ჟორჟ კიუვიე

ვიკიპედიაშე
ჟორჟ კიუვიე
ფრანგ. Georges Cuvier
დაბადებაშ თარიღი:

23 მარაშინათუთა, 1769

დაბადებაშ აბანი:

მონბელიარი, ვიურტემბერგიშ ოჰერცოგე, საღორონთო რომიშ იმპერია (ასეიან დუ, საფრანგეთი)

ღურაშ თარიღი:

მესი 13, 1832 (62 წანერი)

ღურაშ აბანი:

პარიზი, საფრანგეთიშ ომაფე

მენოღალობა:

საფრანგეთიშ შილა საფრანგეთი

ომენცარე სფერო:

ორთაშობური ისტორია, პალეონტოლოგია, ანატომია, ზოოლოგია

სამუშაშ აბანი :

ორთაშობური ისტორიაშ ერუანული მუზეუმი
კოლეჯ დე ფრანსი

ჯილდოეფი დო პრემიეფი:

ლონდონიშ ომაფე ჯარალუაშ ურცხოალი მაკათური
საფრანგეთიშ მენცარობეფიშ აკადემიაშ მაკათური
საპატიო ლეგიონიშ ორდენიშ დიდი ოფიცერი (1826)

ჟან ლეოპოლდ ნიკოლა ფრედერიკ კიუვიე (ფრანგ. Jean Léopold Nicolas Frédéric Cuvier; უმოსო შინელი რე მუჭოთ ჟორჟ კიუვიე, ფრანგ. Georges Cuvier; დ. 23 მარაშინათუთა, 1769, მონბელიარი, ვიურტემბერგიშ ოჰერცოგე, საღორონთო რომიშ იმპერია (ასეიან დუ, საფრანგეთი) — ღ. 13 მესი, 1832, პარიზი, საფრანგეთიშ ომაფე) — ფრანგი ნატურალისტი, ზოოლოგი, ფშხირას მიშინუანა მუჭოთ პალეონტოლოგიაშ მუმას. კიუვიე რდჷ ორთაშობური მენცარობეფიშ ართ-ართი უდიდაში ფიგურა, XIX ოშწანურას. თიში მენცარულ რკვიებეფქ მიშეღჷ დიდი თია დარებადი ანატომიაშ დო პალეონტოლოგიაშ დისციპლინეფიშ დორსხუაფაშა დო გოვითარაფაშა.

კიუვიექ დარსხუ გაგაჩამეფიშ პალეონტოლოგია, გაფართინუ ლინეშ სისტემა, კლასეფიშ ტიპეფო დორთუალათ დო კლასიფიკაციაშა ნამარხეფიშ დო თელი ორგანიზმეფიშ მიშაღალათ. კიუვიექ, გინოშენება, ეშაჭყვადუა დარსხუ მუჭოთ ფაქტი. კიუვიშ პერიოდიშ მენცარეფს ორგანიზმეფიშ გინოშენება სპეკულაციეფო მითმიოჩქუდეს.

1813 წანაშ მენცარულ სტატიას "დიხაუჩაშ თეორია", კიუვიექ წჷმარინუ თეორია, ნამუშ მეჯინათ გვარობეფი ეშმაჭყორდუდჷ პერიოდული, კატასტროფული წყარალათ. ჸათე იდეაშ პოპულარიზაციათ, კიუვიექ გინირთჷ კატასტროფიზმიშ თეორიაშ პროპონენტო.

კიუვიექ, ალექსანდრ ბრონიარიწკჷმა ართო, გიმირკვიუ გეოლოგიური რეგიონი პარიზიშ აუზი. ჸათე რკვიებეფს უკულ გიარსხუ ბიოსტრატიგრაფიაშ თარი პრინციპეფიშ გოვითარაფაქ.

ჟორჟ კიუვიექ დანტკიცჷ ნამდა სპილოშ მანგური ჩხოლარიშ ძვალეფი, ნამუეფქჷთ ოორუე ამერიკას იძირუნჷ, რდჷ მასტოდონტიშ დო ჩონჩხი, ნამუქჷთ ასეიან არგენტინაშ ტერიტორიას იძირუნჷ, რდჷ მეგათერიუმიშ.

კიუვიე რდჷ ართ-ართი პირველი მენცარი, ნამუქჷთ წჷმარინუ იდეა, ნამუშ მეჯინათ პრეისტორიული დიხაუჩაშ დომინანტური ორგანიზმეფი რდეს ქვერქვენწეფი დო ვართ ბჟაშუმუეფი.

ჟორჟ კიუვიე რდჷ ევოლუციაშ თეორიაშ ოპონენტი.

კიუვიექ ღურუ 1832 წანაშ 13 მესის, ქოლერათ. კიუვიექ დიდი გოლინა იღვენუ ლუი აგასისიშ დო რიჩარდ ოუენიშ მენცარული რკვიებეფიშა. კიუვიე ართ-ართიე 72 მენცარიშე ნამუშ ჯოხოთ მიკოჭარილი რე ეიფელიშ ჸორშიშ ფასადის.

რესურსეფი ინტერნეტის[რედაქტირაფა | წყუშ რედაქტირაფა]

ვიკიოწკარუეს? რე ხასჷლა თემაშენ: