დიოგენე ლაერტალი
| დიოგენე ლაერტალი | |
 | |
| დაბადებაშ თარიღი: |
დოხოლაფირო 180 |
|---|---|
| ღურაშ თარიღი: |
დოხოლაფირო 240 (60 წანერი) |
| საქვარუა: | |
| Magnum opus: | |
| ნინა: | |
დიოგენე ლაერტალი (ბერძ. Διογένης Λαέρτιος, დ. დოხოლაფირო 180 — ღ. დოხოლაფირო 240) — ბერძენი ფილოსოფოსეფიშ ბიოგრაფი დო ფილოსოფიაშ ისტორიკოსი. შინელი რე ნახანდით გიშარჩქინელი ფილოსოფოსეფიშ რინა დო არზეფი, ნამუთ სერიოზული წყუ რე ანტიკური ბერძენული ფილოსოფიაშ რკვიებაშო. ჸათე ნახანდის ეჭარილიე ჯვეში ბერძენი ფილოსოფოსეფიშ ბიოგრაფიეფი. ნახანდი დორთილი რე ფილოსოფიური სკოლეფიშ მეჯინათ. დიოგენე გიშმართუნს ჟირი სკოლას, ნამუეფსჷთ თინა უძახჷ იონურს დო იტალიურს.
"იონური სკოლა"-შ წჷმმარინაფალეფიშ ბიოგრაფიეფი იჭყაფჷ ანაქსიმანდრეთ დო ითებუ კლიტომაქეთ, თეოფრასტეთ დო ქრისიპეთ. "იტალიური სკოლა" იჭყაფჷ პითაგორათ დო ითებუ ეპიკურეთ. დიოგენეს, სოკრატეშ სკოლა მიშაჸონაფილი აფუ იონური სკოლაშა დო ელეიარეფიშ სკოლა დო პირონისტეფი მიშაჸონაფილი აფუ იტალიური სკოლაშა.
ბრელი თეხანური მენცარი აკრიტიკენს დიოგენეს. მუშენდა დიოგენე ფშხირას ეთმოჭარუნს ტრივიალური ფაქტეფს დო შანულამი ამბეეფი გიშატებულჷ აფუ. მარა დიოგენე ფილოსოფიური მონძღვარუეფიშ მუშობური ინტერპრეტაციას ვართუ. ჸათეშ გეშათ ნახანდის მოჩამილი ფაქტეფი, ხოლოსი რე ჸეთი წყუეფიწკჷმა, ნამუეფსჷთ დიოგენე ირინუანდჷ.
დიოგენეშ ბიოგრაფიაშე ბრელი მუთუნი ვაუჩქუნა. თინა ხოლო ვაუჩქუნა მუშენ უძახუდეს თის ლაერტალს. ართი ვერსიათ დიოგენე დაბადებე ნოღა ლაერტის, ნამუთ კარიაშ რეგიონს იდვალუაფუდჷ. თაშნეშე არსებენს შხვა ვერსია, ნამუშ მეჯინათ ლაერტალი დიოგენეშ მეტჯოხო რე.
მენცარეფი დიოგენეს ეპიკურეიზმიშ წჷმორინაფილო მითმირჩქინანა. მავითა წინგის დიოგენე ოსკვანს ეპიკურეს დო ძალამს თხილანს თიში ფილოსოფიური მონძღვარუას.