როჯერ ბეკონი

როჯერ ბეკონი
	როჯერ ბეკონი
	ინგლ. ‎Roger Bacon
	; როჯერ ბეკონიშ ნოჭახნაკუ ოქსფორდიშ უნივერსიტეტიშ მუზეუმს
დაბადებაშ თარიღი:	დოხოლაფირო 1219 ვარდა 1220
დაბადებაშ აბანი:	ილჩეტერიშ გოხოლუას, სომერსეტი, ინგლისი
ღურაშ თარიღი:	დოხოლაფირო 1292 (72/73 წანერი)
ღურაშ აბანი:	ოქსფორდიშ გოხოლუას, ოქსფორდშირი, ინგლისი
მენოღალობა:	ინგლისიშ ომაფე
ომენცარე სფერო:	თეოლოგია; ნატურფილოსოფია
სამუშაშ აბანი :	ოქსფორდიშ უნივერსიტეტი; პარიზიშ უნივერსიტეტი
ალმა-მატერი:	ოქსფორდიშ უნივერსიტეტი
ომენცარე ხემანჯღვერი:	რობერტ გროსეტესტი

როჯერ ბეკონი (ინგლ. Roger Bacon; დ. დოხოლაფირო 1219 ვარ-და 1220, ილჩეტერიშ გოხოლუას, სომერსეტი, ინგლისი — ღ. დოხოლ. 1292, ოქსფორდიშ გოხოლუას, ოქსფორდშირი, ინგლისი) — ინგლისარი მენცარი, ფილოსოფოსი.

როჯერ ბეკონი გურაფულენდჷ ოქსფორდიშ უნივერსიტეტის, სოდეთ მიპალჷ მაგისტრიშ ხარისხი. გურაფაშ თებაშ უკული მუშენდჷ პარიზიშ უნივერსიტეტის, სოდეთ თინა ოგურუანდჷ ლათინურ გრამატიკას, არისტოტელეშ ლოგიკას, არითმეტიკას, გეომეტრიას, ასტრონომიაშ მათემატიკურ ასპექტეფს დო მუსიკაშ თეორიას. 1247 წანას ბეკონქ პარიზიშ უნივერსიტეტი ქჷდიტუ დო უკულ მალას ბრიტანეთშა დირთჷ. 1250-იან წანეფშე მუშენდჷ ოქსფორდის. 1256 (ვარ-და 1257) წანას გინირთჷ ფრანცისკანარეფიშ ორდენიშ პაპათ.

როჯერ ბეკონი რდჷ ართ-ართი პირველი ფილოსოფოსი, ნამუთ მენცარული მეთოდიშ ადვოკატი რდჷ. ბეკონი რდჷ ორთაშ რკვიებეფიშ პროპონენტი ემპირიზმიშ გჷმორინაფათ. ბეკონი ირკვიენდჷ არისტოტელეშ მენცარულ ნახანდეფს იბნ ალ-ჰაისამიშ ემპირიული მეთოდეფით.

როჯერ ბეკონიშ არძაშე უმოსო შანულამი ნახანდი რე "Opus Majus", ნამუთ რე ლათინურ ნინაშა ჭარილი. ათე ნახანდი იკათუანს 878 ხასჷლას დო ეთმეჭარჷნს ორთაშობური მენცარობეფიშ ანდა ოკითხირეეფს, ლოგიკათ დოჭყაფილი ფილოსოფიათ თებული.

როჯერ ბეკონი რდჷ პირველი ევროპალი ნამუქჷთ ეჭარჷ დენთიშ სტრუქტურული ფორმულა.

ბეკონიშ რკვიებეფიშ გაულათ დითირჷ შქა ოშწანურეფიშ უნივერსიტეტიშ კურიკულუმქ დო ტრადიციულ კვადრივიუმს გიაძინჷ ოპტიკაქ.