ფელიქს ბლოხი

ფელიქს ბლოხი
გერმ. Felix Bloch
დაბადებაშ თარიღი:	23 გჷმათუთა, 1905
დაბადებაშ აბანი:	ციურიხი, შვეიცარია
ღურაშ თარიღი:	ეკენია 10, 1983 (77 წანერი)
ღურაშ აბანი:	ციურიხი, შვეიცარია
მენოღალობა:	შვეიცარია  ააშ
ომენცარე სფერო:	ფიზიკა
სამუშაშ აბანი :	სტენფორდიშ უნივერსიტეტი კალიფორნიაშ უნივერსიტეტი
ალმა-მატერი:	ციურიხიშ ფედერალური ტექნოლოგიეფიშ ინსტიტუტი ლაიფციგიშ უნივერსიტეტი
ომენცარე ხემანჯღვერი:	უერნერ ჰეიზენბერგი
ჯოხოშინელი მოგურაფეეფი:	კარსონ დანინგ ჯეფრისი
ჯილდოეფი დო პრემიეფი:	ორდენი მენცარობეფიშა დო ხელუანობეფიშა მიშნაღელი თიაშო (1979) ფრიც ლონდონიშ მემორიალური ლექცია (1959) გუგენჰაიმიშ სტიპენდია (1959) ნობელიშ პრემია ფიზიკაშ დარგის (1952) მენცარობეფიშ ერუანული აკადემიაშ მაკათური (1948)

ფელიქს ბლოხი (გერმ. Felix Bloch; დ. 23 გჷმათუთა, 1905, ციურიხი, შვეიცარია — ღ. 10 ეკენია, 1983, ციურიხი, შვეიცარია) — შვეიცარიალი-ამერიკალი ფიზიკოსი. ატომიშ გვირზილიშ ჭაჭმენტური ვეშ ზიმუაშ გვირზილურ-ჭაჭმენტური რეზონანსული მეთოდიშ გოვითარაფაშ გეშა გინოჩეს ნობელიშ პრემია ფიზიკაშ დარგის, 1952 წანას. ბლოხიქ პრემია მიპალუ ედუარდ მილს პერსელიწკჷმა ართო. ბლოხიქ მიშეღჷ ფუნდამენტური თეორიული კონტრიბუცია ფერომაგნეტიზმიშ მენცარული გაგებაშა დო კრისტალური მასარეფს (ინგლ. crystal lattices) ელექტრონიშ რჯებეფიშ რკვიებაშა. ფელიქს ბლოხი მერჩქინელი რე გვირზილური ჭაჭმენტური რეზონანსიშ ართ-ართ დუმარსხუაფალო.

ბლოხიქ დებადჷ ციურიხის, შვეიცარიალი ურიეფიშ ფანიას. გურაფულენდჷ ფიზიკას ციურიხიშ ფედერალური ტექნოლოგიეფიშ ინსტიტუტის, სოდეთ თიში მაგურაფალეფი რდეს პეტერ დებაი დო ჰერმან ვაილი. დებაიშ ინიციატივათ ბლოხიქ გურაფა გაგინძორჷ ლაიფციგიშ უნივერსიტეტის, სოდეთ თხილუ ოდოქტორე დისერტაცია უერნერ ჰეიზენბერგიშ ხემანჯღვერობათ, 1928 წანას. გურაფაშ თებაშ უკულ, ბლოხი მუშენდჷ გიშარჩქინელი მენცარეფიწკჷმა: ციურიხის — ვოლფგანგ პაულიწკჷმა, ნიდერლანდეფს — ჰანს კრამერსი დო ადრიან ფოკერიწკჷმა, კოპენჰაგენს — ნილს ბორიწკჷმა, რომს — ენრიკო ფერმიწკჷმა. 1932 წანას ბლოხიქ გერმანიაშა დირთჷ დო თექ გაგინძორჷ მუში ომენცარე კარიერა. გერმანიაშ ხეშულობაშა ნაცისტეფიშ მულაშ უკულ, ბლოხიქ გერმანია ქიდიტუ დო დიო საფრანგეთიშა მიდართჷ დო უკულ ამერიკაშა.

ამერიკას, ბლოხი 1934 წანაშე მუშენდჷ სტენფორდიშ უნივერსიტეტის. 1938 წანაშე - კალიფორნიაშ უნივერსიტეტის. ჸათაქ თიში რკვიებეფი ორხველუდჷ ნეიტრონიშ ჭაჭმენტური მომენტიშ დოდგინას, 37 ინჩიანი ციკლოტრონიშ გჷმორინაფათ. 1939 წანას ბლოხიქ მიპალუ ამერიკაშ მენოღალობა.

მაჟირა მოსოფელიშ ლჷმაშ ბორჯის ოკათუდჷ მანჰეტენიშ პროექტის დო მუშენდჷ ლოს-ალამოსიშ ერუანული ლაბორატორიას, ნამუთ მალას ქიდიტუ დო გინილჷ ჰარვარდიშ უნივერსიტეტიშა, სოდეთ ხემანჯღვერენდჷ რადარიშ პროექტის. 1954-1955 წანეფს ბლოხი რდჷ გვირზილური რკვიებეფიშ ევროპული ორგანიზაციაშ გენერალური დირექტორი.

რესურსეფი ინტერნეტის

• ფელიქს ბლოხი ენციკლოპედია ბრიტანიკას
• ფელიქს ბლოხი Nobelprize.org-ის