ჭკობაჩორქოამეფი (Artiodactyla) — ბჟაშუმუეფიშ რანწკიშ ჩხოლარი. ირ კუჩხის 2 ვარდა 4 კითი უღჷნა. კითეფიშ ბოლო ფალანგეფი ფორილი რე ჩორქოეფით. ლაბერწი ვაუღჷნა. ჭკობაჩორქოამეფიშ თარი კიბირეფი მერგეშელი რე ოჩირქოლაი ჩანარული ოჭკომალიშ რანძგუას. ყია უმენტაშობას რთული უღუ (ერემი, ჩხოუ), ოშა-გოშათ — ლექინი (ღეჯი). გოფაჩილი რენა არძა კონტინენტის ანტარქტიდაშ მოხ (ავსტრალიაშა ჭკობაჩორქოამეფი ადამიერქ მიშეჸონჷ). ჭკომჷნა ჩანარობას, ღეჯეფიშ მოხ, ნამუეფით ირიშმაჭკომალი რენა. რანწკის გოართოიანაფილი რე 2 გიმენრანწკი: ვამანკორალეფი (Nonruminantia) დო მანკორალეფი (Ruminantia). მაართშა მიშმურს 3 ფანიაშ 12 გვარობა, მაჟირაშა — 6 ფანიაშ 180-შახ გვარობა. საქორთუოს მუთმოფხვადჷნა ჭკობაჩორქოამეფიშ 3 ფანიაშ 7 გვარობა. ჭკობაჩორქოამეფს ორხველჷნა ოფუტე-ომეურნე ჩხოლარეფიშ უმენტაშობა: ღეჯი, არქემი, შხუ ქალამი ორინჯი, შხური, თხა.
