ჯორჯ მარშალი

	ჯორჯ მარშალი; ინგლ. George C. Marshall
	; ოფიციალური პორტრეტი, 1946 წანა
ააშ-იშ დუდთხილუაშ მელამოსე
პოსტის გერინაშ ბორჯი
	21 ეკენია, 1950 – 12 ეკენია, 1951
პრეზიდენტი	ჰარი ტრუმენი
წიმოხონი	ლუის ართურ ჯონსონი
მონძე	რობერტ ლოვეტი
ააშ-იშ სახენწჷფო მელამოსე
პოსტის გერინაშ ბორჯი
	21 ღურთუთა, 1947 – 20 ღურთუთა, 1949
პრეზიდენტი	ჰარი ტრუმენი
წიმოხონი	ჯეიმს ფრენსის ბირნსი
მონძე	დინ აჩესონი
ააშ-იშ არმიაშ შტაბიშ უნჩაში
პოსტის გერინაშ ბორჯი
	1 ეკენია, 1939 – 18 გერგობათუთა, 1945
პრეზიდენტი	ფრანკლინ დელანო რუზველტი; ჰარი ტრუმენი
წიმოხონი	მალინ კრეიგი
მონძე	დუაიტ ეიზენჰაუერი
ნაღურა	გჷმათუთა 16, 1959 (78 წანერი); ვაშინგტონი, ააშ
ნთხორუ აბანი	არლინგტონიშ ნაციონალური სასაფლა
მენოღალობა	ააშ
პოლიტიკური პარტია	უპარტიე
მუმა	ჯორჯ კეტლეტ მარშალი
ნანა	ლაურა ემილი ბრედფორდი
ალმასქუ	ლილი კარტერ კოულზი; კატერინა ტაპერ მარშალი
სქუალეფი	ვაჸუნდჷ
გონათაფა	ვირჯინიაშ ოურდუმე ინსტიტუტი
ჯილდოეფი	; კონგრესიშ ორქოშ მენდალი (1946); ნობელიშ პრემია თინჩალაშ დარგის (1953); კარლოს დიდიშ პრემია (1959)
ხეშმოჭარუა

ჯორჯ კეტლეტ მარშალი უკულაში (ინგლ. George Catlett Marshall Jr.; დ. 31 ქირსეთუთა, 1880 — ღ. 16 გჷმათუთა, 1959) — ამერიკალი სახენწჷფო დო ოურდუმე მოღალე, ააშ-იშ არმიაშ გენერალი, არმიაშ შტაბიშ უნჩაში მაჟირა მოსოფელიშ ლჷმაშ ბორჯის (1939-1945), ააშ-იშ სახენწჷფო მელამოსე (1947-1949) დო ააშ-იშ დუდთხილუაშ მელამოსე (1950-1951). თიქ 1947 წანას წჷმარინუ ევროპაშ რეკონსტრუქციაშ პროგრამა, ნამუთ მარშალიშ გეგმაშ ჯოხოდვალათ რე შინელი. 1953 წანას გინოჩეს ნობელიშ პრემია თინჩალაშ დარგის.

ბიოგრაფია[რედაქტირაფა | წყუშ რედაქტირაფა]

დებადჷ 1880 წანაშ 31 ქირსეთუთას, პენსილვანიაშ ნოღა იუნიონ-თაუნს. ჯორჯიშ მუმა რდჷ კოქსით დო ქუანოშქერით მოვაჭრე დინდარი ბიზნესმენი. ჯორჯი გურაფულენდჷ ვირჯინიაშ ოურდუმე ინსტიტუტის, ნამუთ წჷმოძინელო გათუ 1901 წანას დო მიპალუ კადეტეფიშ კორპუსის კაპიტანიშ ჩინი. გურაფაშ თებაშ უკულ ნინალენდჷ ფილიპინეფს. ჸათე პერიოდიშე მიოჭირინუ შანულამი კარიერული წჷმოძინეფს. ნინალენდჷ მაართა მოსოფელიშ ლჷმას დო რდჷ ამერიკაშ მაართა დივიზიაშ ოპერაციეფიშ ხემანჯღვერი. ლჷმაშ თებაშ უკულ რდჷ შინელი ამერიკალი გენერალიშ ჯონ პერშინგიშ ასისტენტი. ჯორჯ მარშალს 1939 წანაშ 1 ეკენიაშე უკინებუდჷ ააშ-იშ არმიაშ შტაბიშ უნჩაშიშ პოსტი. გეჸვენჯი ამშვი წანაშ გოძვენას მარშალქ აფორმირჷ ახალი ამერიკული დივიზიეფი, მიშეღჷ კაბეტი თია ახალი ანჯარეფიშ გოვითარაფაშა, განძალიერჷ არმია. 1939 წანაშო ამერიკაშ არმია იკათუანდჷ ხვალე 200,000 ოფიცერს. მარშალიშ მანჯღვერალათ არმიაქ შანულამო გეფართინუ დო თიში მუდანობაქ მიოჭირინუ 8,300,000 ჯარიშკოჩის. მარშალიშ რეფორმეფით სერიოზულო გედიდჷ დო გენძალიერჷ ოჰეერე, თაშნეშე ქვიითი ჯარეფქ. ჸათე დო შხვა ოურდუმე მეჭირინაფეფიშ შედეგო, ბრიტანეთიშ პრემიერ-მინისტრი უინსტონ ჩერჩილი მარშალს "გომორძგუეფიშ ორგანიზატორს" უძახუდჷ. მარშალქ არმიაშ შტაბიშ უნჩაშიშ პოსტი დიტუ 1945 წანაშ გერგობათუთას. უკულ დიჭყჷ დიპლომატიური კარიერა. ჰარი ტრუმენიშ ინიციატივათ მარშალი არსულენდჷ მედიატორიშ როლს ჩინეთიშ ომენოღალე ლჷმას. მარა მარშალიშ ცადებეფს მუთუნნერი შედეგეფი ვამუღალუ. 1947 წანაშე მარშალს უკინებუდჷ სახენწჷფო მელამოსეშ პოსტი. ჸათე წანაშ ივანობას, თიქ წჷმარინუ ლჷმეფით მოჯალაგერი ევროპაშ რეკონსტრუქციაშ პროგრამა (მარშალიშ გეგმა). მარშალიშ მელამოსობაშ ბორჯის, ამერიკაქ მეხვარჷ საბერძნეთის დო თურქეთის, ქიჩინჷ ისრაელი. თაშნეშე დიჭყჷ დუდშეიანი მორაგადებეფქ ნატოშ ოურდუმე ალიანსიშ გოჭყაფაშ გეშა. 1949 წანაშო მარშალს სინთელეშ პრობლემეფქ ქაშუ დო სახენწჷფო მელამოსეშ პოსტი ქიდიტუ. 1949-1950 წანეფს მარშალი რდჷ ამერიკული ჭითა ჯვარიშ პრეზიდენტი. უკულ 1950 წანაშ ეკენიას, 70 წანერი მარშალი, ტრუმენქ ქუდარინუ ააშ-იშ დუდთხილუაშ მელამოსეთ.

ჯორჯ მარშალი რდჷ შხვადოშხვა პრემიეფიშ დო ჯილდოეფიშ ლაურეატი. 1953 წანას მიპალუ ნობელიშ პრემია თინჩალაშ დარგის. მარშალქ ღურუ 1959 წანაშ 16 გჷმათუთას. დასაფულებური რე არლინგტონიშ ნაციონალური სასაფლას.