გიორგი კეკელიძე

გიორგი კეკელიძე
	გიორგი კეკელიძე
	; გიორგი კეკელიძე, 2018 წანას
დაბადებაშ თარიღი:	10 პირელი, 1984 (40 წანერი)
დაბადებაშ აბანი:	ოზურგეთი, საქორთუოშ სსრ, სსრრ
ერუანობა:	ქორთუ; სსრრ → საქორთუო
საქვარუა:	პოეტი, ბიბლიოთეკარი, ჭარუ, პროზაიკოსი, ესეისტი, ლექტორი დო ტელემაჸვენჯი
Magnum opus:	ოდეფი დო გურული დღარეფი
ჟანრი:	დეტექტივი, პოეზია დო ესე

შხვა შანულობეფშო ქოძირით კეკელიძე.

გიორგი კეკელიძე (დ. 10 პირელი, 1984, ოზურგეთი) — ქორთუ პოეტი, პროზაიკოსი, კინოსცენარისტი, ესეისტი, ლექტორი, ტელემაჸვენჯი, საქორთუოშ პარლამენტიშ ერუანული ბიბლიოთეკაშ გენერალური დირექტორი 2012 წანაშე 2024 წანაშახ.

გიორგი კეკელიძე რე პრემია „საბაშ“ დო წინანდალიშ პრემიაშ ლაურეატი, ელექტრონულ ბიბლიოთეკა lib.ge-შ დჷმარსხუაფალი დო რედაქტორი (2006-2012 წანეფს).

ოგონათუე ყარაფი #ეკვილიბრიუმიშ დო წინგიშ მუზეუმიშ დჷმარსხუაფალი. წინგიშ ჩუქებაშ დღაშ ინიციატორი საქორთუოს (23 პირელი).

ბიოგრაფია

1984 წანას, გიორგი კეკელიძექ დებადჷ ნოღა ოზურგეთის. გურაფულენდჷ ოზურგეთიშ ეგნატე ნინოშვილიშ ჯოხოდვალაშ N1 ოშქაშე სკოლას. ბაღანობას უმენტაშ ხანს კინოხონეფიშ ოფუტეეფს მიკმიშჷ, სურებს დო ნატანებს, 2001 –2009 წანეფს გურაფულენდჷ ქართიშ სახენწჷფო უნივერსიტეტიშ ფილოლოგიაშ ფაკულტეტის. ეჭოფილი აფჷ ჰუმანიტარულ მენცარობეფიშ მაგისტრიშ ხარისხი.

2006 წანას, უნივერსიტეტის მაჸალეეფწკჷმა ართო დიო გაზეთი, უკული — ჟურნალი ჯოხოთ „ლილ“ გეგშაშქჷ. თიშ ღანკი რდჷ სტუდენტეფშო ჸოფედუკო ზოხორინელი ლიტერატურული ჟურნალი, ნამუთ ვეჸუაფუდჷ მერსხილი უნივერსიტეტიშ დო სტუდრსხუშ დოფინანსაფაშა. თიში არქივი ასე ერუანულ ბიბლიოთეკას იჩუალუ. თეშ უკული ჟურნალიშ გიშაშქუმალაქ გეგნირდჷ პორტალშა lib.ge. ლიბ.ჯი-ქ გჷნირთჷ მაართა ქორთული ინტერნეტ-ბიბლიოთეკათ, ნამუთ იკათუანს ვითვითოშიშე უმოს ორიგინალ და ნათანგა ტექსტის. 2006 —2008 წანეფს მუშენდჷ რუსთავიშ №2 სარჯელეჸონაფაშ დჷნაწესებუს ქორთული ნინაშ დო ლიტერატურაშ პედაგოგო. 2009-2010 წანეფს რდჷ „რადიო ქალაქიშ“ ლიტერატურული გინოჩამაშ - „ლიტერატურული ქალაქი“ - ართ–ართი მაჸვენჯი დათო ქართველიშვილწკჷმა დო ნესტან–ნენე კვინიკაძეწკჷმა ართო. მეჸუნდჷ რუბრიკა „პრო და კონტრა“, ნამუთ ითოლწონენდჷ ჩინებული კრიტიკოსეფიშ, თეორიტიკოსეფიშ მუსხირენ გინორთელ არზიშ მორჩქილას ართ ლიტერატურულ მოლინაშენ. 2010 წანაშე, თიში ინიციატივათ ლიტერატურულ პორტალ lib.ge-ქ „როკ–კლუბწკჷმა“ ართო ქჷდარსხუ ირმარული არტ–სისერა, 2011 წანას ქჷდარსხუ lib.ge-შ დო fortline georgia-შ ართობური დისკუსიეფიშ ციკლი დო რე თე დისკუსიეფიშ მოდერატორი.

