ჯონ ვეინი

ჯონ ვეინი
	ჯონ ვეინი
	ინგლ. John Vane
დაბადებაშ თარიღი:	29 მელახი, 1927
დაბადებაშ აბანი:	ტარდიბიგი, ვუსტერშირი, ინგლისი
ღურაშ თარიღი:	გერგობათუთა 19, 2004 (77 წანერი)
ღურაშ აბანი:	კენტიშ ოგრაფე, ინგლისი
მენოღალობა:	გოართოიანაფილი ომაფე
ომენცარე სფერო:	ფარმაკოლოგია
სამუშაშ აბანი :	ლონდონიშ უნივერსიტეტი; იელიშ უნივერსიტეტი
ალმა-მატერი:	ბირმინგემიშ უნივერსიტეტი; ოქსფორდიშ უნივერსიტეტი
ომენცარე ხემანჯღვერი:	ჯეფრი დოუზი
ჯილდოეფი დო პრემიეფი:	ლონდონიშ ომაფე ჯარალუაშ მაკათური (1974); ნობელიშ პრემია ფიზიოლოგიაშ დო მედიცინაშ დარგის (1982); ომაფე მენდალი (1989); ლასკერიშ პრემია (1977)

სერ ჯონ რობერტ ვეინი (ინგლ. Sir John Robert Vane; დ. 29 მელახი, 1927, ტარდიბიგი, ვუსტერშირი, ინგლისი — ღ. 19 გერგობათუთა, 2004, კენტიშ ოგრაფე, ინგლისი) — ინგლისარი ფარმაკოლოგი. გიმირკვიუ ასპირინიშ ჭუაშ დო ანთებური პროცესეფიშ დარჩქალებაშ ეფექტეფი. ვეინიშ მენცარულ ნახანდეფს გიარსხჷ გურიშ დო ჯერღვეფიშ ლახარეფიშ კურნალუაშ ახალ მეთოდეფქ დო ანგიოტენზინ-კონვერტორ-ფერმენტეფიშ ინჰიბიტორეფიშ გოვითარაფაქ. 1982 წანას გინოჩეს ნობელიშ პრემია ფიზიოლოგიაშ დო მედიცინაშ დარგის, პროსტაგლანდინეფიშ რკვიებაშ გეშა. ვეინიქ პრემია მიპალჷ შვედი სუნე ბერგსტრიომი დო ამერიკალი ბენგტ სამუელსონიწკჷმა ართო.

ბიოგრაფია

ჯონ ვეინი გურაფულენდჷ კინგ-ედვარდსიშ სკოლას, ბირმინგემს. ბაღანობაშე ქიმია ოინტერესუდჷ. სკოლაშ უკულ გურაფა გაგინძორჷ ბირმინგემიშ უნივერსიტეტის, სოდეთ მიპალუ ბაკალავრიშ ხარისხი. მალას ქიმიაშ გურაფა მიოტუ დო ქიდიჭყჷ ფარმაკოლოგიაშ დოგურაფა. ფარმაკოლოგიას გურაფულენდჷ ოქსფორდიშ უნივერსიტეტის. ვეინი ოქსფორდიშ უნივერსიტეტის გურაფულენდჷ შინელი ფარმაკოლოგიშ ჯოშუა ჰაროლდ ბერნიშ ხემანჯღვერობათ. ვეინიქ ოქსფორდიშ უნივერსიტეტის მიპალუ ბაკალავრიშ ხარისხი ფარმაკოლოგიას. უკულ ომუშებუშა შეფილდიშ უნივერსიტეტიშა გეგნორთჷ, მარა მალას კინჷ ოქსფორდიშ უნივერსიტეტიშა დირთჷ დო თხილუ ოდოქტორე დისერტაცია 1953 წანას. ვეინიშ ომენცარე ხემანჯღვერი დისერტაციაშო მუშობაშ ბორჯის, რდჷ ინგლისარი ფიზიოლოგი ჯეფრი დოუზი. გურაფაშ თებაშ უკულ ვეინი მუშენდჷ ფარმაკოლოგიაშ ასისტენტ-პროფესორო, იელიშ უნივერსიტეტის. 1955 წანას ბრიტანეთშა დირთჷ დო მუშობა ქიდიჭყჷ ლონდონიშ უნივერსიტეტიშ ბაზისური მედიცინაშ ინსტიტუტის, ლექტორო. ლონდონიშ უნივერსიტეტის ჯონ ვეინიქ 18 წანას ქიმუშუ. ლონდონიშ უნივერსიტეტის ვეინიქ გიმირკვიუ ბიოტესტირებაშ მეთოდეფი, ასპირინი, ანგიოტენზინ-კონვერტორული ფერმენტეფი დო შხვ. 1973 წანას ომუშებუშა გეგნორთჷ Wellcome Trust-იშ ფონდიშა, მენცარული რკვიებეფიშ დირექტორო. ჸათაქ, სალვადორ მონკადაშ ხემანჯღვერობათ, ვეინიქ დო თიში ჯგუფიქ დიდი თია მიშეღჷ პროსტაციკლინიშ (პროსტაგლანდი I2) უკულიან გოვითარაფაშა. 1985 წანას ჯონ ვეინიქ წიმინდე ბართოლომეოშ ჰოსპიტალიშ მედიცინაშ კოლეჯის დარსხუ უილიამ ჰარვეიშ ჯოხონობაშ რკვიებეფიშ ინსტიტუტი. ჸათაქ ვეინიქ გიმირკვიუ COX-2-იშ სელექციური ინჰიბიტორეფი. ჯონ ვეინი რდჷ შხვადოშხვა პრემიეფიშ დო ჯილდოეფიშ ლაურეატი. 1974 წანაშე რდჷ ლონდონიშ ომაფე ჯარალუაშ მაკათური. 1982 წანას ვეინის გინოჩეს ნობელიშ პრემია, 1989 წანას ომაფე მენდალი. 1977 წანას ჯონ ვეინის, პროსტაციკლინიშ ძირაფაშ დო რკვიებაშ გეშა, გინოჩეს პრესტიჟული ლასკერიშ პრემია. ვეინი რდჷ იაგელონიშ უნივერსიტეტიშ მედიცინაშ კოლეჯიშ, პარიზიშ დეკარტეშ უნივერსიტეტიშ, მაუნთ-სინაიშ მედიცინაშ სკოლაშ დო აბერდინიშ უნივერსიტეტიშ საპატიო დოქტორი.

რესურსეფი ინტერნეტის

ჯონ რობერტ ვეინი Nobelprize.org-ის