პოლონური ვიკიპედია

პოლონური ვიკიპედია ; Wikipedia polskojęzyczna
მიოწურაფუ:	pl.wikipedia.org
კომერციული:	ვარი
საიტიშ ტიპი:	რშვილური ენციკლოპედია
რეგისტრაცია:	ვა რე უციო
ნინა:	პოლონური
მინჯე:	ფონდი ვიკიმედია
მუშობაშ დოჭყაფა:	2001 წანაშ 26 ეკენია
სტატიეფიშ მუდანობა:	1,641,401
ხასჷლეფიშ მუდანობა:	3,817,751
რედაქტირაფეფიშ მუდანობა:	75,470,691
რეგისტრირაფილი მახვარებუ:	1,347,855
აქტიური მახვარებუ:	4,350
ადმინისტრატორი:	98
სიტომბა:	34.8

პოლონური ვიკიპედია (პოლ. Wikipedia polskojęzyczna) — ვიკიპედიაშ ნორთი პოლონურ ნინაშა. გიშართჷ 2001 წანაშ 26 ეკენიას. 2012 წანაშ ღურთუთაშო, ოკათუდჷ 872 000 სტატია დო რე მაამშვა უდიდაშ ვიკიპედია ინგლისურიშ, გერმანულიშ, ფრანგულიშ, ჰოლანდიურიშ დო იტალიურიშ უკული.^[1] სტატიეფიშ მუდანობათ თინა უდიდაში რე სლავურნინამი ვიკიპედიეფს შქას, ხოლო უდიდაში რე თი ნინეფს შქას, ნამუთ ოფიციალური ხვალე ართ ქიანას რენი.

პოლონური ვიკიპედიაქ დირსხჷ მუჭოთ დუდიშულ პროექტიქ დომენით wiki.rozeta.com.pl Archived 2006-02-13 ვებ-ხასჷლას Wayback Machine. , მარა უკული, ინგლისური ვიკიპედიაშ დჷმარსხუაფალეფიშ მერზიაფათ, 2002 წანაშ 12 ღურთუთას თიქ მიარცხჷ საირქიანო პროექტის მუჭოთ http://pl.wikipedia.com, ართი წანაშ უკული, 22 გერგობათუთას მუჭოთ http://pl.wikipedia.org. ათეჟამო, პოლონურ ვიკიპედიას უღუ მუში დომენით, wikipedia.pl, ნამუთ გინოწურაფილი რე pl.wikipedia.org-შა.

შხვა სლავურ ნორთეფწკჷმა ალაზჷმაფათ, პოლონურ ვიკიპედიას სიტომბათ დაბალი მუნაჩამეფი უღუ (ათეჟამო 14).^[1] 2011 წანაშ გერგობათუთაშო, პოლონურ ვიკიპედიას ეჩი უდიდაში ვიკიპედიაშ შქას სიტომბაშ არძაშე დაბალი პარამეტრეფი უღუდჷ, ხოლო მაამშვა არძაშე დაბალი 100 000-შე უმოსი სტატიაშ მაღვენჯი ვიკიპედიეფს შქას (აკაბუცხათ უმოსი ბასკურ ვიკიპედიაშე). სიტომბაშ პარამეტრი ოცად გოზიმას თი თემეფიშ სიტომბა, ნამეფით ვიკიპედიას რე გოსინთელი. სიტომბაშ უმაღალაში გემაწურაფალი ვიკიპედიაშ ათე ვარდა თი ნორთის მიაჩამუ ართ სტატიას ბრელ რედაქტირაფაშო დო ხოლო უმოს რედაქტირაფაშო სტატიეფიშ ჯოხოეფიშ განს გალე, თიჯგუა ხასჷლეფს, მუჭომეფით რე გოჯინაშ ვარდა მახვარებუეფიშ ხასჷლეფი.