ქსენოფონტი
| ქსენოფონტი ჯვ. ბერძ. Ξενοφῶν | |
 | |
| დაბადებაშ თარიღი: |
დოხოლაფირო ჯვ.წ. 430 |
|---|---|
| დაბადებაშ აბანი: | |
| ღურაშ თარიღი: |
ჯვ.წ. 354 ვარდა 355 (74-75 წანერი) |
| ღურაშ აბანი: | |
| ერუანობა: | |
| საქვარუა: |
ისტორიკოსი, ჭარუ, ფილოსოფოსი, ოურდუმე მოღალე |
| Magnum opus: | |
| ნინა: | |
ქსენოფონტი (ჯვ. ბერძ. Ξενοφῶν; დ. დოხოლაფირო ჯვ.წ. 430 — ღ. ჯვ.წ. 354 ვარდა 355) — ბერძენი ისტორიკოსი, ჭარუ, ფილოსოფოსი დო ოურდუმე მოღალე. დაბადებე ათენს. 30 წანერი რდუნ თეშ გინორთე აქემენიანეფიშ იმპერიაშ დაქირებული ბერძენული ჯარიშ ვითი ანთასიშ მანჯღვერთარო. ქსენოფონტიქ აკიმუშუ ანდანერი ოურდუმე-ლოჯისტიკური ოპერაციეფი. თინა რდჷ ართ-ართი მაართა ავტორი ნამუქჷთ ეჭარუ ლჷმაშ სტრატეგიული ფლანგური მანევრი დო ფინთი.
ქსენოფონტი ანაბასისის ეთმოჭარუნს მუში დუდსგინნაველეფს დაქირებული ბერძენული არმიაშ მანჯღვერთარობაშ ბორჯის, კიროს უკულაშიშ ოურდუმე-პოლიტიკური კამპანიას სპარსეთიშ ხვისტაშ ხეშა ეშაჸოთამალო, თაშნეშე დაქირებული ჯარიშ საბერძნეთიშა დორთინაშ ანბეეფს კიროსიშ ღურაშ უკული დო შხვა. ანაბასისი ისტორიული, გეოგრაფიული დო ეთნოგრაფიული ხასიათიშ ნახანდი რე. თის კაბეტი შანულობა უღჷ საქორთუოშ ისტორიაშო ხოლო. მუშენდა ანაბასისის შეთმოფხვადუთ ინფორმაციას კოლხეფიშ დო კოლხეთიშ ომაფეშ გეშა.
კიროპედიას ეჭარილიე ოურდუმე კამპანიეფი ჭიჭე აზიას დო ბაბილონს დო კიროს II დიდიშ ჸეთი პოლიტიკური დო ოურდუმე მეთოდეფი, ნამუეფსჷთ თინა ირინუანდჷ ახალი ბაბილონიშ ომაფეშ დაჸუნაფალო ჯვ.წ 539 წანას. კიროპედიას ისტორიკოსეფი ფშხირას მიშინუანა მუჭოთ კიროს დიდიშ გვერდო ფიქტიური ბიოგრაფიას. ანაბასისიქ დო კიროპედიაქ კაბეტი გოლინა იღვენუ ალექსანდრე მაკედონარიშა დო შხვა ბერძენი მანჯღვერთარეფიშა.
ქსენოფონტი რდჷ სოკრატეშ სტუდენტი დო მაჸალე. სოკრატეშ რინას დო ფილოსოფიური არზუანობას ორხველჷ ქსენოფონტიშ სოკრატული დიალოგეფი: სიმპოზიუმი, ოიკონომიკოსი, ჰიერონი, სოკრატეშ მოშინაფა, აპოლოგია.
ქსენოფონტიშ შხვა ნახანდეფიშე ეიოშანალი რე საბერძნეთიშ ისტორია, სოდეთ ეჭარილი რე პელოპონესიშ ლჷმაშ (ჯვ.წ. 431–404) ეკონია შკვითი წანა დო უკულიანი პერიოდი.
ქსენოფონტი ათენარი რდჷ, მარა თიში პოლიტიკური დო ოურდუმე რინა უმოსო მერსხილი რდჷ ათენიშ ტრადიციული ოპონენტი ნოღა-სახენწჷფო სპარტაწკჷმა. სპარტაშ ისტორიაშ გეშა ბრელს ბგებულენთ ქსენოფონტიშ ნახანდეფიშე: აგესილაე დო ლაკედემონარეფიშ სახენწჷფო დონწყილობა.
ქსენოფონტი მერჩქინელი რე ანტიკური პერიოდიშ ართ-ართ უდიდაშ ავტორო. თიში ნახანდეფი იკათუანს შხვადოშხვა ჟანრეფს დო თემეფს.
რესურსეფი ინტერნეტის[რედაქტირაფა | წყუშ რედაქტირაფა]
- ქსენოფონტი ენციკლოპედია ბრიტანიკას
- ქსენოფონტი ფილოსოფიაშ ინტერნეტ-ენციკლოპედიას
- ქსენოფონტიშ ნახანდეფი პერსევსიშ ციფრული ბიბლიოთეკას
- ქსენოფონტი - ნახანდეფი პროექტ „გუტენბერგის“
- ქსენოფონტიშ ნახანდეფი LibriVox-ის (აუდიოწინგეფიშ ოჯარალე დომეინი)