2010 წანაშე კითხულენს ლექციეფს დუდიშულ უნივერსიტეტის კლასიკურ ლიტერატურაშენ, თაშნეშე ხელუანობაშენ დო ლიტერატურაშ ისტორიაშენ აგრარულ უნივერსიტეტის. 2011 წანას რე, რადიო „მწვანე ტალღა“ დო ელექტრონული ბიბლიოთეკა lib.ge-შ რადიო-პროექტიშ „ლიტერატურა და სხვა“ მაჸვენჯი. 2010–2012 წანეფს, რდჷ ჟურნალ „ტაბულაშ“ ლიტერატურული მასხუნალი დო მესჷმეტე, ოტელევიზიე გინოჩამა „წითელი ზონაშ“ პროდიუსერი, ჟურნალეფიშ - „ფოკუსი“ დო „თბილისი-აუტ-იშ“ ლიტერატურული მასხუნალი. 2012 წანაშე მეჸუნდჷ ტელე-გინოჩამა „ინტერპრეტაცია“, სოდეთ მოჭანაფილ სუმარეფწკჷმა ართო იჩიებუნა ლიტერატურაშ გეშა, ნამუსჷთ სკოლას დო უნივერსიტეტეფს ოგურუანან, ტექსტეფიშ ახალობურ ინტერპრეტაციაშენ. 2012 წანას, ქჷდარსხჷ ოჩეჟქიმინჯე ფონდი „ლიბ-ეკვილიბრიუმი“ დო „ლიბ-კლუბი“, ნამუთ ჯინჯიერო სტუდენტეფს აკმაართიანენს დო უღუ სოციალური დო ოგონათუე ფუნქცია. 2012 წანას, გიორგი კეკელიძექ გჷნირთჷ გინოჩამა „ლიტარეაშ“ ავტორო დო მაჸვენჯო ^[1], თე გინოჩამაშო თის მიაჩჷ წანაშ ლიტერატურული პრემიაქ „ოქროს ფრთა“. 2012 წანას, ოერეფოშქაშე აუდიო-პორტალს Lyrikline.org გინწყჷ ავტორიშ ჟირნინამ ხასჷლაქ.

2012 წანას, გიორგი კეკელიძექ, 27 წანაშ ხანს, საქორთუოშ პარლამენტიშ ერუანული ბიბლიოთეკაშ გენერალური დირექტორო^[2], საქორთუოს ერუანული ბიბლიოთეკაშ არძა ბორჯიშ არძაშე ახალნორდი მადუდეთ გჷნირთჷ. ბიბლიოთეკას მუშობაშ მერზება lib.ge-შ წჷმოძინელო მუშობაშ გეშა ეჭოფჷ. დიჭყჷ რეფორმეფი მუსხირენი მალობათ - დიგიტალიზაცია, ნინალა, ტელე-გინოჩამეფი, ბიბლიოთეკას შხვადოშხვა თემატური კუნთხუეფიშ, თინეფ შქას ურცხოური ბიბლიოთეკეფიშ გონწყუმა. ქორთულ ბიბლიოთეკეფქ დო კუთნხუეფქ გინწყჷ სტამბოლიშ, კიევიშ, ვენაშ ბიბლიოთეკეფს, გაჭყჷ ელექტორნული გოვითარაფაშ ობიბლიოთეკე სინდიკატი, ნამუქჷთ აკაართიანჷ რეგიონული ბიბლიოთეკეფი. 2012 წანას, თიშით მანჯაფილი ქიმინუეფიშ გეშა ერუანულ ბიბლიოთეკას მიაჩჷ წანაშ ტოლერანტობაშ ალმარენჯიშ ჯოხოქ ^[3] 2013 წანას, გიორგი კეკელიძექ ვაშინგტონს შეხვადჷ კონგრესიშ ბიბლიოთეკაშ დირექტორს, ჯეიმზ ბილინგტონს. თინეფ შქას დოდვალირი პიჯალაშ გეშა ქორთული ციფრული არქივეფქ მოსოფელიშ დიგიტლაციაშ არქივშო გინწყჷ დო ამერიკაშ არქივეფქ- საქორთუოშო. თე ვიზიტიშ ბორჯის ერუანულ ბიბლიოთეკას გინაჩჷ ზალდასტანიშვილეფიშ ბოსტონიშ არქივქ დო გრიგოლ დიასამიძეშ ნიუ–იორკულ არქივქ. კონგრესიშ ბიბლიოთეკას იმანჯჷ გიორგი კეკელიძეშ პოეზიაშ ონჯუაქ. 2013 წანას, თიში ინიციატივათ ერუანულ ბიბლიოთეკას გინწყჷ საქორთუოს არძაშე უმოს დიდი ელექტრონულ დარბაზიქ, სოდეთ რე 40 პლანშეტური კომპიუტერი, დუდიშული ინტერნეტ-ზონა (პუფეფით, დახვენჯეფით, ელექტრონული მაკითხირალეფით), გჷშმაშქუმალარეფიშ კუნთხუ უახალაში წინგეფით, ოპრეზენტაციე დო კინო-კუნთხუ, თაშნეშე ქართველოლოგიაშ ელექტრონული დარბაზიქ დო გოახალაფირ ბაღანეფიშ სენაქ^[4]

