ჰუბერტ ჰამფრი
| ჰუბერტ ჰამფრი Hubert Humphrey | ||
 ოფიციალური პორტრეტი, 1965 წ. | ||
| ააშ-იშ ვიცე-პრეზიდენტი | ||
|---|---|---|
| პოსტის გერინაშ ბორჯი | ||
| 20 ღურთუთა, 1965 – 20 ღურთუთა, 1969 | ||
| პრეზიდენტი | ლინდონ ჯონსონი | |
| წიმოხონი | ლინდონ ჯონსონი | |
| მონძე | სპირო აგნიუ | |
| პოსტის გერინაშ ბორჯი | ||
| 3 ღურთუთა, 1971 – 13 ღურთუთა, 1978 | ||
| წიმოხონი | იუჯინ მაკარტი | |
| მონძე | მიურიელ ჰამფრი | |
| პოსტის გერინაშ ბორჯი | ||
| 3 ღურთუთა, 1949 – 29 ქირსეთუთა, 1964 | ||
| წიმოხონი | ჯოზეფ ჰერსტ ბოლი | |
| მონძე | უოლტერ მონდეილი | |
| პოსტის გერინაშ ბორჯი | ||
| 2 კვირკვე, 1945 – 30 გერგობათუთა, 1948 | ||
| წიმოხონი | მარვინ ლუის კლაინი | |
| მონძე | ერიკ ჰოიერი | |
| დუნაბადი | 27 მესი, 1911 უოლესი, ობჟათე დაკოტა, ააშ | |
| ნაღურა | ღურთუთა 13, 1978 (66 წანერი) უეივერლი, მინესოტა, ააშ | |
| მენოღალობა |  ააშ | |
| ერუანობა | ამერიკალი | |
| პოლიტიკური პარტია | დემოკრატიული პარტია | |
| მუმა | ჰუბერტ ჰორეიშო ჰამფრი უნჩაში | |
| ნანა | რაგნილდ კრისტინ სანესი | |
| ალმასქუ | მიურიელ ბაკი | |
| სქუალეფი | 4 | |
| გონათაფა | მინესოტაშ უნივერსიტეტი ლუიზიანაშ შტატიშ უნივერსიტეტი | |
| ჯილდოეფი | კონგრესიშ ორქოშ მენდალი (1979) დუდიშალაშ ოპრეზიდენტე მენდალი (1980) | |
| ხეშმოჭარუა |  | |
ჰუბერტ ჰორეიშო ჰამფრი უკულაში (ინგლ. Hubert Horatio Humphrey Jr.; დ. 27 მესი, 1911 — ღ. 13 ღურთუთა, 1978) — ამერიკალი პოლიტიკოსი დო სახენწჷფო მოღალე, ააშ-იშ ვიცე-პრეზიდენტი 1965-1969 წანეფს, ლინდონ ჯონსონიშ ადმინისტრაციას. რდჷ სენატიშ მაკათური 1949-1964 დო 1971-1978 წანეფს. რდჷ საპრეზიდენტო კანდიდატი დემოკრატიული პარტიაშე 1968 წანაშ გიშაგორუეფს, სოდეთ რესპუბლიკარი რიჩარდ ნიქსონიწკჷმა დემარცხჷ. პოლიტიკური კარიერაშ გოძვენას, ჰამფრი მერჩქინელი რდჷ თეხანური ამერიკული ლიბერალიზმიშ ართ-ართი უშანულამაში ლიდერო.
დებადჷ ობჟათე დაკოტაშ ნოღა უოლესის. გურაფულენდჷ მინესოტაშ უნივერსიტეტის. 1943 წანას გინირთჷ პოლიტიკური მენცარობაშ პროფესორო. 1945 წანას ჰამფრი გიშაგორილქ იჸუ მინეაპოლისიშ მერო. 1947 წანას დარსხუ ლიბერალური, ანტი-კომუნისტური ბუნა ამერიკალეფი დემოკრატიული საქვარიშო. 1948 წანას ჰამფრიქ გინირთჷ ააშ-იშ სენატიშ მაკათურო. ჸათე ბორჯიშე ჰამფრი სუმშა ნინალენდჷ სენატის, 1964 წანაშახ. 1961-1964 წანეფს უკინებუდჷ სენატიშ უმენტაშობაშ ლიდერიშ ასისტენტიშ პოსტი. ჸათე ბორჯის, ჰამფრი რდჷ ომენოღალე ნებეფიშ აქტიშ ართ-ართი თარი ინიციატორი. ჸათე აქტიქ კანონგალეთ გეგმაცხადჷ დისკრიმინაცია რასაშ, კანიშ ფერიშ, რელიგიაშ, სქესიშ დო ერუანობაშ მეჯინათ. თაშნეშე, ჰამფრიქ წჷმარინუ ინიციატივა თინჩალაშ კორპუსიშ დორსხუაფაშო. 1952 დო 1960 წანეფს მონაწილენდჷ დემოკრატიული პარტიაშ საპრეზიდენტო პრაიმერეფს. 1964 წანას დემოკრატეფიშ საპრეზიდენტო კანდიდატიქ ლინდონ ჯონსონქ ჰამფრი ვიცე-პრეზიდენტო გეგშაგორუ.
1968 წანას ჯონსონქ გეგმაცხადჷ ნამდა მაჟირაშა პრეზიდენტობა ვაულამუდჷ. ჸათეშ გეშა ჰამფრიქ მალას ქიდიჭყჷ მუში საპრეზიდენტო კამპანია, დემოკრატიული პარტიაშ ნომინაცია მიპალუ, მარა 1968 წანაშ საპრეზიდენტო გიშაგორუეფს წაგუ რესპუბლიკარი რიჩარდ ნიქსონიწკჷმა (ნიქსონქ მიპალუ ხონარეფიშ 43,4 %, ჰამფრიქ 42,7 %). ჸათე მარცხიშ უკულ, 1971 წანას ჰამფრიქ სენატის დართჷ, სოდეთ თინა 1978 წანაშახ ნინალენდჷ. 1972 წანას ჰამფრი მონაწილენდჷ დემოკრატიული პარტიაშ საპრეზიდენტო პრაიმერეფს, მარა ჯორჯ მაკგოვერნიწკჷმა დემარცხჷ.
ჰამფრი რდჷ პოპულარული პოლიტიკოსი. თიქ კაბეტი პოპულარობა მიპალუ, მუჭოთ ომენოღალე ნებეფიშ ადვოკატიქ. მარა ჰამფრიქ ხუჯი ქუდუკინჷ ვიეტნამიშ ლჷმას, ჸათეშ გეშათ თის ფშხირას აკრიტიკენდეს. შინელი ამერიკალი ისტორიკოსი, ჰამფრიშ ბიოგრაფი არნოლდ ოფნერი ჭარუნს ნამდა, ჰამფრი რდჷ არძაშე წჷმოძინელი კანონმადვალუ ამერიკაშ ისტორიას დო ომენოღალე ნებეფიშო მალჷმარი პოლიტიკოსი.
ჰუბერტ ჰამფრიქ ღურუ 1978 წანაშ 13 ღურთუთას, 66 წანერქ. დასაფულებური რე ლეიკვუდიშ სასაფლას, მინეაპოლისის. ჰამფრის, ღურაშ უკულ გინოჩეს კონგრესიშ ორქოშ მენდალი დო დუდიშალაშ ოპრეზიდენტე მენდალი.