ვალურდეს გუსტავ ადოლფის. მარა მუჟამსჷთ, 1631 წანას საიმპერატორო ჯარეფქ პროტესტანტული ნოღა მაგდებურგი მოჯალაგესინჷ, გერმანალი პროესტანტეფქ მასიურო ქალუდირთეს შვედეფს. 1632 წანაშ 6 გერგობათუთას, ლიუცენიშ ლჷმას შვედეთიშ, საქსონიაშ დო ჰესენ-კასელიშ გოართოიანაფილი ჯარეფქ დამარცხეს საიმპერატორო ნძალეფი, ნამუეფსჷთ ალბრეხტ ფონ ვალენშტაინი ხემანჯღვერენდჷ. ლჷმა შვედეფქ მიგეს, მარა ბურჯაფის დოჸვილეს გუსტავ ადოლფი. უკულიანი პერიოდეფს წჷმოძინეფქ საიმპერატორო ჯარეფიშა გეგნორთჷ. 1635 წანაშე ლჷმაშა გემშართჷ საფრანგეთიქ, ნამუსჷთ გერმანალი დო ესპანარი ჰაბსბურგეფიშ ხოლო უმოს განძალიერაფაშა აშქურინჷ. ლუი XIII-შ დო კარდინალი რიშელიეშ გინოჭყვიდირით ფრანგეფქ პროტესტანტეფს ქალუდირთეს დო ქიდიჭყეს ოურდუმე კამპანია. ჸათე ბორჯიშო, შვედეფქ კინ გემშეჭკირეს ოორუე გერმანიაშ ტერიტორიაშა. ფრანგეფქ დო შვედეფქ კაბეტი ზარალი მიორინეს გერმანიას.
1635 წანას ფერდინანდიქ ხე ქუმაჭარჷ პრაღაშ ოთინჩალე აქტის, მარა ლჷმა იშენ ვათებე. 1637 წანას დოღურჷ ფერდინანდ II. თიში მონძე რდჷ უნჩაში ქომოლსქუა ფერდინანდ III. ეჩდოვითწანიანი ლჷმაქ ითუ 1648 წანაშ ვესტფალიაშ ზეთ, ნამუშ ნძალათ შვედეთიქ ქიმირსხუ გერმანიაშ ოორუე დიხეფი, საფრანგეთიქ მიპალუ ელზასი, შვეიცარიაქ დო ნიდერლანდეფქ საღორონთო რომიშ იმპერიაშე ზოხორინელობას მიოჭირინეს,შანულამი სუვერენიტეტიქ მიაჩჷ გერმანული სათაროეფს. თინეფი ხვალე ფორმალურო სქიდუდეს იმპერატორიშ მართუალაშ თუდო. შედეგო, ჰაბსბურგეფს ომართალო ხვალე თეხანური ავსტრიაშ ტერიტორიაქ ქასკიდეს. გერმანიაშ ტერიტორიას გიჭყჷ დოხოლაფირო სუმოში ზოხორინელი ომაფექ, სათაროქ დო ნოღა-სახენწჷფოქ.