ნოღა
| შილა |
გერბი |
 |
 |
|
ვროცლავი (პოლ. Wrocławⓘ [ˈvrɔt͡swaf] (ვროცუავ), ჩეხ. Vratislav, გერ. ბრესლაუ (გერმ. Breslauⓘ, სილ. Wrocłow, სილ.-გერ. Brassel, ლათ. Vratislavia, Wratislavia) — სილეზიაშ ნანანოღა, პოლონეთიშ ართ-ართი უშხუაში (მახორობაშ მეჯინათ ქიანას მასუმა რე ვარშავაშ დო კრაკოვიშ უკული) დო არძაშე ჯვეში ნოღა რე, ნამუთ წყარმალუ ოდრაშ შქა მალობაშ ჟირხოლო წყარპიჯის იდვალუაფჷ, სილეზიაშ რზენს, ცენტრალური ევროპას, სუდეტიშ გვალეფიშ ობჟათეშე 40 კილომეტიშ მეძენას. ვროცლავიშ აგლომერაციაშ მახორობა დოხოლაფირო 1.25 მილიონი ადამიერს აკმადგინანს.
ვროცლავი რე სილეზიაშ დო თუდოლენი სილეზია ისტორიული ნანანოღა. ნოღაშ ისტორია 1000 წანაში უმოსი რე; შხვადოშხვა ბორჯის მიშმეშჷ პოლონეთიშ ომაფეშ, ბოჰემიაშ ომაფეშ, უნგრეთიშ ომაფეშ, ავსტრიაშ ჰაბსბურგეფიშ მონარქიაშ, პრუსიაშ ომაფეშ დო გერმანიაშ (ბრესლაუშ ჯოხოთ) ტერიტორიულ აკოდგინალუაშა, 1945 წანას, კჷნე პოლონეთიშ ნორთო გჷნირთუ ბრესლაუშ კონწარი ქართაშ, ნოღაშ ნორთობურო აკორაბადუაშ დო ნაცისტეფიშ კაპიტულაციაშ უკული.
ვროცლავი საუნივერსიტეტო ნოღა რე 130 000-შე უმოსი სტუდენტით, ნამუშით ართ-ართიო არძაშე ახალობაშე მორინელი ნოღა რე ქიანას. XX ოშწანურაშ დაჭყაფუშე ვროცლავიშ უნივერსიტეტიქ (კინოხ გერმანული ბრესლაუშ უნივერისტეტი), გინაზათ ჩხორო ნობელიშ ლაურეატი დო ჯოხო აფჷ გოლაფირო დოგურაფაშ მაღალი დონეთ. ვროცლავს იდვალუაფუ ანდა ისტორიული ოქინაფუ, თინეფს შქას: ბაზარიშ თარი მოედანი, ტუმსკიშ კოკი, ჸოროფაშ ხინჯი, ვროცლავიშ ოპერა, ერუანული მუზეუმი დო იუნესკოშ მოსოფელიშ მონძალაშა მიშმალი ვროცლავიშ ოშწანურამი მაქდორი. თაშნეშე ვროცლავიშ ჯუკუეფი რენა თარი ტურისტული ოქინაფუეფი დო ნოღაშ სიმბოლო. ნოღას იდვალუაფუ ზოოპარკი, პოლონეთიშ უჯვეშაში ზოოლოგიური ბაღი.
GaWC-იშით ვროცლავი კლასიფიცირებული რე დაბაღებული გლობალური ნოღათ.[1] შხირას მიშმურს მოსოფელიშ ართ-ართი არძაშე საუჯგუშო ოხორუე აბანეფშა.[2][3][4] ვროცლავი რე ოკუჩხბურთე კლუბი „შლონსკ ვროცლავიშ“ ორენი დო 2012 წანაშ ევროპაშ ოკუჩხბურთე ჩემპიონატის მენძელენდჷ. 2016 წანას, ნოღა რდჷ ევროპაშ კულტურული დო მოსოფელშ კჷრიბიშ ნანანოღა,[5] თაშნეშე მენძელენდჷ თეატრალური ოლიმპიადას დო ევროპაშ კინომატოგრაფიულ დოჯილდაფას. 2017 წანას, ნოღა მენძელენდჷ მოსოფელიშ ლაჸაფეფს. 2019 წანას, იუნესკოქ დასახელჷ ლიტერატურაშ ნოღათ.
