სქესობური რზათ გინმადვალუ ინფექციეფი
სქესობური რზათ გინმადვალუ ინფექციეფი (სრგი), კჷნე ვენერიული ლახარეფი — ინფექცია, ნამუთ გინიდვალუაფუ ართი ადამიერიშე მაჟირაშა სქეაობური კონტაქტიშ/წორორინაშ ბორჯის. ასეშო ჩინებული რე 30-შე უმოსი სრგი, თინეფშე არძაშე უმოსო მოდვალირი რე სიფილისი, გონორეა (ტრიპერი), ტრიქომონიაზი, ქლამიდიოზი, გენიტალური ჰერპესი, გენიტალური მეჭეჭი, მიკოპლაზმოზი, სოკოამი ინფექცია, აივ/შიდსი დო შხვა.
სიმპტომეფი
[რედაქტირაფა | წყუშ რედაქტირაფა]სრგი-ეფიშ უმენტაშობა დოინფიცირაფაშე 3-10 დღაშა მუკარჩქინანს სიმპტომეფს დო თინეფი შხვადოშხვანერო მუკმურჩქინდჷ ოსურეფს დო ქომოლკოჩეფს[1]. არძაშე შხირ სიმპტომეფს შქას რე:
- ჭუაშ გინაფა დოფსუმაშის;
- სიჭითარე სასქესე ორგანოეფიშ მუკი-მუკი;
- გიმორღვაფა სასქესე ორგანოეფს, კანს დო ცქირცქამ დაცხეფს — სამანგათ, პიჯიშ გვამს, თარაგუდას;
- გუმნაველი;
- ჩამინი;
- ჭუა ქვარაშ გიმენ არანს.
ეშანილი სიმპტომეფიშ ჸოფა ობაღე სამანჯელი რე, ექიმს უწაიათ მუკართათინ.
გინოდვალაშ რზეფი
[რედაქტირაფა | წყუშ რედაქტირაფა]გინმიდვალუაფუ არძა სახეშ სქესობური კონტაქტით – ჰეტეროსექსუალური, ჰომოსექსუალური (ანალური, ვაგინალური, ორალური). შილებე ადამიერქ დეინფიცირას ოჸოფარინე რზათ (სამანგ. დოინფიცირაფილიშ ნორჩალობაშ, სარწყეშ ხვარებათ), სამანგათ, გინოდვალაშ თე რზა ოშა-გოშა რე. შილებე სრგი-შ გინოდვალა ვაგინალური ანუ ქომოლკოჩიშ სასქესე ორგანოშ თარაგუდაშა მიშანჭაფათ; ანალური ანუ ქომოლკოჩიშ სასქესე ორგანოშ დახვენჯიშ დუდიშ გვამშა მიშანჭაფათ; ორალური; დალახებული ნანაშე ერჩქიშა უხენობაშ, ბადებაშ ვარ-და კიდირით ჩამაშ ბორჯის.
დო ომანგე კურნალუა ვა რე მანჯაფილი-და, სრგი-შ მალობა განწეხანიშ დო რეღმაშობური რე, შხირას გალენური შანეფიშ უმუშო. დო ადამიერქ დეინგიცირჷ ნამდგა სახეშ სრგი-თ-და, მუშითკურნალუა უშულებუ რე, ანუ სპეციალური კურნალუაშ უმუშო ადამიერი მუშით ვამკმოსქიდჷ.
მუთ უმოს ორდოშე მიკართუ დოინფიცირაფილი ადამიერი ექიმსინ, თით უმოს ლექინი რე სქილადა დო მუთ შანულამი რე, დუდშე იჸუაფუ აღებული შხვადოშხვა გაბანძღებეფი, ნამუქჷთ შილებე მაჸუნას სრგი-ს.
გაბანძღებეფი
[რედაქტირაფა | წყუშ რედაქტირაფა]სქესობური რზათ გინმადვალუ ინფექციეფი მინშა ფულირო მეურს ანუ ადამიერი ვაგინაფულენს, ნამჷ-და თინა დოინფიცირაფილი რე ნამდგაინ კონკრეტული ლახარათინ. შანეფი მუკმორჩქინდუ უკვე გაბანძღებეფიშ პერიოდის. ლახარაქ შილებე გეგნორთას ქრონიკულ სტადიაშა, ნამუთ აბანძღენს კურნალუას, ლახარაქ შილებე გეგნორთას ბჟღერ–სასქესე სისტემაშა დო გეგმიჭანუას ანთებური ლახარეფი, იმპოტენცია მუჭოთ ოსურეფს, თეში ქომოლკოჩეფს, შილებე გჷნირთას უსქეობაშ თარ სამანჯელო, ნამუთ გინეკოლოგიური პრობლემეფიშ 40%-ის აკმადგინანს, ნამუეფჷთ ოხვილჷნა სტაციონარული კურნალუას (გინეკოლოგიური ლახარა, უხენობაშ მეჭყორიდუა, სასქუოგალე უხენობა დო თ.უ.) წჷმარინუანს აივ-იშ დო B ჰეპატიტიშ გინოდვალაშ ართ-ართ რისკ-ფაქტორს.
მუშით კურნალუა ხვალე გაბანძღენს დგომარობას.
დუდთხილუაშ მორსხეფი
[რედაქტირაფა | წყუშ რედაქტირაფა]- ირო ართი სქესობური პარტნიორიშ ჸვენა;
- პრეზერვატივიშ გიმორინაფა არძა სახეშ ნამდგა სქესობური კონტაქტიშის;
- პარტნიორეფიშ ართო კურნალუა, შხვა შვანს კურნალუას მუთუნნერი შედეგი ვაღვენუ;
- კურნალუაშ თებაშახ სქესობური კონტაქტიშე დუდიშ აღება ვარ-და კონდომიშ გიმორინაფა ირ სქესობურ კონტაქტიშის.
რესურსეფი ინტერნეტის
[რედაქტირაფა | წყუშ რედაქტირაფა]- CDC Sexually Transmitted Diseases Treatment Guidelines, 2010
- Sexually Transmitted Diseases Treatment Guidelines - 2006
- STD photo library Archived 2010-07-21 ვებ-ხასჷლას Wayback Machine.
- UNFPA: Breaking the Cycle of Sexually Transmitted Infections
- Sexually Transmitted Infections
- STDs In Color: Sexually Transmitted Disease Facts and Photos