2013 წანას დარსხჷ ლიტერატურული პრემია ობაღანე წინგეფშო^[5] 2013 წანაშე ირ ობიშხას, გინოჩამა „სხვა შუა დღეს“ მეურს კეკელიძეშ რუბრიკა ერუანული ბიბლიოთეკაშ ვანაფერი წინგეფიშ ოჩუაშეშე – ართი ჯვეში ვარ-და ვანაფერი ქორთული წინგიშ ისტორიაშ გეშა.^[6] 2013 წანაშე ტელეკომპანია რე მაესტროშ ოჭმარეშ გინოჩამაშ მაჸვენჯი დო ვიდეო–ბლოგ "კვირის აზრები"-შ მაკათური^[7] 2014 წანას, თიში ინიციატივათ ერუანულ ბიბლიოთეკას გინწყჷ ბაღანეფიშ სენაქ, ემიგრაციაშ დარბაზიქ, ერუანული ციფრული ფოტომატიანექ, ჭარუა–კითხირიშ გჷმაფაჩალი ჯარალუაშ ოკითხირალი დარბაზიქ, კინ თიმ წანას ერუანულ ბიბლიოთეკას გინაჩჷ დგჷმილქ ქუთეშის, სოდეთ ერუანული დეპოზიტარიუმიშ დო ურცხოალ სტიპენდიანტეფიშ დარინალიშ აკოქიმინუაქ გჷნოჭყორდჷ^[8] 2014 წანაშე ჟურნალ ლიბერალს ჭარუნს პუბლიკაციეფს ბიბლიოთეკაშ გეშა. 2014 წანას, თიში ინიციატივათ ბიბლიოთეკა დო ჯეოსელი ედომუშამი საქორთუოშ მასშტაბით იჭყანა ფანია-ფანია ფოტოეფიშ გოგორაფას დო გოციფრაფას ^[9] 2015 წანას, ერუანული ბიბლიოთეკაქ ქაკათჷ მოსოფელიშ გოვითარაფილი ბიბლიოთეკეფიშ რიცხუს დო ქეგიორინუ ამერიკული ინტეგრირაფილი ობიბლიოთეკე პროგრამა Sierra. 2015 წანას რე მაჸვენჯი გინოჩამა „დილა წიგნებისა“-შ – რუსთავი 2-ს [1] 2015წანას — ართო მერხწკჷმა – რადიო შოკოლადი 2015 ვერბალური ანკეტა (funtime.ge)

2015 წანას, გიორგი კეკელიძექ ერუანულ ახალი კომპლექსი გონწყჷ: ნანაშ ნინაშ დარბაზი, ბინეხიშ დო ღვინიშ ბიბლიოთეკა, აფხაზური ბიბლიოთეკა, კარცერ–ლუქსი, ქორთული ემიგრაციაშ დარბაზი-ოკითხირე, ჭარუა-კითხირიშ გჷმაფაჩალი ჯარალუაშ ოკიხირალი დარბაზი, რეპრესირაფილი წინგიშ მუზეუმი, ვახტანგ მაამშვაშ ჯოხოშ წორომოხანდეეფიშ ომუშებელი ლაბორატორია, ჭაბუა ამირეჯიბიშ ჯოხონობაშ კაბინეტი–ექსპოზიცია, ელექტრონულ ბიბლიოთეკა „ივერიელიშ“ ომუშებელი ლაბორატორია, ერუანული ბიბლიოთეკაშ დო „ჯეოსელიშ“ ართობურ პროექტ „ციფრულ ფოტომატიანეშ“ ლაბორატორია, რესტავრაციაშ დო კონსერვაციაშ ლაბორატორია, ინტეგრირაფილ ობიბლიოთეკე სისტემა SIERRA-შ კაბინეტი ^[10] გიორგი კეკელიძეშ ინიციატივათ ჩოხატაურს გინწყჷ სტიქიაშ ბორჯის ნაღურა ივლიტა ჯიბუტიშ ჯოხოშ თეხანური მედია-თეკაქ.^[11]

