ჯონ ჰოვარდ ნორთროპი

ჯონ ჰოვარდ ნორთროპი
	ჯონ ჰოვარდ ნორთროპი
	ინგლ. John Howard Northrop
დაბადებაშ თარიღი:	5 კვირკვე, 1891
დაბადებაშ აბანი:	იონკერსი, ნიუ-იორკიშ შტატი, ააშ
ღურაშ თარიღი:	მესი 27, 1987 (95 წანერი)
ღურაშ აბანი:	ვიკენბერგი, არიზონა, ააშ
მენოღალობა:	ააშ
ომენცარე სფერო:	ბიოქიმია
სამუშაშ აბანი :	კალიფორნიაშ უნივერსიტეტი (ბერკლი); კოლუმბიაშ უნივერსიტეტი; როკფელერიშ უნივერსიტეტი
ალმა-მატერი:	კოლუმბიაშ უნივერსიტეტი
ჯილდოეფი დო პრემიეფი:	ნობელიშ პრემია ქიმიას (1946); დანიელ ჟირო ელიოტიშ მენდალი (1939)

ჯონ ჰოვარდ ნორთროპი (ინგლ. John Howard Northrop; დ. 5 კვირკვე, 1891, იონკერსი, ნიუ-იორკიშ შტატი, ააშ — ღ. 27 მესი, 1987, ვიკენბერგი, არიზონა, ააშ) — ამერიკალი ბიოქიმიკოსი. ფერმენტეფიშ, ცილეფიშ დო ვირუსეფიშ დოგურაფაშ, იზოლაციაშ დო კრისტალიზაციაშ გეშა, გინოჩეს ნობელიშ პრემია ქიმიაშ დარგის 1946 წანას (ჯეიმს სამნერი დო უენდელ მერედით სტენლიწკჷმა ართო). ნორთროპი რდჷ კალიფორნიაშ უნივერსიტეტიშ (ბერკლი) ბაქტერიოლოგიაშ დო სამედიცინო ფიზიკაშ პროფესორი.

ბიოგრაფია

ჯონ ჰოვარდ ნორთროპიქ დებადჷ 1891 წანაშ 5 კვირკვეს, ზოოლოგიშ, კოლუმბიაშ უნივერსიტეტიშ ინსტრუქტორიშ ჯონ ნორთროპიშ დო ჰანტერიშ კოლეჯიშ ბოტანიკოსიშ ელის ნორთროპიშ ფანიას. ჯონ ჰოვარდ ნორთროპიშ დაბადებაშა ჟირ მარათ ადრე, ჯონიშ მუმა ლაბორატორიას აფეთქებე დო დოღურე. ჯონ ჰოვარდ ნორთროპი გურაფულენდჷ იონკერსიშ სკოლას, უკულ კოლუმბიაშ უნივერსიტეტის, სოდეთ თხილუ ოდოქტორე დისერტაცია ქიმიას, 1915 წანას. მაართა მოსოფელიშ ლჷმაშ პერიოდის გურაფულენდჷ აცეტონიშ დო ეთანოლიშ ფერმენტიზაციაშ პროცესის. 1929 წანას ნორთროპიქ აკეთჷ ფერმენტი პეპსინიშ იზოლაცია დო კრისტალიზაცია. 1939 წანას ნორთროპიქ აკეთჷ ბაქტერიოფაგიშ იზოლაცია დო კრისტალიზაცია. ნორთროპიქ აკეთჷ პეპსინოგენიშ, ტრიფსინიშ, ქიმოტრიფსინიშ დო კარბოქსიპეპტიდაზიშ იზოლაცია დო კრისტალიზაცია. 1949 წანაშე ნორთროპი რდჷ ამერიკაშ ხელუანობაშ დო მენცარობაშ ერუანული აკადემიაშ მაკათური. მუშენდჷ კალიფორნიაშ უნივერსიტეტის (ბერკლი), კოლუმბიაშ უნივერსიტეტის დო როკფელერიშ უნივერსიტეტის.

პერსონალური რინა

ჯონ ჰოვარდ ნორთროპიშ ოსური რდჷ ლუიზ უოლკერი (1891-1975), ჸუნდეს ჟირი სკუა: ჯონ ნორთროპი, ნამუთ რდჷ ოკეანოგრაფი დო ელისი, ნამუთ რდჷ ნობელიშ პრემიაშ ლაურეატიშ ფრედერიკ ჩაპმენ რობინსიშ ოსური. ნორთროპეფ დიო ნიუ-იორკის ცხოვრენდეს, უკულ ოცხოვრებშა გეგნორთეს მასაჩუსეტსიშ შტატიშა. ჯონ ჰოვარდ ნორთროპიქ დუდი დიჸვილჷ 1987 წანას, ნოღა ვიკენბერგის, არიზონას.

ლიტერატურა

Herriott, R. M. (1981), "John Howard Northrop", J. Gen. Physiol. 77 (6): 597–9, Jun 1981, doi:10.1085/jgp.77.6.597, PMID 7021760
Herriott, R. M. (1994), "John Howard Northrop: July 5, 1891-May 27, 1987", Biographical Memoirs. National Academy of Sciences (U.S.) 63: 423–50, PMID 11615389, http://www.nap.edu/openbook.php?record_id=4560&page=423

See also this version of Northrop's National Academy of Science biography.

Northrop, J. H. (1939), Crystalline Enzymes, Columbia University Press
Shampo, M A; Kyle, R. A. (2000), "John Northrop--definitive study of enzymes", Mayo Clin. Proc. 75 (3): 254, March 2000, doi:10.4065/75.3.254, PMID 10725951
van Helvoort, T. (1992), "The controversy between John H. Northrop and Max Delbrück on the formation of bacteriophage: bacterial synthesis or autonomous multiplication?", Annals of Science 49 (6): 545–75, November 1992, doi:10.1080/00033799200200451, PMID 11616207

რესურსეფი ინტერნეტის