ვაცლავ ჰაველი

	ვაცლავ ჰაველი; Václav Havel
	; ჰაველი 1997 წანას
ჩეხეთიშ პრეზიდენტი
პოსტის გერინაშ ბორჯი
	2 ფურთუთა, 1993 – 2 ფურთუთა, 2003
პრემიერ-მინისტრი	ვაცლავ კლაუსი; იოზეფ ტოშოვსკი; მილოშ ზემანი; ვლადიმირ შპიდლა
წიმოხონი	პოსტიქ გიჭყჷ
მონძე	ვაცლავ კლაუსი
ჩეხოსლოვაკიაშ პრეზიდენტი
პოსტის გერინაშ ბორჯი
	29 ქირსეთუთა, 1989 – 20 კვირკვე, 1992
პრემიერ-მინისტრი	მარიან ჩალფა; იან სტრასკი
წიმოხონი	გუსტავ ჰუსაკი
მონძე	პოსტიქ გეუქვჷ
ნაღურა	18 ქირსეთუთა, 2011 (75 წანერი); ვჩლიცე, ჩეხეთი
ნთხორუ აბანი	ვინოჰრადიშ სასაფლა
მენოღალობა	ჩეხოსლოვაკია; ჩეხეთი
პოლიტიკური პარტია	ომენოღალე ფორუმი (1989-1991)
მუმა	ვაცლავ მარია ჰაველი
ნანა	ბოჟენა ვავრეჩკოვა
ალმასქუ	1. ოლგა შპლიხალოვა; 2. დაგმარ ვეშკრნოვა
სქუალეფი	ვაჸუნდჷ
გონათაფა	ჩეხეთიშ ტექნიკური უნივერსიტეტი
საქვარუა	პოლიტიკოსი, ჭარუ, პოეტი, დრამატურგი, დისიდენტი
ხეშმოჭარუა

ვაცლავ ჰაველი (ჩეხ. Václav Havel; დ. 5 გჷმათუთა, 1936 — ღ. 18 ქირსეთუთა, 2011) — ჩეხი პოლიტიკოსი, ჭარუ, პოეტი, დრამატურგი დო დისიდენტი. ჰაველი რდჷ ჩეხოსლოვაკიაშ ეკონია პრეზიდენტი 1989-1992 წანეფს დო ჩეხეთიშ მაართა პრეზიდენტი 1993-2003 წანეფს. მუჭოთ ჭარუ დო ჩეხური ლიტერატურაშ ართ-ართი შანულამი წჷმმარინაფალი, რე ავტორი შხვადოშხვა პიესეფიშ, ესეეფიშ დო მემუარეფიშ. ვაცლავ ჰაველი მერჩქინელი რე მაეჩა ოშწანურაშ ართ-ართი უშანულამაში ინტელექტუალო.

დუდშე, ჰაველქ პოპულარობა მიპალუ მუჭოთ დრამატურგიქ. მუში პიესეფს თინა ირინუანდჷ აბსურდისტული სტილს დო კონწარო აკრიტიკენდჷ კომუნისტური სისტემას. ჰაველქ პოლიტიკურო აქტიურო გინირთჷ პრაღაშ აფუნიშ უკულ, ნამუსჷთ თინა მონაწილენდჷ. თიში ინიციატივათ დირსხუ დისიდენტური ჸარაფიქ ქარტია 77-იქ. ჰაველიშ პოლიტიკური აქტივიზმი ჩეხოსლოვაკიაშ პოლიტიკური პოლიციას უთოჸუჯეთ ვადოსკილადჷ. ჰაველი ბრელშა რდჷ ჭოფილი.

1989 წანას ჰაველქ დარსხუ პოლიტიკური ჸარაფი ომენოღალე ფორუმი, ნამუქჷთ არსულჷ კაბეტი როლი ხავერდოვანი რევოლუციაშ მიმალობას. ჸათე რევოლუციაქ, 1989 წანაშ გერგობათუთას, ქუდახუ კომუნისტური მართუალა ჩეხოსლოვაკიას. კომუნიზმიშ დონთხაფაშ უკულ მალას, ჰაველქ ჩეხოსლოვაკიაშ მაართა დემოკრატიულო გიშაგორილი პრეზიდენტო გინირთჷ. სლოვაკეთიშ ზოხორინელობაშ უკულ, ჰაველქ გიშაგორილქ იჸუ ჩეხეთიშ პრეზიდენტო. სლოვაკეთიშ ზოხორინელობას ჰაველი აქტიურო ოპონირენდჷ, მარა უშედეგეთ. სლოვაკეთიქ დუდშულობა 1993 წანას გეგმაცხადჷ.

ჰაველიშ პრეზიდენტობაშ ბორჯის, ჩეხეთიქ გინირთჷ ნატოშ მაკათური ქიანათ დო ევროპაშ რსხუწკჷმა ქიდიჭყჷ დიალოგი მაკათურობაშ გეშა. ევროპაშ რსხუშ ოფიციალური მაკათურო ჩეხეთიქ 2004 წანას გინირთჷ. პრეზიდენტიშ პოსტიშე ულაშ უკულ, ჰაველი აქტიურო მონაწილენდჷ ომენოღალე პროცესეფს. თიში ინიციატივათ ხე მაჭარეს პრაღაშ დეკლარაციას 2008 წანას. 1996 წანას ჰაველქ, ნობელიშ პრემიაშ ლაურეატი ელი ვიზელიწკჷმა ართო დარსხუ ფორუმი 2000.

მუში პოლიტიკური დო ლიტერატურული კარიერაშ გოძვენას, ჰაველქ მიპალუ შხვადოშხვა პრესტიჟული ჯილდო დო პრემია: დუდიშალაშ ოპრეზიდენტე მენდალი, განდიშ თინჩალაშ პრემია, დუდიშალაშ მენდალი, კანადაშ ორდენი დო შხვეფი. 2012 წანაშე თიში ჯოხონობაშ რე პრაღაშ საირქიანო აეროპორტი.

2013 წანას, ევროპაშ სხუნუშ საპარლამენტო ასამბლეაქ, ვაცლავ ჰაველიშ ბიბლიოთეკაქ დო ქარტია 77-იშ ფონდიქ დარსხუეს ვაცლავ ჰაველიშ ჯოხონობაშ საირქიანო პრემია, ნამუთ ირწანურო გინმაჩამუ ჸეთი პიჯეფს, ვარდა ორგანიზაციეფს ნამუეფით ლჷმენა ადამიერიშ ნებეფიშო.

რესურსეფი ინტერნეტის

ვაცლავ ჰაველიშ ბიბლიოთეკა პრაღას
ბიოგრაფია ენციკლოპედია ბრიტანიკას
მეჯინა C-SPAN-ს
ვაცლავ ჰაველი — კინოფილმეფიშ ინტერნეტ მუნაჩემეფიშ ბაზას (ინგლისური)
ვაცლავ ჰაველი - სიახალეეფი და კომენტარეფი გჷშაშქუმალაშ The Guardian საიტის
ნეკროლოგი ნიუ-იორკი ტაიმსის
ჰაველიშ ეკონია ინტერვიუ