ნახანდა

2008 წანას გიშაშქჷ პოეტური ნაკორობა „ოდეფი“. წინგის ლერსეფწკჷმა ართო მოფაჩილიე შხვადოშხვა ჩინებული კრიტიკოსიშ მარგინალია ნაკორობაშ გეშა დო გოფორმაფილი რე დავით მესხიშ ფოტოეფით^[12]

2010 წანას, კეკელიძეშ მუსხინერ ობაღანე ლერსიქ გემშართჷ კინ თე გიშაშქუმალაშით გიშაშქუმალირჷ ობაღანე პოეზიაშ ნაკორობაშა^[13] 2011, წანაშ გიშმაშქუმალარი „სიესტაქ“ სერიათ „წინგი სენს“ გიშაშქჷ გიორგი კეკელიძეშ პოემა „ყორანი“. სტანდარტული სტამბური პროცედურეფიშ მანგიორო წინგი მეუღჷნა სუპერმარკეტშა, სოდეთ ფურცელეფს მიშმადვანა დო „აფასოენა“ პლასტიკატიშ სენეფს, ზუსტას თიჯგურეფს, ნამუეფით გოჸინილი ქოთომეფშო, ჩხომშო, ორტვინულობაშო, ხილშო დო ნამცხვარეფშო რე გიშართილინ. სერიაშ იდეა მოურს ამერიკალი ჭარუშ, უილიამ ბეროუზიშ რომანშე „[[ტაცალე საკაკალო]“. დუდჯოხოშ იდეა ჯეკ კერუაკის ორხველჷ. 2010 წანას კეკელიძეშ ლერსეფი წჷმორინაფილი რდჷ ლონდონს, Text/Gallery-იშით ნაკეთებჷ არტ-ინსტალაციას.^[14]

2012 წანას, გიშართჷ გიორგი კეკელიძეშ დო გიგი ხორნაულიშით ადაპტირაფილი ვაჟა-ფშაველაშ „გველის მჭამელი“-ქ (გვერიშ მაჭკომალი) კომიქსო^[15] 2012 წანაშ დალიას გეგშართჷ კეკელიძეშ დო მაია ლაშაურიშ ართობურ ალბომქ „მინიატურები“.

რესურსეფი ინტერნეტის

სქოლიო

[1] ლიტარეა

[2] ეროვნული ბიბლიოთეკის გენერალურ დირექტორად გიორგი კეკელიძე დაინიშნა

[3] ტოლერანტობის საერთაშორისო დღის აღნიშვნა Archived 2016-03-04 ვებ-ხასჷლას Wayback Machine.

[4] საქართველოს პარლამენტის ეროვნულმა ბიბლიოთეკამ ელექტრონული დარბაზი გახსნა

[5] ლიტერატურული პრემია - საბავშვო მწერლებისთვის

[6] ეროვნული ბიბლიოთეკის იშვიათი გამოცემები გადაცემაში „სხვა შუადღე“

[7] კეკელიძე მაესტროს წამყვანი იქნება

[8] კულტურულ ბრენდად ქცეული ეროვნული ბიბლიოთეკა

[9] ფოტოების დიგიტალიზაციის პროექტი

[10] ეროვნულ ბიბლიოთეკაში ეროვნული ბიბლიოგრაფიისა და თანამედროვე საბიბლიოთეკო ტექნოლოგიების ცენტრები გაიხსნა

[11] ივლიტა ჯიბუტის ბიბლიოთეკის გახსნას ბიძინა ივანიშვილი დაესწრო^{[ღურელი რსხილი]}

[12] „ოდები“; გამომცემლობა სიესტა

[13] ანბანი მხიარული ლექსებით და გამოცანებით

[14] WORDS CONVERGE, 02 – 13 SEPT 2009, KINGS PLACE ლექსები არტ-ინსტალაციაში

[15] გველისმჭამელი, გამომცემლობა „სიესტა“

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]