შინდლერიშ ერკებული

ვიკიპედია-შე
გეგნორთი: ნავიგაცია, გორუა
შინდლერიშ ერკებული
ჟანრი:

დრამატული ფილმი

რეჟისორი:

სტივენ სპილბერგი

დუმადგჷმალი რეჟისორი:

ფრენკ დარაბონტი

პროდიუსერი:

სტივენ სპილბერგი
ჯერალდ მოლენი
ბრანკო ლუსტიგი

სცენარიშ ავტორი:

სტივენ ზეილიანი

თარ როლეფს:

ლიამ ნისონი
ბენ კინგსლი
რეიფ ფაინზი

კომპოზიტორი:

ჯონ უილიამსი

მუსიკა:

ტომას ნიუმენი

მონტაჟი:

მაიკლ კანი

ხანტუ:

ალან სტარსკი, ევა ბრაუნი

გჷშულაშ თარიღი:

1993

ხანგჷნძარალა:

195 წნ

ქიანა

ააშ

ნინა:

ინგლისური

მუშნალი:

$


შინდლერიშ ერკებული (ინგლ. Schindler's List) — 1993 წანას გინოღალირი ეპიკური ამერიკული დრამა, ნამჷშ რეჟისორი რე სტივენ სპილბერგი, სცენარიშ ავტორი სტივენ ზეილიანი. ფილმი დორსხუაფილი რე ავსტრალიარი ჭარუშ, თომას კენილიშ რომანს ჯოხოთ „შინდლერიშ კიდობანი“. ფილმის ესახილი რე გერჩქინათ გერმანალი ბიზნესმენიშ, ოსკარ შინდლერიშ რინა, ნამჷქჷთ მახერხჷ დო ვითოშშე უმოს ურია თხოზინელს, ნამუეფიშ უმენტაშობას პოლონეთის დოხორელი ებრაელეფი ოკათუდესჷნ, ქატუ რინა დო ირსხჷ ჰოლოკოსტიშე თით, ნამდა თინეფი დასაქვარჷ მუში საწარმოს.

ფილმის, შინდლერს ასახიერენს არტისტი ლიამ ნისონი, შუცშტაფელიშ („სს“) ოფიცერს, ამონ გეთისრეიფ ფაინზი, იცჰაკ შტერნიშ როლს არსულენს ბენ კინგსლი.

იდეაქ ფილმიშ გინოღალაშ გეშა გორჩქინდჷ დიო ხოლო 1963 წანას. ართ-ართი გინოსქილადირ ურიაქ, პოლდეკ პრეფერბერგიქ ღანკო დისახჷ ჯარალუაშო უჩინებაფუდუკო შინდლერიშ გეშა. გვალო თიქ გინირთჷ უკული ავსტრალიარი ჭარუშ, თომას კენილიშ არზებაშ წყუ უჭარუდუკო ბუკერიშ პრემიაშ გომორძგვილი წინგი ჯოხოთ „შინდლერიშ კიდობანი“, ნამჷქჷთ უკული ფილმის გიადჷ ოსხირო.

მუჟამჷსჷთ სპილბერგის ხემანჯღვერქ სიდნი შეინბერგიქ წინგიშ ჯოხოთ „შინდლერიშ კიდობანიშ“ გინაჯინალი მეუჯღონჷნ, რეჟისორი ათე ამბექ დაინტერესჷ. ათეშენ Universal Studios-ქ იჸიდჷ წინგიწკჷმა მერცხუაფილი ოავტორე ნება. მორო სპილბერგი ვარდჷ დარწუმებულიმ ნამდა მუს შეიალებედუო დო ვარი ათე ნაწარმოებიშ ეკრანიზაცია. მაართა ეტაპის თიქ მუსხირენ რეჟისორწკჷმა ცადჷ მორაგადაფა თინეფს გეუჭოფდესკო ნაწარმებიშ ეკრანიზაცია, მორო საბოლათ იშენ გინოჭყვიდჷ მუს გინუღალუდკონ.

ჯინჯიერი გინაღალარი აკანი რდჷ პოლონეთის, კრაკოვს, 72 დღაშე უმოსი ხანით. სპილბერგიქ გინოჭყვიდჷ ფილმი გინუღალუდკო უჩა-ჩე ფერეფს, მუთით თიქ თი ეპოქაშ ბორჯულ სურათის მიახოლჷ დო დოკუმენტური კადრეფიცალა ეფექტი ქიმინჷ.

ფილმიშ პრემიერქ იყუ 1993 წანაშ 30 გერგობათუთას ვაშინგტონს, დუდიშული გიმოჩამაშა გიტინჷ 1993 წანაშ 15 ქირსეთუთას აკოართაფილ შტატეფს. კინოგაქირაფას, ფილმიქ მოსოფელიშ მასშტაბით გიმიმუშუ 321.2 მილიონი დოლარი, მუჟამსჷთ თიში ბიუჯეტი აკადგინანდჷ 22 მილიონს. თიქ მიპალუ 7 ოსკარი (12 ნომინაციაშე). ხოლო, მეღებული აფჷ მიარე ჯილდო (თინეფ შქას შკვითი ჯილდო ბრიტანული აკადემიაშ ფილმეფიშ დოჯილდაფას დო სუმი — ორქოშ გლობუსის). 2004 წანას კონგრესიშ ბიბლიოთეკაქ „შინდლერიშ ერკებული“ დარეგისტრირჷ ფილმეფიშ ერუანულ რეესტრის.

ფილმის მეღებული აფჷ შკვითი ოსკარი (თინეფ შქას საუჯგუშო ფილმიშო) 1993 წანას. ფილმიშ სლოგანი რე: „თინა მით ართ შურს გინასქილიდუანსჷნ, გინასქილიდუანს მოსოფელს“.

სიუჟეტი[რედაქტირაფა | წყუშ რედაქტირაფა]

ფილმის მოთხობელი რე კათოლიკე გერმანალი ბიზნესმენიშ, ნაცისტური პარტიაშ მაკათურიშ, ოსკარ შინდლერიშ ისტორია, ნამჷქჷთ ვითოშიშე უმოსი პოლონარი ურია გინასქილიდუ ჰოლოკოსტიშ ბორჯის. ერკებულს ითოლწონებჷ 1100 ურია, ნამჷეფით შინდლერქ დექირუ მუში ფაბრიკაშო, თიშენ ნამდა თინეფი ოკონცენტრაციე ბანაკიშ ჯღონაშე გინუსქილუაფუდუკონ.

ჯილდოეფი[რედაქტირაფა | წყუშ რედაქტირაფა]

ოსკარი

BAFTA

ორქოშ გლობუსი

რესურსეფი ინტერნეტის[რედაქტირაფა | წყუშ რედაქტირაფა]

Commons-logo.svg
ვიკიოწკარუეს? რე ხასჷლა თემაშენ:

სქოლიო[რედაქტირაფა | წყუშ რედაქტირაფა]

Applications-multimedia.svg კინოშ პორტალი – ქოძირით ვიკიპედიაშ შხვა სტატიეფი კინოშ გეშა.