დრანდა
საქორთუოშ ოკუპირაფილი ოფუტე
| ოფუტე
დრანდა
|
დრანდა — ოფუტე საქორთუოს, აფხაზეთიშ ავტონომიური რესპუბლიკაშ გულრიფშიშ მუნიციპალიტეტის, თემიშ ცენტრი (ოფუტეეფი: ათარბეკოვკა, ზემო ფშაფი, ქვემო ფშაფი, შაუმიანოვკა). იდვალუაფუ სამურზაყანოშ რზენს, წყარმალუ ჭიჭე კოდორიშ წყარპიჯის, მოლენკავკაციაშ რკინაშარაშ მაგისტრალს დო უჩაზუღაპოიჯიშ რზატკაცილს. ზუღაშ დონეშე 40 მ, გულრიფშიშე 9 კმ., სოხუმიშე 18 კმ. 2008 წანაშე ოკუპირაფილი რე რუსეთიშ ფედერაციაშით.[1]
დრანდაშ ოხვამე
[რედაქტირაფა | წყუშ რედაქტირაფა]ოფუტეს იდვალუაფუ ხურომონძღვარუაშ ძეგლი დრანდაშ ოხვამე. თინა VI-IX ოშწანურეფიშ ძეგლი რე. ქორთუ მენცარი გიორგი ჩუბინაშვილი დრანდას მცხეთაშ ჯვარიშ ართ-ართ ვარიაციათ გჷთმოსხუნუნდუ, სოდე ქორთულ ხანტურულ სმებაწკჷმა ბიზანტიური ხასიათიშ ელემენტეფი რე მესვარილი. შხვა მეჯინათ, დრანდაშ ოხვამექ ბიზანტიაშ იმპერატორ იუსტინიანე კაბეტიშ ზოჯუათ, 551 წანას აკიგჷ დო დუდშე კონსტანტინოპოლიშ ოხვამეშ, აბაზგიაშ ეპარქიაშ დოჸუნალას რდჷ.
VIII ოშწანურას, დრანდა აფხაზეთიშ ანუ ბჟადალი საქორთუოშ საკათალიკოსეშ ეპარქიაშ ცენტრო გჷნირთუ, ნამუთ თაქ XVII ოშწანურაშა რდჷ. დრანდაშ ბოლო ეპისკოპოსი, გაბრიელი, აბაზეფიშ დო აბსარეფიშ მინოკათუაშ გეშა აძვილებურქ იჸუ იერუსალიმშა მიდურთუმუდუკონ.
1637 წანას, ოხიდა ედომუშამო გოხირეს დო გეგნოჭვეს თურქ მახვამილაფარეფქ. 1878 წანას, რუსეთ-ოსმალეთიშ ლჷმაშ ბორჯის ოხიდა კჷნ გეგნოჭვეს დო ფრესკეფქ მიჯალაგჷ. 1880 წანაშე, რუსული კოლონიური მართუალაშ პერიოდის, შხვა ოხიდეფწკჷმა ართო მიშჷ დრანდაშ „რუსიფიკაციათ“. დრანდას დიო ხოლო თიმწკჷმა ქეგიოდგეს რუსული ყალდაშ ხვარხვიშობური გოლათი.
1928 წანას, კომუნისტეფქ დრანდაშ ოხიდა გაუქვეს, ოხვამეშ ნოდგჷმიშ ნორთი, საჯარსულებაშ დჷნაწესებუო, ციხეთ გეგნაკეთეს, ნამუთ ასე ხოლო რე, ნორთის — გულრიფშიშ რაიონიშ რაიოკომი დო სკოლა-ინტერნატი იდვაუაფუდჷ. XX ოშწანურაშ 70-იან წანეფს, დრანდაშ ოხიდაშ რესტავრაციაქ იმანჯჷ. 2006 წანას, დრანდაშ ოხიდას ერუანული შანულობაშ კულტურაშ უყარუ ძეგლიშ სტატუსიქ მიაჩჷ.
2011 წანას, აფხაზეთიშ დე-ფაქტო თარობაქ 40-შახ ოხიდა, თინეფს შქას დრანდათ, თ.ჯ „აფხაზურ ოხვამეს“ უვადე რგებაფათ გინოჩჷ. ოხიდა ოკუპაციაშ უკული რუსულ ყალდაშა, ედომუშამო ჩეთ გეგნოღაფეს; ქენოდგეს ვითშახ ვარჩხილიშფერო ღაფილი კარ-ოსინთე, ნამუშ გეშა დორხვეს ოხვამეშ კიდალეფი; დამონტაჟეს ვიდეოთოლორუაშ სისტემა; ოხიდაშ ელმოლშე ედომუშამო გეჭოფეს დიხაშ ფა, თეშ, ნამჷ-და არქეოლოგიური რკუალა ვაჸოფენ. რეკონსტრუქციაქ ქეიკიბირჷ ოხიდაშ უნიკალური ონათალი ემბაზი, ნამუთ VII ოშწანურათ ითარიღებუდჷ.
ლიტერატურა
[რედაქტირაფა | წყუშ რედაქტირაფა]- ენციკლოპედია „საქორთუო“, ტ. 2, ხს. 492-493, ქთ., 2012 წანა.
რესურსეფი ინტერნეტის
[რედაქტირაფა | წყუშ რედაქტირაფა]- დრანდა უკვე რუსული ოხვამერი რე ამერიკაშ ხონარი
სქოლიო
[რედაქტირაფა | წყუშ რედაქტირაფა]- ↑ კანონი ოკუპირაფილი ტერიტორიეფიშ გეშა Archived 2011-01-01 ვებ-ხასჷლას Wayback Machine. .
