ალფ-არსლანი

	ალფ-არსლანი; Alp Arslan
	;
სელჩუკეფიშ იმპერიაშ მა-2 სულთანი
პოსტის გერინაშ ბორჯი
	4 გჷმათუთა, 1063 წანა – 15 ქირსეთუთა, 1072 წანა
წიმოხონი	თოღრულ-ბეგი
მონძე	მელიქ-შაჰი
ნაღურა	გერგობათუთა 24, 1072 (43 წანერი) ; ბარზამიშ ჯიხაზურგა, ამუდარიაშ გოხოლუას, ხორეზმი
მუმა	ჩაღრი-ბეგი
ალმასქუ	საფარია ხათუნი; აკა ხათუნი; შაჰ ხათუნი
სქუალეფი	მელიქ-შაჰი, თუთუში, იზ-ალ-დინ არსლან-არგუნი, ბორი-ბარსი, თოღრული, აიაზი, თოღან-შაჰი, არსლან-შაჰი, თექიში, სიფრი ხათუნი, აიშა ხათუნი, ზულეიჰა ხათუნი
რელიგია	სუნიზმი

ალფ-არსლანი, დაბადებაშ ჯოხო მუჰამედ ბინ დავუდ ჩაღრი (დ. 20 ღურთუთა, 1029 — ღ. 24 გერგობათუთა, 1072) — სელჩუკეფიშ იმპერიაშ სულთანი 1063-1072 წანეფს. ალფ არსლანი თურქულო შანენს "გერგეზი ნჯილო"-ს.

ალფ-არსლანი სელჩუკეფიშ სულთანიშ თოღრულ-ბეგიშ ჯიმაშ, ჩაღრი-ბეგიშ სქუა რდჷ. ალფ-არსლანქ გაფართინუ იმპერიაშ ტერიტორია დო განძალიერჷ ხეშულობა. თიქ ჟირშა მანწყუ ლესქერობა საქორთუოს. 1064 წანას, დიო სომხეთი დოლაშქუ დო გეჭოფუ ნოღა ანისი. სომხეთიშ უკულ ალფ-არსლანქ გემშეჭკირჷ მესხეთიშა, ქიდეკინჷ ახალქალაქი დო გეგნოჭუ. 1068 წანას დოლაშქუ კახეთი.

1071 წანაშ 26 მარაშინათუთას, მანასკერტიშ ლჷმას, ალფ-არსლანქ ორჯგინუ ბიზანტიარეფიშ ჯარს დო ტყვეთ ხეშა ქაშეჸოთუ ბიზანტიაშ იმპერატორი რომანოზ IV დიოგენე. ალფ-არსლანქ 1,500,000 ნომიზმაშ (ბიზანტიური ორქოშ მონეტა) მეღებაშ პიჯალათ, გადუდშულჷ დიოგენე.

მანასკერტიშ ლჷმათ სელჩუკეფიშ იმპერიაშ სანძღოეფქ ქიმიოჭირინუ ბჟადალი აზიაშა. უკულ ალფ-არსლანქ თურქესტანიშ ეჭოფუა მინდომუ დო ნძალიერი არმიათ ქიმერთჷ ამუდარიაშ წყარპიჯიშა დო ულამუდჷ წყარმალუშ გინოკვათუა. ჸათე ბორჯის, ართ-ართი ტყვექ იუსუფ-ალ-ჰარანიქ ხამუთ დოჸვილჷ ალფ-არსლანი. ალფ-არსლანი დასაფულეს ნოღა მერვის. ღურაშახ თიქ მონძეთ გეგმაცხადჷ მუში 18 წანერი სქუა მელიქ-შაჰი.

ლიტერატურა

ენციკლოპედია ბრიტანიკა