მარგარეტ ტეტჩერი

მარგარეტ ტეტჩერი Margaret Thatcher
გოართოიანაფილი ომაფეშ პრემიერ-მინისტრი
პოსტის გერინაშ ბორჯი
4 მესი, 1979 – 28 გერგობათუთა, 1990
მონარქი	ელისაბედ II
წიმოხონი	ჯეიმზ კალაჰანი
მონძე	ჯონ მეიჯორი
ოპოზიციაშ ლიდერი
პოსტის გერინაშ ბორჯი
11 ფურთუთა, 1975 – 4 მესი, 1979
მონარქი	ელისაბედ II
პრემიერ-მინისტრი	ჰაროლდ ვილსონი ჯეიმზ კალაჰანი
წიმოხონი	ედვარდ ჰიტი
მონძე	ჯეიმზ კალაჰანი
კონსერვატიული პარტიაშ ლიდერი
პოსტის გერინაშ ბორჯი
11 ფურთუთა, 1975 – 28 გერგობათუთა, 1990
წიმოხონი	ედვარდ ჰიტი
მონძე	ჯონ მეიჯორი
გონათაფაშ დო მენცარობაშ სახენწჷფო მელამოსე
პოსტის გერინაშ ბორჯი
20 მანგი, 1970 – 4 მელახი, 1974
პრემიერ-მინისტრი	ედვარდ ჰიტი
წიმოხონი	ედვარდ შორტი
მონძე	რეჯინალდ პრენტისი
დუნაბადი	13 გჷმათუთა, 1925 გრანტემი, ინგლისი
ნაღურა	8 პირელი, 2013 (87 წანერი) ლონდონი, ინგლისი
ნთხორუ აბანი	ჩელსიშ ოურდუმე ჰოსპიტალი
მენოღალობა	გოართოიანაფილი ომაფე
პოლიტიკური პარტია	კონსერვატიული პარტია
მუმა	ალფრედ რობერტსი
ნანა	ბეატრის სტეფენსონი
ალმასქუ	დენის ტეტჩერი
სქუალეფი	მარკ ტეტჩერი კეროლ ტეტჩერი
გონათაფა	სომერვილ-კოლეჯი (ოქსფორდი)
საქვარუა	ბარისტერი, ქიმიკოსი, პოლიტიკოსი
ჯილდოეფი	ომაფე ჯარალუაშ მაკათური (1983) კლერ ბუტ ლიუსიშ პრემია (2002)

მარგარეტ ჰილდა ტეტჩერი, ბარონესა ტეტჩერი (ინგლ. Margaret Hilda Thatcher, Baroness Thatcher; დაბადებაშ გვარი რობერტსი, დ. 13 გჷმათუთა, 1925 — ღ. 8 პირელი, 2013) — ბრიტანალი სახენწჷფო მოღალე დო პოლიტიკოსი გოართოიანაფილი ომაფეშ პრემიერ-მინისტრი 1979-1990 წანეფს დო კონსერვატიული პარტიაშ ლიდერი 1975-1990 წანეფს. მაართა ოსური, ნამუსჷთ გოართოიანაფილი ომაფეშ პრემიერ-მინისტრიშ პოსტი უკებუდჷ.

ბიოგრაფია

გურაფულენდჷ ქიმიას, ოქსფორდიშ უნივერსიტეტიშ სომერვილ-კოლეჯის, სოდეთ თიში ომენცარე ხემანჯღვერი რდჷ გიშარჩქინელი მენცარი დოროთი ჰოჯკინი. გურაფაშ თებაშ უკულ მუშენდჷ ქიმიკოსო დო უკულ ბარისტერო. პოლიტიკათ ორდოიანი წანეფიშე დეინტერესჷ. 1959 წანას გიშაგორილქ იჸუ პარლამენტიშ მაკათურო. 1970 წანას, პრემიერ-მინისტრი ედვარდ ჰიტიქ ტეტჩერი ქუდარინუ გონათაფაშ დო მენცარობაშ სახენწჷფო მელამოსეთ. 1975 წანას, კონსერვატიული პარტიაშ ლიდერიშ გიშაგორუეფს ტეტჩერქ ჰიტი დამარცხჷ დო ოპოზიციაშ ლიდერო გინირთჷ.

