ჯორჯ შულცი
ჯორჯ პრატ შულცი (ინგლ. George Pratt Shultz; დ. 13 ქირსეთუთა, 1920 — ღ. 6 ფურთუთა, 2021) — ამერიკალი ეკონომისტი, ბიზნესმენი, დიპლომატი დო პოლიტიკოსი. მიშეღჷ კაბეტი თია ნიქსონიშ დო რეიგანიშ ადმინისტრაციეფიშ ეკონომიკური დო გალენური პოლიტიკაშ ფორმირაფაშა.
შულცი ირდუდჷ ნიუ-ჯერსის, ფინანსურო წჷმოძინელი ფანიას. გურაფულენდჷ ეკონომიკას პრინსთონიშ უნივერსიტეტის, ნამუთ გათუ 1942 წანას. უკულ ქაკათჷ ამერიკაშ ოზუღე ნძალეფს დო მიოჭირინუ კაპიტანობას. მაჟირა მოსოფელიშ ლჷმაშ თებაშ უკულ, შულციქ გემშართჷ მასაჩუსეტსიშ ტექნოლოგიაშ ინსტიტუტიშა, სოდეთ თხილუ ოდოქტორე დისერტაცია 1949 წანას. 1957 წანაშე რდჷ ინდუსტრიული ურთიართობეფიშ პროფესორი ჩიკაგოშ უნივერსიტეტის. ხუთი წანაშ უკულ გინირთჷ უნივერსიტეტიშ ბიზნესიშ სკოლაშ დეკანო. შულციქ პოპულარობა მიპალუ მუჭოთ წჷმოძინელი ეკონომისტიქ. 1950-1960-იან წანეფს შულცი ნინალენდჷ ააშ-იშ შხვადოშხვა პრეზიდენტეფიშ ადმინისტრაციეფიშ საკონსულტაციო კომიტეტეფს.
1968 წანას ააშ-იშ პრეზიდენტიქ, რიჩარდ ნიქსონქ შულცი ქუდარინუ ხანდაშ მელამოსეთ. 1970 წანას შულცი ქუდარინეს ახალდუნარსხუა მენეჯმენტიშ დო ბიუჯეტიშ ოფისიშ დირექტორო. 1972 წანას თიქ გინირთჷ ააშ-იშ ხაზინაშ მელამოსეთ. ჸათე შანულამი პოსტეფს გერინაშ ბორჯის, შულციშ ღანკი რდჷ ინფლაციაშ კონტროლი, ხეშქირაშ დო ფასეფიშ გოჸინუაშ პოლიტიკაშ გიმორინაფათ. 1974 წანას, შულციქ ხაზინაშ მელამოსეშ პოსტი ქიდიტუ დო უკულ, კარიერა გაგინძორჷ გლობალური საინჟინერო კომპანიას "ბეჩთელ კორპორეიშენ"-ს. ბრუო წანაშ გოძვენას, შულცი რდჷ ჸათე კომპანიაშ დირექტორი.
შულციქ ამერიკაშ თარობას 1982 წანას დართჷ. ჸათე წანას რონალდ რეიგანქ თინა ქუდარინუ სახენწჷფო მელამოსეთ. შულცი პრაგმატული პოლიტიკას აწარმენდჷ დო ოცადუდჷ თინჩალაშ მეჭირინაფას არხო ბჟაეიოლს დო ლათინური ამერიკას. მარა ართობჯულო, რდჷ აგრესიული პოლიტიკაშ მოხუჯე ტერორიზმიშ მეხჷ. შულცი ოცადუდჷ ურთიართალაშ გაუჯგუშებას ჩინეთიწკჷმა დო სხუნუეთიწკჷმა. თიქ მიშეღჷ შანულამი თია ოშქაშე რადიუსიშ გვირზილური ნძალეფიშ ხეკულუაშ (INF Treaty) დოდვალაშა სხუნუეთიწკჷმა, 1987 წანას.
სახენწჷფო მელამოსეშ პოსტიშე ულაშ უკულ, შულციქ კერძო სექტორს დართჷ. შულცი რდჷ შხვადოშხვა შანულამი ამერიკული დო ურცხოული პრემიეფიშ დო ჯილდოეფიშ ლაურეატი. 1989 წანას გინოჩეს პრესტიჟული დუდიშალაშ ოპრეზიდენტე მენდალი. 1993 წანას გიშართჷ შულციშ მემუარეფქ "უბადობა დო ტრიუმფი, სახენწჷფო მელამოსეშ წანეფი".