გოდფრი ჰაუნსფილდი

გოდფრი ჰაუნსფილდი
	გოდფრი ჰაუნსფილდი
	ინგლ. Sir Godfrey Hounsfield
დაბადებაშ თარიღი:	28 მარაშინათუთა, 1919
დაბადებაშ აბანი:	სატონ-ონ-ტრენტი, ნოტინგემშირი, ინგლისი
ღურაშ თარიღი:	მარაშინათუთა 12, 2004 (84 წანერი)
ღურაშ აბანი:	კინგსტონ-აპონ-ტემსი, ლონდონი, ინგლისი
მენოღალობა:	გოართოიანაფილი ომაფე
ომენცარე სფერო:	ელექტროტექნიკა
სამუშაშ აბანი :	EMI
ალმა-მატერი:	ლონდონიშ ელექტროტექნიკაშ კოლეჯი
ჯილდოეფი დო პრემიეფი:	ლონდონიშ ომაფე ჯარალუაშ მაკათური (1975); დადელიშ მენდალი დო პრემია (1976); მალარდიშ მენდალი (1977); ნობელიშ პრემია ფიზიოლოგაშ დო მედიცინაშ დარგის (1979)

სერ გოდფრი ნიუბოლდ ჰაუნსფილდი (ინგლ. Sir Godfrey Newbold Hounsfield; დ. 28 მარაშინათუთა, 1919, სატონ-ონ-ტრენტი, ნოტინგემშირი, ინგლისი — ღ. 12 მარაშინათუთა, 2004, კინგსტონ-აპონ-ტემსი, ლონდონი, ინგლისი) — ინგლისარი ელექტროტექნიკოსი, დიაგნოსტიკური ტექნიკაშ კომპიუტერული ტომოგრაფიაშ გოვითარაფაშ გეშა გინოჩეს ნობელიშ პრემია ფიზიოლოგაშ დო მედიცინაშ დარგის 1979 წანას. ჰაუნსფილდიქ პრემია მიპალუ ობჟათე აფრიკალი-ამერიკალი ფიზიკოსი ალან კორმაკიწკჷმა ართო. ჰაუნსფილდიშ ჯოხონობაშ რე ჰაუნსფილდიშ შკალა ნამუთ გიმირინუაფჷ კომპიუტერულ ტომოგრაფიას.

ბიოგრაფია[რედაქტირაფა | წყუშ რედაქტირაფა]

გოდფრი ჰაუნსფილდიქ დებადჷ 1919 წანაშ 28 მარაშინათუთას, ნოტინგემშირიშ ოფუტე სატონ-ონ-ტრენტის, ფერმერეფიშ ფანიას. გურაფულენდჷ ნიუარკ-ონ-ტრენტიშ გრამატიკაშ სკოლას, სოდეთ ფიზიკათ დო არითმეტიკათ დეინტერესჷ. სკოლაშ თებაშ უკულ, მაჟირა მოსოფელიშ ლჷმაშ დოჭყაფაშახ ჰაუნსფილდიქ ქაკათ ბრიტანეთიშ ოურდუმე-ოჰეერე ძალეფს რეზერვისტო. ლჷმაშ თებაშ უკული ჰაუნსფილდი გურაფულენდჷ ლონდონიშ ელექტროტექნიკაშ კოლეჯის. 1949 წანას ჰაუნსფილდიქ მუშობა ქიდიჭყჷ ბრიტანულ ტრანსნაციონალურ კონგლომერატის EMI, Ltd.-ის. ჸათაქ მუშობაშ ბორჯის ჰაუნსფილდიქ დარსხუ კომპიუტერული ტომოგრაფიაშ ტექნოლოგია. 1970-იან წანეფიშ დაჭყაფუშე კომპიუტერული ტომოგრაფიაშ გიმორინაფა დიჭყეს ომედიცინე პრაქტიკას. დუდშე ტომოგრაფია ხვალე დუდიშ არსებენდჷ, 1975 წანას ჰაუნსფილდიქ ეიოგჷ რსხულიშ ტომოგრაფი ხოლო. გოდფრი ჰაუნსფილდი რდჷ ნობელიშ პრემიაშ, უილიამ ექსნერიშ მენდალიშ, ჰოვარდ პოტსიშ მენდალიშ, მალარდიშ პრემიაშ, დადელიშ მენდალიშ დო პრემიაშ ლაურეატი. 1976 წანაშე ჰაუნსფილდი რდჷ ბრიტანეთიშ იმპერიაშ ორდენიშ კომანდორი დო 1981 წანაშე რაინდი-ბაკალავრი. 1986 წანას ჰაუნსფილდიქ პენსიაშა მიდართჷ დო მუშ ჸუდეს მანწყუ კერძო ლაბორატორია. გოდფრი ჰაუნსფილდიქ ღურუ 2004 წანაშ 12 მარაშინათუთას, 84 წანერქ.

რესურსეფი ინტერნეტის[რედაქტირაფა | წყუშ რედაქტირაფა]