ჰელიოგაბალუსი

	ჰელიოგაბალუსი; ლათ. Heliogabalus
	; ჰელიოგაბალუსიშ ბიუსტი კაპიტოლიუმიშ მუზეუმს
რომიშ იმპერატორი
პოსტის გერინაშ ბორჯი
	16 მესი, 218 წანა – 11 მელახი, 222 წანა
წიმოხონი	მაკრინუსი
მონძე	ალექსანდრე სევერუსი
ნაღურა	11/12 მელახი, 222 (18 წანერი); რომი, იტალია, რომიშ იმპერია
მუმა	სექსტუს ვარიუს მარცელუსი
ნანა	იულია სოემია
ალმასქუ	იულია კორნელია პაულა; აქვილია სევერა; ანია ფაუსტინა; ჰიეროკლე
სქუალეფი	ალექსანდრე სევერუსი (სქუალაფირი)

მარკუს ავრელიუს ანტონინუსი (ლათ. Marcus Aurelius Antoninus; დაბადებაშ ჯოხო სექსტუს ვარიუს ავიტუს ბასიანუსი, დ. 204 — ღ. 11/12 მელახი, 222), უმოსი შინელი რე მუჭოთ ჰელიოგაბალუსი, ელაგაბალუსი — რომიშ იმპერატორი 218-222 წანეფს, სევერუსეფიშ დინასტიაშ წჷმმარინაფალი.

ბასიანუსიქ დებადჷ სირიაშ პროვინციაშ ნოღა ემესას (ასეიანი ჰომსი). ბასიანუსიშ ფანიაშ მაკათურეფი რდეს ბჟაშ ღორონთიშ ელაგაბალიშ კულტიშ გემაჸვენჯეფი. ბაღანობაშე ჸათე კულტის ოიჸანულუდჷ ბასიანუსი ხოლო. ბასიანუსიშ ბები რდჷ იულია მაესა, იმპერატორი სეპტიმიუს სევერუსიშ ალმასქუშ იულია დომნაშ და.

იულია მაესა რდჷ ინტრიგეფიშ დო პოლიტიკური მანევრირაფაშ დიდორსანტი დო ოცადუდჷ მუში ფანიაშ წჷმმარინაფალეფიშა რომიშ ხვისტაშ დორთინაფას. 217 წანას, კარაკალაშ ღურაშ უკულ, იმპერატორო გინირთჷ მაკრინუსიქ, ნამუქჷთ ვეჸუ ეფექტური დო პოპულარული მამართალქ. იულია მაესაშ ინტრიგეფით, 218 წანას მაკრინუსი გეგნათეს დო ახალი იმპერატორო გეგმაცხადეს 14 წანერი ბასიანუსი. (მაესაქ ქიმიგონუ ტყურა დო ანტკიცენდჷ ნამდა ბასიანუსი რდჷ კარაკალაშ სქუა. 218 წანაშ 8 მანგის, ანტიოქიაშ ლჷმას, ბასიანუსიშ ალმარინჯე ლეგიონეფქ ორჯგინეს მაკრინუსიშ ნძალეფს. მაკრინუსიქ ინტუ, მარა მალას ოჭოფეს დო დოჸვილეს.)

ბასიანუსი შინელი რე ჯოხოთ — ჰელიოგაბალუსი, ელაგაბალუსი, ნამუთ ღორონთი ელაგაბალიშ ლათინიზებული ვერსია რე.

იმპერატორი ჰელიოგაბალუსი პატის ვარძენდჷ რომიშ ტრადიციული რელიგიას. თიქ, რომიშ იმპერიაშ მასშტაბით იუპიტერიშ კულტი დოთირუ ელაგაბალიშ კულტით დო რომიშ თარობაშ მაკათურეფიწკჷმა ართო ატარენდჷ შხვადოშხვა რელიგიური რიტუალეფს ელაგაბალიშ გეშა. იმპერატორი ჰელიოგაბალუსი, თაშნეშე შინელი რდჷ სექსუალური სკანდალეფით. რდჷ ბისექსუალი დო ჸუნდჷ კოჩი ჸოროფილეფი ხოლო. იმპერატორიშ ჸათეცალი რჯებეფი ვამოწონდჷ პრეტორიანალეფიშ გვარდიას დო სენატის, თაშნეშე უბრალო ხარხის. 222 წანას, იულია მაესაშ ინიციატივათ, 18 წანერი ჰელიოგაბალუსი დოჸვილეს. 222 წანაშ 13 მელახის, რომიშ იმპერატორიშ ხვისტაშა ეშართჷ სევერუსეფიშ დინასტიაშ ეკონია წჷმმარინაფალქ ალექსანდრე სევერუსიქ.

ლიტერატურა[რედაქტირაფა | წყუშ რედაქტირაფა]

Arrizabalaga y Prado, Leonardo de (2010). The Emperor Elagabulus: Fact or Fiction?. Cambridge: Cambridge University Press.
Sidebottom, Harry (2022). The mad emperor : Heliogabalus and the decadence of Rome. London.

ჰელიოგაბალუსი სევერუსეფიშ დინასტია დებადჷ: 204 ღურჷ: 222
წიმოხონი: მაკრინუსი	რომიშ იმპერატორი 218 –222	გეჸვენჯი: ალექსანდრე სევერუსი

თე სტატია რომიშ ისტორიაშ გეშა დიოდღარო მერკე რე. თქვა შეგილებუნა ქუმმეხვარათ დო აკაფშათ თინა.