ჯეიმს ჯოზეფ სილვესტრი

ვიკიპედიაშე
ჯეიმს ჯოზეფ სილვესტრი
ინგლ. James Joseph Sylvester
დაბადებაშ თარიღი:

3 ეკენია, 1814

დაბადებაშ აბანი:

ლონდონი, ინგლისი

ღურაშ თარიღი:

მელახი 15, 1897 (82 წანერი)

ღურაშ აბანი:

ლონდონი, ინგლისი

მენოღალობა:

გოართოიანაფილი ომაფეშ შილა გოართოიანაფილი ომაფე

ომენცარე სფერო:

მათემატიკა

სამუშაშ აბანი :

ჯონს ჰოპკინსიშ უნივერსიტეტი
ლონდონიშ ოუნივერსიტეტე კოლეჯი
ვირჯინიაშ უნივერსიტეტი
ომაფე ოურდუმე აკადემია (ვულიჯი)
ოქსფორდიშ უნივერსიტეტი

ალმა-მატერი:

კემბრიჯიშ უნივერსიტეტი

ომენცარე ხემანჯღვერი:

აუგუსტუს დე მორგანი

ჯოხოშინელი მოგურაფეეფი:

ჯორჯ ბრიუს ჰალსტედი
ირვინგ სტრინგჰემი
აიზეკ ტოდჰანტერი

ჯილდოეფი დო პრემიეფი:

ომაფე მენდალი (1861)
კოპლიშ მენდალი (1880)
დე მორგანიშ მენდალი (1887)

ჯეიმს ჯოზეფ სილვესტრი (ინგლ. James Joseph Sylvester; დ. 3 ეკენია, 1814, ლონდონი, ინგლისი — ღ. 15 მელახი, 1897, ლონდონი, ინგლისი) — ინგლისარი მათემატიკოსი.

ბიოგრაფია დო მენცარული რკვიებეფი[რედაქტირაფა | წყუშ რედაქტირაფა]

ჯეიმს ჯოზეფ სილვესტრიქ დებადჷ 1814 წანაშ 3 ეკენიას, ურიეფიშ ფანიას. გურაფულენდჷ ლონდონიშ უნივერსიტეტის, აუგუსტუს დე მორგანიშ ხემანჯღვერობათ. უკულ გურაფა გაგინძორჷ კემბრიჯიშ უნივერსიტეტიშ სენტ-ჯონიშ კოლეჯის. გურაფაშ თებაშ უკული სილვესტრი მუშენდჷ ლონდონიშ ოუნივერსიტეტე კოლეჯის ორთაშობური ფილოსოფიაშ პროფესორო. 1841 წანას სილვესტრიქ მიპალუ მენცარობაშ მაგისტრიშ ხარისხი (დუბლინიშ უნივერსიტეტის) დო მალას ოცხოვრებშა დო ომუშებუშა ამერიკაშა მიდართჷ. ამერიკას სილვესტრიქ იმუშუ ვირჯინიაშ უნივერსიტეტის, სოდეთ რდჷ მათემატიკაშ პროფესორი. ვირჯინიაშ უნივერსიტეტის სილვესტრიქ ხვალე 4 თუთას იმუშუ. ართ-ართი მუში სტუდენტიწკჷმა კონფლიქტური ინციდენტიშ გეშა, ვირჯინიაშ უნივერსიტეტი ქიდიტუ დო ნიუ-იორკიშა გეგნორთჷ. ნიუ-იორკის სილვესტრის მუშობაქ ვადაჭყინჷ დო მალას კინ ინგლისიშა დირთჷ. ინგლისიშა დორთინაშ უკულ იმუშუ ართ-ართი იურიდიულ კომპანიას. 1855-1869 წანეფს სილვესტრი მუშენდჷ ომაფე ოურდუმე აკადემიას (ვულიჯი). 1876 წანას სილვესტრიქ კინ ამერიკაშა მიდართჷ დო მუშობა ქიდიჭყჷ ჯონ ჰოპკინსიშ უნივერსიტეტის, მათემატიკაშ პროფესორო. ჸათაქ სილვესტრიქ 1883 წანაშა იმუშუ. თე წანას სილვესტრიქ ინგლისიშა დირთჷ დო კარიერა გაგინძორჷ ოქსფორდიშ უნივერსიტეტის, სოდეთ ღურაშახ მუშენდჷ.

ჯეიმს ჯოზეფ სილვესტრიქ მიშეღჷ დიდი მენცარული კონტრიბუცია მატრიცაშ თეორიაშ, ინვარიანტეფიშ თეორიაშ, რიცხუეფიშ თეორიაშ, ნატურალური რიცხუშ გორთუალაშ თეორიაშ დო კომბინატორიკაშ გოვითარაფაშა. სილვესტრიქ ხვარებაშა მიშეღჷ შხვადოშხვა მათემატიკური ტერმინეფი: "მატრიცა", "გრაფა", "დისკრიმინანტი". 1878 წანას, ჯონ ჰოპკინსიშ უნივერსიტეტის მუშობაშ ბორჯის, სილვესტრიქ დარსხუ მათემატიკაშ ამერიკული ჟურნალი. ჯეიმს ჯოზეფ სილვესტრი რდჷ ლონდონიშ ომაფე ჯარალუაშ მაკათური დო შხვადოშხვა ჯილდოეფიშ დო პრემიეფიშ ლაურეატი. ომაფე ჯარალუაქ 1901 წანას დარსხუ სილვესტრიშ ჯოხონობაშ მენდალი.

რესურსეფი ინტერნეტის[რედაქტირაფა | წყუშ რედაქტირაფა]