ხელუანური ინსემინაცია
ხელუანური ინსემინაცია — სპერმაშ ოსურიშ სასქუოშა ვარდა სასქუოშ ჸალიშა მიშაჸონაფა, მოკათუობაშ ღანკით. ხელუანური ინსემინაცია ადამიერიშ უსქუალობაშ კურნალობაშ ართ-ართი მეთოდი რე. თაშნეშე, ინსემინაცია გიმირინუაფჷ ჩხოლარეფიშ, მაგალთო ჩხოულეფიშ, ცხენეფიშ დო ღეჯეფიშ რეპროდუქციაშო. გიშმართუნა ინსემინაციაშ ჟირი მეთოდის: სასქუოშ ჸალიშ დინახლენი ინსემინაციას (ICI) დო სასქუოშ დინახლენი ინსემინაციას (IUI).
ხელუანური ინსემინაციაშ ისტორია მავითობრუო ოშწანურაშ ეკონია პერიოდიშე იჭყაფჷ. მაართა ექიმი ნამუქჷთ გიმირინუ ინსემინაცია უსქუალობაშ კურნალობაშო რდჷ შოტლანდიარი ქირურგი ჯონ ჰანტერი, ნამუქჷთ 1790 წანას ინსემინაციათ დამონკათუ ართი მუში პაციენტი ოსური. მაართათ, ინსემინაცია დონორიშ სპერმაშ გიმორინაფათ აკეთჷ ამერიკალი პროფესორქ უილიამ პენქოუსტიქ 1884 წანას.
1930-იან წანეფს, ბრიტანალი გინეკოლოგიქ მერი ბარტონქ დარსხუ კლინიკა, სოდეთ კურნალობაშ სტანდარტული მეთოდი დონორიშ სპერმათ ინსემინაცია რდჷ. დონორო გიმირინუაფუდჷ მერი ბარტონიშ ქომონჯიშ ბერტოლდ ვაისნერიშ სპერმა. ვაისნერიშ სპერმათ დებადჷ დოხოლაფირო 600 ბაღანაქ.
1950-იან წანეფიშე ამერიკას (აიოვა) გინწყჷ სპერმაშ ბანკიქ, ბიოლოგი ჯერომ შერმანიშ ინიციატივათ.
დონორით ინსემინაცია უმოსო გიმირინუაფუდჷ ქომოლკოჩიშ უსქუალობაშ ბორჯის, მუჟამსჷთ არსებენდჷ სპერმაშ პრობლემეფი მაგალთო აზოოსპერმია, ოლიგოსპერმია, ასთენოსპერმია.
1970-იან წანეფიშე გევითარჷ უსქუალობაშ კურნალობაშ უმოს ინოვაციური მეთოდეფქ: ინ ვიტრო გაჸოფიერაფაქ დო ინტრაციტოპლაზმური სპერმაშ ინექციაქ.