ელისაბედ II

	დიაფალი ელისაბედ II
	ინგლ. Queen Elizabeth II;
	ელისაბედ II, 1959 წანა
	გოართოიანაფილი ომაფეშ დიაფალი
დუდალ. დაჭყაფუ:	6 ფურთუთა, 1952
დუდალ. დათებუ:	8 ეკენია, 2022
კორონაცია:	2 მანგი 1953
წიმოხონი:	ჯორჯ VI
მონძე:	ჩარლზ III
დაბ. თარიღი:	21 პირელი, 1926
დაბ. აბანი:	ლონდონი, გოართოიანაფილი ომაფე
ღურ. თარიღი:	8 ეკენია 2022 (96 წანერი)
ღურ. აბანი:	ბალმორალიშ დოხორე, აბერდინშირი, გოართოიანაფილი ომაფე
ალმასქუ:	ჰერცოგი ფილიპი
სქუალეფი:	4
ედომუშამი ჯოხო:	ელისაბედ ალექსანდრა მერი
დინასტია:	უიონძორი
მუმა:	ჯორჯ VI
ნანა:	ელისაბედ ბოუზ-ლაიონი
რელიგია:	ანგლიკანი
ხეშმოჭარუა:

თიში ომაფე უდიდაშულობა დიაფალი ელისაბედ II უინძორი (ინგლ. Queen Elisabeth II, Elizabeth Alexandra Mary Windsor; დ. 21 პირელი, 1926, ლონდონი - ღ. 8 სექტემბერი, 2022) — რდჷ კაბეტი ბრიტანეთიშ დო ოორუე ირლანდიაშ გოართოიანაფილი ომაფეშ მამართალი დიაფალი დო სახენწჷფოშ მადუდე, ხვისტაშა ეშართჷ 1952 წანაშ 6 ფურთუთას, გჷრგინი გიდგჷ 1953 წანაშ 2 მანგის დო მართუნდჷ ღურა დღაშა. თაშნეშე რდჷ წორომაჸალობაშ 14 სახენწჷფოშ მადუდე (ავსტრალია, ანტიგუა დო ბარბუდა, ბაჰამეფი, ბელიზი, გრენადა, კანადა, ახალი ზელანდია, პაპუა-ახალი გვინეა, სენტ-ვინსენტი დო გრენადინეფი, სენტ-კიტსი დო ნევისი, სენტ-ლუსია, სოლომონიშ კოკეფი, ტუვალუ, იამაიკა), ანგლიკანური ოხვამეშ მადუდე, აკოანჯარაფილი ნძალეფიშ თარსარდალი დო კოკი მენიშ ლორდი. 2021 წანაშ 30 გერგობათუთაშახ რდჷ ბარბადოსიშ სახენწჷფოშ მადუდე.

ელისაბედიქ დებადჷ 1926 წანაშ 21 პირელს, იორკიშ ჰერცოგ ჯორჯიშ დო თიში ჩილიშ, ელისაბედიშ ფანიას. გონათუა მიღჷ დოხორეს. მუმამუშიქ ხვისტაშა ეშართჷ 1937 წანას, თიში მონძე ზუსტას ელისაბედი რდჷ. 1947 წანას ელისაბედიქ ჩილო ქაჸუნჷ ჰერცოგ ფილიპის დო თიშე ჸუნდუ ოთხი სქუა: ჩარლზი, ანა, ენდრიუ დო ედუარდი.

ელისაბედ II — ხანით არძოშე უნჩაში ბრიტანალი (ინგლისარი) მონარქი რდჷ ისტორიას. ელისაბედი II, ბრიტანეთიშ ხვისტაშ რეკორდსმენო დოსქიდჷ მაფობაშ ბორჯიშ განწეობათ^[1]^[2], შხვეფს შქას, მოსოფელს მაჟირა აბანი უკებუფჷ, არძო თიმბორჯიან სახენწჷფოშ მადუდეეფიშ შქას (ტაილანდიშ მაფა პხუმიპნ ადულიადეტიშ უკული). მოსოფელს არძოშე ხანერი ოსური რდჷ — სახენწჷფოეფიშ მოქიმინჯე მადუდეეფს შქას, ევროპას — არძოშე ხანერი სახენწჷფოშ მოქიმინჯე მადუდე რდჷ. ელისაბედ II მაფენდჷ 70 წანაშ დო 214 დღაშ განწეხანს.

ორდოიანი წანეფი

ელისაბედიქ 1926 წანას დებადჷ. თიქ ინათჷ ბაკინგემიშ დოხორეს დო იორკიშ არქიეპისკოპოსიქ თის დიდაშ ჯოხო გიოდჷ. დუდმაართათ, ელისაბედის უჭირდჷ მუში ჯოხოშ გჷმორაგადაფა დო მუშ დუდშა ლილიბეთი უჯოხოდჷ, ზუსტას თეშენ გიოდჷ მუმამუშიქ თე გეძინელჯოხოთ.^[3] ელისაბედიქ გონათუა, დოხორეს მუშ უკულაშ და მარგარეტწკჷმა ართო მიღჷ.

