დინორეშა გინულა

ცეფეიდეფი

ვიკიპედიაშე
ცეფეიდიშ პულსაცია

ცეფეიდეფიმათირუ მურიცხეფი, ნამუეფიშ ბარჩხალი ითირუ სტაბილური პერიოდულობათ. თინეფი რენა გიგანტური მურიცხეფი, ბჟაშე ზომათ 5-20-შა მასიური. თინეფიშ პულსაცია მერსხილი რე ბარჩხალიშ პერიოდულობაწკჷმა.

ცეფეიდეფიშ ჸათე რჯება 1908 წანას გიმირკვიუ გიშარჩქინელი ამერიკალი ასტრონომიქ ჰენრიეტა სვონ ლივიტიქ, ნამუთ გურაფულენდჷ მაგელანური მუნაფეფიშ ცეფეიდეფს.

ცეფეიდეფს ასტრონომიაშო დიდი შანულობა უღუ, მუშენდა მენცარეფი თინეფს გიმირინუანა გალაქტიკური დო ექსტრაგალაქტიკური დისტანციეფიშ ოზიმალო.

ტერმინი ცეფეიდი მოურს ცეფევსიშ მურიცხეჭაჭილიშ ართ-ართი მურიცხული სისტემაშ - დელტა ცეფევსიშ ჯოხოდვალაშე.

ცეფეიდეფქ შილებე გირთას ჟირი ტიპო:

  • კლასიკური ცეფეიდეფი - ახალნორდი მათირუ მურიცხეფი ნამუეფი იხასიათებუნა რეგულარული პულსაციათ, ნამუშ პერიოდი დღალეფიშე მარაშახ რე. ჸათე მურიცხეფი თაშნეშე შინელი რენა მუჭოთ პოპულაცია I ცეფეიდეფი, ტიპი I ცეფეიდეფი დო დელტა ცეფეიდეფი.
  • ტიპი II ცეფეიდეფი - უმოსო ჯვეში, ხანიერი, ჭიჭე მასაშ მურიცხეფი, ნამუეფიშ პულსაციაშ პერიოდულობა იგინძორებუ 1-შე 50 დღაშახ.

რესურსეფი ინტერნეტის[რედაქტირაფა | წყუშ რედაქტირაფა]