პოლ ლოტერბური
| პოლ კრისტიან ლოტერბური | |
| ინგლ. Paul Christian Lauterbur | |
| დაბადებაშ თარიღი: | |
|---|---|
| დაბადებაშ აბანი: | |
| ღურაშ თარიღი: |
მელახი 27, 2007 (77 წანერი) |
| ღურაშ აბანი: | |
| მენოღალობა: | |
| ომენცარე სფერო: | |
| სამუშაშ აბანი : |
სტონი-ბრუკიშ უნივერსიტეტი |
| ალმა-მატერი: | |
| ჯილდოეფი დო პრემიეფი: |
ნობელიშ პრემია ფიზიოლოგიაშ დო მედიცინაშ დარგის (2003) |
| ხეშმოჭარუა: |
|
პოლ კრისტიან ლოტერბური (ინგლ. Paul Christian Lauterbur; დ. 6 მესი, 1929, სიდნეი, ოჰაიო, ააშ — ღ. 27 მელახი, 2007, ურბანა, ილინოისი, ააშ) — ამერიკალი ქიმიკოსი. ნახანდეფიშ გეშა, ნამუქით შელებუ მაგნიტურ- რეზონანსული ტომოგრაფიაშ გოვითარაფა, ლოტერბურის 2003 წანას გინოჩეს ნობელიშ პრემია (პიტერ მენსფილდიწკჷმა ართო) ფიზიოლოგიაშ დო მედიცინაშ დარგის.
ბიოგრაფია
[რედაქტირაფა | წყუშ რედაქტირაფა]პოლ ლოტერბურიქ დებადჷ 1929 წანაშ 6 მესის, ნოღა სიდნეის, ოჰაიოშ შტატის. გურაფულენდჷ სიდნეიშ სკოლას. თინეიჯერობაშ ბორჯის ჸუდეს აკეთჷ მუშ ლაბორატორია, სოდეთ ექსპერიმენტეფს ორთუდჷ. ლოტერბურიქ მიპალუ ბაკალავრიშ ხარისხი ქიმიას, კეიზიშ ტექნოლოგიაშ ინსტიტუტის (ასეიან კეიზიშ ბჟადალი ორეზერვე უნივერსიტეტი). კეიზიშ უნივერსიტეტიშ უკულ გურაფა გაგინძორჷ პიტსბურგიშ უნივერსიტეტის, სოდეთ თხილუ ოდოქტორე დისერტაცია 1962 წანას. გურაფაშ თებაშ უკულ პოლ ლოტერბური მუშენდჷ სტონი-ბრუკიშ უნივერსიტეტის, ილინოისიშ უნივერსიტეტის (ურბანა-შამპეინი), მელონიშ ინსტიტუტის (ასეიან კარნეგი-მელონიშ უნივერსიტეტი). პოლ ლოტერბურიშ ინტერესეფიშ სფერო რდჷ ბირთვური მაგნიტური რეზონანსი, ნამუსით რე გერსხილი ასეიან მაგნიტურ-რეზონანსული ტომოგრაფია, მრტ. 1952 წანას მენცარეფს ფელიქს ბლოხის დო ედუარდ მილს პერსელს გინოჩეს ნობელიშ პრემია ბირთვური მაგნიტური რეზონანსიშ დოგურაფაშ დო გოვითარაფაშ გეშა. ჸათე პერიოდის დო უკულ ხოლო, ბირთვური მაგნიტური რეზონანსი გიმირინუაფჷდ ხვალე ქიმიური მასალეფიშ სტრუქტურაშ დაგურაფალო. 1970-იან წანეფს, ლოტერბურიქ დო მენსფილდიქ, ბმრ-შ გოვითარაფაშ უკულ, ოძირეს ნამდა, შილებედჷ თიშ გიმორინაფა რსხულიშ ორგანიზმიშ ვიზუალიზაციაშო ხოლო. ლოტერბურქ გიმირინუ რობერტ გაბილარდიშ იდეეფ ბმრ-იშ დოგურაფაშ ბორჯის. ლოტერბური ექპერიმენტეფს ორთუდჷ სტონი-ბრუკიშ უნივერსიტეტიშ ქიმიაშ დეპარტამენტის, სოდეთ დგჷდ ბმრ-იშ არძოშე უჯგუშ აპარატი. ლოტერბური ექსპერიმენტეფს ორთუდჷ სერით დო მუშენდჷ ოჭმარეშა. ართ-ართ მაართა ორგანიზმი ნამუშ ვიზუალიზაცია ლოტერბურიქ აკეთჷ, რდჷ მუშ ბაღანაშ, ზუღაშ პიჯის ნაძირა, მოლუსკი. ლოტერბურიქ ბმრ-შ გიმორინაფათ აკეთჷ მონკა წყარიშ ვიზუალიზაცია ხოლო. ჸათე ექსპერიმენტეფიშ დო ნახანდეფიშ გეშა, ნამუსით უკულ მრტ-შ ტექნოლოგიაქ გიარსხუ, ლოტერბურის, მენსფილდიწკჷმა ართო, გინოჩეს ნობელიშ პრემია 2003 წანას.
ჯილდოეფი დო პრემიეფი
[რედაქტირაფა | წყუშ რედაქტირაფა]- ნობელიშ პრემია ფიზიოლოგიაშ დო მედიცინაშ დარგის (2003)
- NAS-იშ ჯილდო (2001)
- კიოტოშ პრემია (1994)
- ბაუერიშ ჯილდო (1990)
- ტექნოლოგიაშ ერუანული მენდალი (1988)
- მენცარობაშ ერუანული მენდალი (1987)
- ჰარვიშ პრემია (1986)
- გაირდნერიშ პრემია (1985)
- კეტერინგიშ პრემია (1985)
- ალბერტ ლასკერიშ პრემია (1984)
- პოტსიშ მენდალი (1983)
ღურა
[რედაქტირაფა | წყუშ რედაქტირაფა]პოლ ლოტერბურიქ ღურუ ჭაჭაშ ლახალათ, 2007 წანაშ 27 მელახის, 77 წანერქ, მუშ ჸუდეს, ურბანას, ილინოისის. ილინოისიშ უნივერსიტეტიშ კანცლერქ რიჩარდ ჰერმანქ თქუ: "პოლიშ გოლინას გინაფულენა ირდიხას, ირ დღას, მუჟამს მრტ გინმასქილიდუანს სკუას, დიდას, მუმას".
ლიტერატურა
[რედაქტირაფა | წყუშ რედაქტირაფა]- Dawson, M. Joan. Paul Lauterbur and the Invention of MRI, Boston: MIT Press, 2013.
რესურსეფი ინტერნეტის
[რედაქტირაფა | წყუშ რედაქტირაფა]- Paul C. Lauterbur – Biographical". Nobelprize.org. Nobel Media AB. [1]
- Paul C. Lauterbur, Genesis of the MRI (Magnetic Resonance Imaging) notebook, September 1971 (all pages freely available for download in variety of formats from Science History Institute Digital Collections at digital.sciencehistory.org)
- University of Pittsburgh Medical School article on alumnus Lauterbur
- Paul C. Lauterbur Patents
- პოლ ლოტერბური — Find a Grave-ს
- National Academy of Sciences Biographical Memoir