ელისაბედი დუდმაართათ ვემიაზრებუდჷ ხვისტაშ მონძეთ. თიში ჯიმადი, უელსიშ პრინცი ედუარდი ახალნორდი რდჷ დო გვალო თის ორხველუდჷ ხვისტა, მარა ჯორჯ V-იშ ღურაშ უკულ ედუარდიქ ვარია თქუ ხვისტაშე დო თინა ელისაბედიშ მუმა ჯორჯ VI-ქ დეკინჷ, ელისაბედიქ ხვისტაშ მაართა მონძეთ გჷნირთჷ.

მაჟირა მოსოფელიშ ლჷმაშ პერიოდის ელისაბედი შოტლანდიას რდჷ, მარა ლონდონშა დირთჷ. მუჟამსჷთ მენტიება ლონდონშა მიღესჷნ, მაფაქ დო თიშ ფანიაქ ვარია გაცხადჷ, ნამჷ-და კანადაშა მიდურთუმდესკონ.

1940 წანას, 13 წანაშ ხანს, რადიოშ მეშქაშობათ ელისაბედიქ მაართათ უგამჷ კათას ოფიციალურო. თიქ გაცხადჷ, ნამჷ-და არძა ირფელს აკეთენდჷ, ნამჷ-და ლჷმა ჯგირო გათებედკონ.

ელისაბედი მართალოთ ირფელს აკეთენდჷ. თინა ოცადჷდჷ კათაშ გამანგარებას, თინა ვარიას ვეჩიებუდჷ მუშათ უმუშებუდუკონ დო მექანიკოსო ხოლო მუშენდჷ. თინა, ნამჷ-და პრინცესა ხოლო ოკათუდჷ საქვარიშ მოგვარებასჷნ, კათას უმოს სტიმულს არძენდჷ. 1945 წანას, ლჷმაშ თებაშ უკული, ელისაბედი ლონდონარეფწკჷმა ართო ეიშინუანდჷ ფაშიზმშა გომორჯგუას.

ელისაბედი დიდი ხანიშ გოძვენას იჩინენდჷ მუშ მუმალი ქომონჯის. თინეფიშ ჸოროფაქ თიწკჷმა დიჭყჷ, მუჟამსჷთ თინეფქ ართიანს მაჟირათ აუხვადესჷნ. თინწკჷმა ელისაბედი 13 წანერი რდჷ. ფილიპექ დოა ელისაბედიქ ართიანწკჷმა მეჭარ-მოჭარუა ქჷდიჭყეს. 1947 წანაშ 20 გერგობათუთას ფილიპექ დო ელისაბედიქ დიქორწინეს.

1952 წანაშ 6 ფურთუთას, მუჟამსჷთ ფილიპე დო ელისაბედი ვიზიტით კენიას რდესჷნ, ჯორჯ VI-ქ დოღურჷ. ელისაბედიქ დირთჷ ლონდონშა, მარა უკვე დიაფალიშ დო ვართ პრინცესაშ სტატუსით.

გერბი

შხვადოშხვა ბორჯიშ დო შხვადოშხვა ქიანაშ გერბეფი
პრინცესა ელისაბედიშ გერბი (1944—1947)
პრინცესა ელისაბედიშ გერბი, ედინბურგიშ ჰერცოგინია (1947—1952)
ომაფე გერბი გოართოიანაფილი ომაფეს (შოტლანდიაშ მოხ)
ომაფე გერბი შოტლანდიას
ომაფე გერბი კანადას

რესურსეფი ინტერნეტის

ოფიციალური ბრიტანული ვებ-ხასჷლა
ოფიციალური კანადური ვებ-ხასჷლა Archived 2014-09-01 ვებ-ხასჷლას Wayback Machine.
Elizabeth II: The Princess Years Archived 2011-08-16 ვებ-ხასჷლას Wayback Machine.

სქოლიო

↑ К вечеру среды Елизавета II установит новый рекорд пребывания на троне.
↑ cite web|url=http://lenta.ru/news/2015/09/09/elisabeth/%7Ctitle=Елизавета II достигла рекорда продолжительности правления|date=9 сентября 2015|publisher=Lenta.ru|accessdate=10-09-2015
↑ ელისაბედ II "ეპიზოდი"

წიმოხონი: ჯორჯ VI	გოართოიანაფილი ომაფეშ მაფა 1952-2022	გეჸვენჯი: ჩარლზ III

[1] К вечеру среды Елизавета II установит новый рекорд пребывания на троне.

[2] te web|url=http://lenta.ru/news/2015/09/09/elisabeth/%7Ctitle=Елизавета II достигла рекорда продолжительности правления|date=9 сентября 2015|publisher=Lenta.ru|accessdate=10-09-2015

[3] ელისაბედ II "ეპიზოდი"

[1]

[2]

[3]