გრიგოლ რობაქიძე
| გრიგოლ რობაქიძე | |
|---|---|
| დაბადებაშ თარიღი | 28 გჷმათუთა 1882 |
| დაბადებაშ აბანი | სვირი |
| ღურაშ თარიღი | 19 გერგობათუთა 1962 |
| ღურაშ აბანი | ჟენევა |
| ერუანობა | ქორთუ |
| საქვარუა | ჭარუ, დრამატურგი, პოეტი |
| მიმალუობა | სიმბოლისტი, ცაშფერყანწარი |
გრიგოლ რობაქიძე (დ. 28 გჷმათუთა, 1882, სვირი, ბჟადალ საქორთუო, ღ. 19 გერგობათუთა, 1962, ჟენევა) — ქორთუ ჭარუ, პუბლიცისტი, ოჯარალუ მოღალე, თეხანური ქორთული დო გერმანული ფსიქოლოგიური რომანიშ ართ-ართი დჷმარსხუაფალი.
ბიოგრაფია
[რედაქტირაფა | წყუშ რედაქტირაფა]დებადჷ 1882 წანაშ 28 გჷმათუთას, სვირს, თიწკჷმაიან ქუთეშიშ გუბერნიას. ქუთეშიშ გიმნაზიაშ თებაშ უკული, გურაფულენდჷ ტარტუშ უნივერსიტეტის, (ესტონეთის), უკული ფილოსოფიაშ დოქტორიშ ხარისხით გათუ ლაიფციგიშ უნივერსიტეტი (გერმანია).
1908 წანას გერმანიაშე დირთჷ დო ქორთუ სიმბოლისტეფიშ ართ-ართ ლიდერო გინირთჷ. 1915 წანას რდჷ "ცაშფერყანწარეფიშ" ართ-ართი დჷმარსხუაფალი. თე ლიტერატურულ ბუნაქ, ნამუსჷთ ოკათჷდეს თი ბორჯიშო პროგრესული სიმბოლისტი ჭარუეფი დო პოეტეფი, შანულამი როლი ილაჸაფუ ქორთული სიტყვა-კაზმული ჭარუობაშ უკულიან გავითარებას. 1917 წანას გრიგოლ რობაქიძეშ აქტიური კათაფათ დირსხუ საქორთუოშ ჭარუეფიშ რსხუქ.
საქორთუოშ დემოკრატიული რესპუბლიკაშ წანეფს (1918-1921) რობაქიძე აქტიურო ოკათჷდჷ ზოხორინელი საქორთუოშ ოჯარალუ-პოლიტიკურ დო ლიტერატურულ რინას. მაგალითო, 1919 მუ რდჷ პარიზიშ საშვიდობო კონფერენციას კათაფაშ მიოღებელო ჯღონელი საქორთუოშ ოპარლამენტე დელეგაციაშ მაკათური. თიმ წანას მუშ კათაფათ დირსხუ ქორთულ ლეგაციაქ სტამბოლს.
ბოლშევიკური რუსეთიშე საქორთუოშ ოკუპაციაშ დო ანექსიაშ უკული (1921 წანაშ ფურთუთა-მელახი) რდჷ საქორთუოშ ნაციონალურ-გჷმადუდიშულაფარ ყარაფის, მუშ გეშათ თხოზჷდეს ბოლშევიკურ-კომუნისტური იდეოლოგიაშ წჷმმარინაფალეფი. 1931 წანაშე ღურაშახ რდჷ პლოიტიკური ემიგრანტი. 1946 წანაშახ ოხორანდჷ დო მოღალენდჷ გერმანიას, 1946 წანაშე - შვეიცარიას. რობაქიძე რდჷ ქორთული პოლიტიკური ემიგრაციაშ ართ-ართი გჷშაგორილი მოღალე. 1942 წანას მუშ მოღალობათ დირსხუ ემიგრაციას ქორთუ ტრადიციონალისტეფიშ რსხუქ დო რდჷ თე ორგანიზაციაშ ართ-ართი ლიდერი. ორგანიზაციაშ დუდმახვენჯი რდჷ ევროპას ბაგრატიონეფიშ ჸუდეშ მადუდური ირაკლი ბაგრატიონ-მუხრანელი. რობაქიძე რდჷ ხოლო ანტიბოლშევიკი ნაციეფიშ ლიგაშ ართ-ართი გჷშაგორილი მოღალე.
რობაქიძეშ პროზაშე უდიდაში გოლინა იღვენუ ფრიდრიხ ნიცშეშ ნახანდეფქ. მუშ აკოქიმინჯალას შხვადოშხვა ბორჯის უმაღალაში ფასება მეჩეს შტეფან ცვაიგიქ, რომენ როლანქ, ნიკოს კაზანძაკისიქ დო მოსოფელიშ ლიტერატურაშ შხვა გჷშარჩქინელ წჷმმარინაფალეფქ. რობაქიძე გჷშაგორილი რდჷ ევროპაშ მუდგაზმარენი ლიტერატურული ჯარალუაშ მაკათურო. 1960-იანი წანეფიშ დაჭყაფუს გინოჭყვადილი რდჷ მუში წჷმორინაფა ლიტერატურაშ დარგის ნობელიშ პრემიას, მუქჷთ ვეღოლინჷ ჭარუშ ღურაშ გეშა.
ღურა
[რედაქტირაფა | წყუშ რედაქტირაფა]ჭარუქ 1962 წანაშ 19 გერგობათუთას დოღურჷ ნოღა ჟენევას დო თექინეშეს დასაფულეს. 1976 წანას ქორთუ ემიგრანტეფიშ ნინო დო კალისტრატე სალიეფიშ დუდობათ გინოსვანჯაფილქ იჸუ საფრანგეთშა, ლევილიშ სასაფულეშა. მუში ბინა პოლიციაქ დოლუქჷ, მუშ არქივქ ლიკვიდაციას შვეიცარიალი მაჸალეეფიშ ჭყოლოფათ გინასქიდჷ.
„ჩქიმი ნარტი რე: მუჟამს მა თე ქიანას ვეპუაფუქჷნ, მიშას მიდგა ქორთუ დიდა ირი წანას მცხეთაშა, წიფობაშ, ჩქიმი დაბადებაშ თუთას, სანთელს ეიორზანდას ჭიჭე ოხვამერიშ წოხოლე დო ხვამათ შინანდას ჩქიმ ჯოხოს, მეტის მუთუნს ვაფთხულენქ საქორთუოს."
რესურსეფი ინტერნეტის
[რედაქტირაფა | წყუშ რედაქტირაფა]- გრიგოლ რობაქიძეშ ნახანდეფი Archived 2013-12-31 ვებ-ხასჷლას Wayback Machine. - ner.ge - "ქორთული ლიტერატურაშ დიდი ბიბლიოთეკა"
- ინფორმაცია გრიგოლ რობაქიძეშენი 400.ge-ს[ღურელი რსხილი]
- გრიგოლ რობაქიძეშ ნახანდეფი lib.ge-ს[ღურელი რსხილი]
- ნახანდეფი Archived 2013-12-31 ვებ-ხასჷლას Wayback Machine.
- გრიგოლ რობაქიძეშ რინა, ხანდა, ჭარილეფი, ესსეეფი, გოშინუეფი, ფოტოგალერეა