ფილიპ II ოგიუსტი
| ფილიპ II ოგიუსტი Philippe II Auguste | ||
 ფილიპ II ოგიუსტიშ ბეჭედი. ლათინურო გეჭარჷ: phillipvs dei gratia francorvm rex ("ფილიპი, ღორონთიშ ჭყოლოფათ, ფრანკეფიშ მაფა") | ||
| ფრანკეფიშ მაფა/საფრანგეთიშ მაფა | ||
|---|---|---|
| პოსტის გერინაშ ბორჯი | ||
| 18 ეკენია, 1180 – 14 კვირკვე, 1223 | ||
| წიმოხონი | ლუი VII | |
| მონძე | ლუი VIII | |
| დუნაბადი | 21 მარაშინათუთა, 1165 გონესი, საფრანგეთი | |
| ნაღურა | 14 კვირკვე, 1223 (57 წანერი) მანტ-ლა-ჟოლი, საფრანგეთი | |
| ნთხორუ აბანი | სენ-დენიშ ბაზილიკა | |
| მუმა | ლუი VII | |
| ნანა | ადელა შამპანარი | |
| ალმასქუ | 1. იზაბელა ენოარი 2. ინგებორგ დანიარი 3. აგნესა მერანიარი | |
| სქუალეფი | ლუი VIII, რობერტი, ფილიპი, მარია, ფილიპ იურპელი, პიერ შარლო (უკანონო) | |
| რელიგია | ქირსიანობა | |
ფილიპ II ოგიუსტი (ფრანგ. Philippe II Auguste; დ. 21 მარაშინათუთა, 1165 — ღ. 14 კვირკვე, 1223) — საფრანგეთიშ მაფა 1180-1223 წანეფს, კაპეტინგეფიშ დინასტიაშ წჷმმარინაფალი. ფილიპიშ წიმოხონი მაფეფი მიშინუაფუდეს მუჭოთ ფრანკეფიშ მაფა. 1190 წანაშე ფილიპიქ გინირთჷ მაართა მაფაქ, ნამუთ მუში დუც საფრანგეთიშ მაფას უძახუდჷ. ფილიპ II შინელი რე ეპითეტით "ოგიუსტი", ნამუთ ტიტული ავგუსტუსიშე მოჸურს დო შანენს დიდის, კაბეტის. ოგიუსტი თის გიოდჷ ფრანგი ქრონისტიქ რიგორიქ.
ფილიპი რდჷ ლუი VII-შ დო თიში მასუმა ოსურიშ ადელა შამპანარიშ უნჩაში ქომოლსქუა. მუამუშიქ წორომამართალო წჷმარინუ 1179 წანას, 14 წანერი რდუნ თეშ. ფილიპიშ კორონაციაქ იმანჯჷ თე წანაშ 1 გერგობათუთას, რეიმსის. ფილიპიქ გაფართინუ საფრანგეთიშ სანძღოეფი დო სახენწჷფო შანულამო განძალიერჷ. მონაწილენდჷ მასუმა ჯვაროსნული ლესქერობას, რიჩარდ I ნჯილოშგური დო ფრიდრიხ I ბარბაროსაწკჷმა ართო. ლესქერობაშ შედეგო ჯვაროსანეფქ ქიდეკინეს აკრა დო იაფა, მარა იერუსალიმქ ვადართინეს.
გალენური ევროპული პოლიტიკას ფილიპიშ თარი კონკურენტეფი პლანტაგენეტეფი რდეს. ინგლის-საფრანგეთიშ 1213-1214 წანეფიშ ლჷმას, ინგლისიქ დემარცხჷ. გინმაჭყვადალი ბურჯაფიქ მოხვადჷ ბუვინიშ გოხოლუას, 1214 წანაშ 27 კვირკვეს. ფილიპიქ კონწარო ორჯგინჷ ინგლისარეფს დო თინეფიშ ალმარენჯეფს. შინონიშ ხეკულუათ ჯონ უდიხაწყარექ დათმუ ანჟუ, პუატუ დო ბრეტანი. ჸოფა გასურჷ ანჟუშ იმპერიაქ, ნამუსჷთ პლანტაგენეტეფი აკონტროლენდეს მავითოჟირა ოშწანურაშ შქა პერიოდიშე. ჸათე მეჭირინაფეფქ ძალამს განძალიერჷ ფილიპიშ პოზიციეფი ევროპაშ მასშტაბით. ჯონ უდიხაწყარეს ბარონეფქ (ნამუეფსჷთ ფილიპიშ სქუა ლუი ალურდჷ) ხე ქუმაჭარაფეს დუდშულობაშ დიდი ქარტიაშა, ნამუქჷთ შანულამო დოკონჩჷ მაფაშ ნებეფი ინგლისის. უკულ, 1216 წანაშ მესის, ლუიქ გემშეჭკირჷ ინგლისიშა, სოდეთ თინა არყებული ბარონეფქ ინგლისიშ მაფათ გეგმაცხადეს.
ფილიპი კონდაკო ვამონაწილენდჷ 1209 წანას დოჭყაფილი ალბიგოური ჯვაროსნული ლესქერობას, მარა მუში ვასალეფს დო რაინდედს ჸათე ლესქერობეფს მაკათურობაშ ნებას არძენდჷ. ალბიგოური ლესქერობა მონწყილი რდჷ რელიგიური სექტა კათარიზმიშ მეხჷ, ნამუქჷთ გენძალიერჷ ობჟათე საფრანგეთის.
ფილიპ II ოგიუსტიშ მართუალათ საფრანგეთიქ მიოჭირინუ ფინანსური სტაბილურობას დო ეკონომიკური წჷმოძინეფს. ფილიპიქ დადაღარჷ გოლინიანი დიდებუანეფი, მარა შანულამი პრივილეგიეფი ქიმეჩჷ ბურჟუაზიას. თიქ 1190-1213 წანეფს ეიოგჷ კაბეტი საფორთიფიკაციო კიდა პარიზიშ მუკი.