ღვენწკი
ღვენწკეფი თაშნეშე ღვერწკეფი — მორჩილძაგვარამი კვარკვალია ღვენწკეფიშ მუსხირენი ფანიაშ ოართე ჯოხოდვალა. თინეფიშ რსხული 80-შე 300-შახ სეგმენტშე აკმოდირთჷ. ირ სეგმენტის, წოხოლენიშ მოხ, 8-8 (მინ ტროპიკულ ფორმეფს მუსხირენი ვითობა) კუნტა ძაგვარი რე, ნამუეფიშჷთ ღვენწკეფი ყარაფიშ ბორჯის გეთმიაპონჷნა. ჸოფირ სსრრ-იშ ტერიტორიას გოფაჩილი ფორმეფიშ სიგჷრძა 8-15, ოშა-გოშათ — 40 სმ-შახ ონჭჷ, ჯგირო გოვითარაფილი ზისხირიშ მიმოულა უღჷნა. შურ მეუთჷნა კანით. ნერვული სისტემა აკმოდირთჷ დაღარას გოვითარაფილი დუდიშ ტვინიშ დო ქვარაშ ძეწკვიშე. გინაფაშ ორგანოეფი ვაუღჷნა, მანგიორო კანს მიარე მაგჷნაფე თოლი რე. ღვენწკეფი ჰერმაფროდიტეფი რენა. გოჸოფიარაფა დო მარქვალეფიშ გოვითარაფა პოპოქეფს მუთმოხვადჷ, ნამუეფშეთ გიშმურს ორტყაფუ - წოხოლენი მუსხირენი სეგმენტიშ ჯარკვალამი გოშხუარაფა. პოპოქშე გიშულირი მორჩილი ჭიეფი 3-4 თუთაშ უკული ძინათებული ჭიაშ ზჷმას ღებულენა. ღვენწკეფს ჯგირო აფჷნა რეგენერაციაშ შილებუამობა. ღვენწკეფი დიხას მიშახენა. ჭკომჷნა ჩანარული ნოსქილედეფით, წვირეთ დო შხვა. ღვენწკეფი იკათიანს 1500-შახ გვარობას. დიდი შანულობა უღუ მუჭოთ დიხაგჷმაჭყაფალეფს, მარა გორკვიაფილ გავალსჷთ მეთმიორინუანს, თიშ გეშა, ნამჷ-და ღეჯიშ ფიჟვიშ ჰელმინთეფიშ დო მაფურინჯეეფიშ კანკალე პარაზიტიშ ოშქაშეფონი მენძელეფი რენა.