მარგარეტ ტეტჩერი დო ააშ-იშ პრეზიდენტი რონალდ რეიგანი, 1988 წანაშ 16 გერგობათუთას

1979 წანაშ საპარლამენტო გიშაგორუეფს გომორძგუაშ უკულ, ტეტჩერქ გინირთჷ გოართოიანაფილი ომაფეშ პრემიერ-მინისტრო. ტეტჩერქ მაღალი ინფლაციას დო ეკონომიკური რეცესიას ლჷმა გეგმუცხადჷ დო აკიმუშუ შანულამი რეფორმეფი. ტეტჩერიშ პოლიტიკა კაბეტი შანულობას არძენდჷ სახენწჷფო კომპანიეფიშ პრივატიზაციას. ტეტჩერქ დადაღარჷ პროფესიული რსხუეფიშ გოლინა. პრემიერ-მინისტრობაშ დუდშეიანი პერიოდის ტეტჩერქ პოპულარობა მიპალუ, მარა უკულ ქიმიძინჷ უმუშელობაქ დო რეცესიაქ კინ ირჩქინჷ დუდი. ჸათე პრობლემეფიშ შედეგო, ტეტჩერქ პოპულარობა ჭიეჭიეთ მიოდინუ. მარა 1982 წანაშ ფოლკლენდიშ ლჷმას ბრიტანეთიშ გომორძგუაშ უკულ, ტეტჩერქ პოლიტიკურო კინ გენძალიერჷ. 1983 წანაშ საპარლამენტო გიშაგორუეფს კინ კონსერვატიული პარტიაქ გემორძგუ. 1984 წანას, ირლანდიური ოურდუმე ორგანიზაციაქ IRA-ქ ტეტჩერს დო თარობაშ შხვა მაკათურეფს ტერორისტული აქტი მუნწყუ. ტერორისტეფქ ბომბა დამონტაჟეს ბრაიტონიშ სასუმაროს, სოდეთ მიშჷ კონსერვატორეფიშ კონფერენცია. ბომბა დისტანციურო აფეთქეს მარა ტეტჩერქ გინასქიდჷ. 1986 წანას, ტეტჩერიშ მანჯღვერალათ იტარინჷ ფინანსური ბაზარიშ დერეგულაციაქ, ნამუქჷთ გიმიჭანუ ეკონომიკური ბუმი ბრიტანეთის. 1987 წანას, ტეტჩერქ მასუმაშა გემორძგუ საპარლამენტო გიშაგორუეფს. მარა უკულ, ტეტჩერიშ ოგაფურეფიშ სისტემას (Poll tax) დო ევროსკეპტიკური იდეეფს პოპულარობაქ ვეიაჭოფუ. შედეგო, 1990 წანას ტეტჩერქ პრემიერ-მინისტრიშ დო პარტიაშ ლიდერიშ პოსტიშე გეგნოდირთჷ.

ტეტჩერიშ ეკონომიკური პოლიტიკა შინელი რე ტეტჩერიზმიშ ჯოხოდვალათ. მუში პოლიტიკური კარიერაშ გოძვენას, უკომპრომისო პოლიტიკაშ დო ლიდერული სტილიშ გეშა, მარგარეტ ტეტჩერი ფშხირას მიშინუაფუდჷ მუჭოთ "რკინაშ ლედი".

გიშნაგორა პუბლიკაციეფი

მემუარეფი

• დაუნინგ-სტრიტიშ წანეფი, 1993.
• შარა ხეშულობაშა, 1995.

შხვა ნახანდეფი

• მათირუ მოსოფელიშ სტრატეგიეფი, 2003.

ქოძირით თაშნეშე

• ტეტჩერიზმი

ლიტერატურა

• ენციკლოპედია ბრიტანიკა