სოხუმიშ დონთხაფა

ვიკიპედიაშე

სოხუმიშ დონთხაფაქორთულ-აფხაზური აკოანჯარაფილი კონფლიქტიშ (1992-93) ეკონია, გჷნმაჭყვიდირალი ბურჯაფი, ნამუსჷთ შედეგო ქორთუეფიშ ართ-ართი უდიდაში მარცხიქ მაჸუნჷ საქორთუოშ უახალაშ ისტორიას. კონფლიქტი, ნამუთ 13 თუთას დო 13 დღას იგჷნძორებუდჷ მიშჷ ქორთულ ოთარობე ჯარეფს დო აფხაზ სეპარატისტეფიშ ნძალეფს შქას, ნამუეფსჷთ თაშნეშე ალურედეს ოორუე კავკაციაშე დაქირებული მალჷმორეფი, კაზაკეფიშ მილიციაშ ნასვარეფი დო ვარაოფიციალურო, გუდაუთას რინელი რუსეთიშ ოურდუმე ბაზაშ ნასვარა.

სოხუმიშო გჷნმაჭყვიდირე ბურჯაფის წჷმი აწოჸუნდჷ აპიჯალა დაჩხირიშ მეჭყორიდაფა ოურდუმე ტექნიკაშ კონფლიქტიშ ზონაშე გიშაჸონაფაშ გეშა, ნამუქჷთ სოჭის დიდვინჷ 27 კვირკვეს ჟირ კუნთხუს შქას. აპიჯალაქ 16 ეკენიაშახ გეგჷნძორჷ. თე დღას სეპარატისტეფქ აპიჯალა აკარღვეს დო ფართომასშტაბამი მიანტუეს სოხუმს ზუღაშე, ჰეერშე დო სქირონაშ მიორინალეფშე. აპიჯალაშ მეჯინათ, საქორთუოს თი ბორჯიშო მონკა აკოანჯარაფაშ დიდი ნორთი კონფლიქტიშ ზონაშე უკვე გიშაჸონაფილი აფუდჷ. გარღვინჯებული ბურჯაფეფი 27 ეკენიაშახ იგჷნძორებუდჷ, მარა მასიურ ჩიჩხაფის დაღარი აკოანჯარაფათ ქორთულ ნორთეფქ ვაგურძეს დო ნოღაქ საბოლათ ქჷდანთხჷ.

ნოღაშ ეჭოფუაშ უკული მიშლირჷ სეპარატისტ მალჷმორეფქ დოსქილადირი მახორობაშ უძირაფუ ჟილიტუა მანწყუეს. აბანური თარობაშ მაკათურეფი, ჟიული შარტავა, გურამ გაბისკირია დო რაულ ეშბა, ნამუეფქჷთ რტებაშენ ვარი თქუესჷნ, თარობაშ ჸუდეშ წჷმი დორხვეს, ალექსანდრე ბერულავაქ — უშარ-უკარეთ მედინჷ. მუსხირენ დღაშა სეპარატისტულ ნძალეფქ აფხაზეთიშ დახე ედომუშამი ტერიტორია გეჭოფეს (კოდორიშ ლეხერიშ მოხ).

საქორთუოშ აკოანჯარაფილი ნძალეფიშ რსული მარცხის რეგიონს ქორთული მახორობაშ ეთნიკური წიმინდუაქ მაჸუნჷ. გინოსქილადირი 250 000-შე უმოსი ეთნიკურო ქორთუქ, ბერძენქ დო შხვა უჭიჭაშობეფქ აფხაზეთიშე ლტოლვილ-რაჸილო გჷნირთჷ.

თაშნეშე ქოძირით[რედაქტირაფა | წყუშ რედაქტირაფა]

ლიტერატურა[რედაქტირაფა | წყუშ რედაქტირაფა]

რესურსეფი ინტერნეტის[რედაქტირაფა | წყუშ რედაქტირაფა]