ანდრეა ბოჩელი

ანდრეა ბოჩელი
	;
ბიოგრაფია
დებადჷ	22 ეკენია, 1958 (66 წანერი)
დაბადებაშ აბანი	; ტოსკანა, იტალია
ჟანრ(ეფ)ი	ალმახანური მუსიკა, კლასიკური მუსიკა, ლათინური პოპი, ოპერა, პოპ მუსიკა
საქვარუა	მუსიკოსი, ობირეშეფიშ ავტორი, პროდიუსერი, მულტი-ინსტრუმენტალისტი
ობირეში ხონარი	ლირიკულ-დრამატული ტენორი
ინსტრუმენტ(ეფ)ი	ვოკალი, კლავიშამი ინსტრუმენტეფი, ფლეიტა, საქსოფონი, საყვირი, ტრომბორნი, არფა, ჰარმონიკა, გიტარა,
აქტიური	1992-ამუდღარშახ
ლეიბლ(ეფ)ი	Universal, Philips, PolyGram, Decca, Sugar
ვებ-ხასჷლა	ოფიციალური ვებ-ხასჷლა

ანდრეა ბოჩელი (იტალ. Andrea Bocelli) (დ. 22 ეკენია, 1958) — იტალიარი ტენორი, მულტი-ინსტრუმენტალისტი. დაბადებაშე თოლს ორკჷდჷნ ფერ მუმალ მურიცხიქ 12 წანაშ ხანს უბედური მონახვამილაშ გეშა გვალო დეჸვერჷ.^[1]

ბიოგრაფია

ბოჩელიქ 1958 წანას, ტოსკანაშ რეგიონს, ჭიჭე ოფუტე ლაჯატიკოს დებადჷ, ნამუთ ნოღა პიზაშე 40 კილომეტრით ობჟათეჸურე იდვალუაფუ. ფანია დიხაშქიმინჯალას მეჸუნდუ. ბოჩელიშ დიდა დო უკულაში ჯიმა ამუდღარშახ ოდაბადურ ოფუტეს ოხორანა. მუამუშიქ 2000 წანას ღურჷ.

ჭიჭე ანდრეა დიდ ინტერესის გჷმირჩქინანდჷ მუსიკაშჸურე — 6 წანაშე მიოგანდჷ ფორტეპიანოს, მოგვიანაფილო ფლეიტა დო საქსაფონი ხოლო ქჷდიგურუ. მუჭოთ დიამუში ეშანჷნსჷნ, მუსიკა აკა მუდგარენი რდჷ, მუთ მუს კომფორტის უქიმინჷნდჷნ.

ოშქაშე სკოლაშ თებაშ უკული, 1980 წანას პიზაშ უნივერსიტეტის ქენირიცხჷ, სოდეთ სამართალს გურაფულენდჷ. ფარაშ გჷმომუშებაშ ღანკით, სერით ბარეფს პიანინოს მიოგანდჷ. ოგურაფუშ თებაშ უკული, 1 წანას სასამართოს მუშენდჷ, სოდეთ 1987 წანას მუქ მუშ მუმალ ალმასქუ ენრიკა გეჩინებაფუ.

თოლსინთეშ დინაფა

ანდრეას დაბადებაშე უღუდჷ ძირაფაწკჷმა მერსხილი პრობლემეფი. მიარე ექიმწკჷმა ვიზიტიშ უკული, საბოლათ დოჸუნაფილი გლაუკომა ქჷდუდგინეს. 1970 წანას, 12 წანაშ ხანს, ოკუჩხბურთე მატჩის მოხვალამირი ინციდენტიშ გეშა ბოჩელიქ თოლსინთე ედომუშამო მიოდინუ.

კარიერა

ანდრეა ბოჩელი ვერონიკა ბერტიწკჷმა ტოკიოს, იაპონიას, 2008 წანას, აზიური ტურნეშ მიმალობაშ ბორჯის

სიჸვერეშ უმკუჯინუო, ბოჩელიქ ალმახანური ოპერაშ ართ-ართი არძაშე მიკაწონაფალ ხონარო გინირთჷ. მუ ართმანგი სიბარჩხალათ არსულენს კლასიკურ რეპერტუარს დო პოპ-ბალადეფს. ინოჭარილი აფუ დუეტეფი სელინ დიონწკჷმა, ეროს რამაზოტიწკჷმა დო თ.უ.

1992 წანას, ჯუკერო (ადელმო ფორნაჩიანი) ობირეშიშ „Miserere“ ინაჭარალო ტენორს გორჷნდჷ. კომპოზიცია ანდრეაქ ლუჩანო პავაროტიწკჷმა ართო ქინაჭარჷ. მოსოფელიშ მასშტაბიშ ტურნეს ბოჩელიქ 1994 წანაშ ეკენიას ლონდონს ოჩეჟქიმინჯალე ფესტივალს „Pavarotti International Festival“ წჷმოძინელო გჷშართჷ.

1995 წანას ანდრეაქ ნიდერლანდეფს, ბელგიას, გერმანიას, ესპანეთის დო საფრანგეთის „Night Of Proms“ დიდი წჷმოძინათ წჷმარინუ. წჷმორინაფას ოკათუდეს: Bryan Ferry, Al Jarreau, Roger Hodgson დო ჯონ მაისი.

მუში მაართა ჟირი ალბომი „Andrea Bocelli“(1994) დო „Bocelli“ (1996) ხვალე ოოპერე არიეფს იკათუანდჷ, მასუმა ფირფიტა - „Italiano“ ოოპერე არიეფით დო ნეაპოლიტანური ობირეშეფით რე ჩინებული. თიშ უმკუჯინუო, ნამუდა თე ფირფიტაქ ხვალე იტალიას გჷშართჷნ, 300 000 ეგზემპლარქ გჷმიჩინჷ.

მაანთხა ალბომი „Romanza“ (1997) უკვე პოპ-მოღეს ხოლო იკათუანდჷ. ჟირი წანაშ უკული მუშ მახუთა ალბომ „Sogno“ გჷშმურს, ნამუშათ სელენ დიონწკჷმა დუეტი „The Prayer“ ხოლო რე მიშულირი. თე კომპოზიციაქ ზოხო სინგლიშ სახეთ ხვალე ამერიკას 10 მილიონ ანგიქ გჷმიჩინჷ, დო მობირეს „გრემიშ“ ჯილდო ქჷმუღჷ. ალბომი „Ciele Di Toscana“ 2001 წანას ძირჷ მარჩქილექ.