რუდოლფ ვირხოვი

რუდოლფ ვირხოვი
	რუდოლფ ვირხოვი
	გერმ. Rudolf Virchow
დაბადებაშ თარიღი:	13 გჷმათუთა, 1821
დაბადებაშ აბანი:	სვიდვინი, პომერანია, პრუსიაშ ომაფე, გერმანიაშ კონფედერაცია
ღურაშ თარიღი:	ეკენია 5, 1902 (80 წანერი)
ღურაშ აბანი:	ბერლინი, პრუსიაშ ომაფე, გერმანიაშ იმპერია
მენოღალობა:	პრუსიაშ ომაფე
ომენცარე სფერო:	მედიცინა, ანთროპოლოგია
სამუშაშ აბანი :	შარიტე; ვიურცბურგიშ უნივერსიტეტი
ალმა-მატერი:	ბერლინიშ უნივერსიტეტი; ვიურცბურგიშ უნივერსიტეტი
ომენცარე ხემანჯღვერი:	იოჰან პეტერ მიულერი; რობერტ ფრორიპი
ჯოხოშინელი მოგურაფეეფი:	ფრიდრიხ დანიელ ფონ რეკლინგჰაუზენი; ერნსტ ჰეკელი; ედვინ კლებსი; ფრანც ბოასი; ადოლფ კუსმაული; უილიამ ოსლერი; უილიამ ჰენრი უელჩი
ჯილდოეფი დო პრემიეფი:	კოპლიშ მენდალი (1892)
ხეშმოჭარუა:

რუდოლფ ლუდვიგ კარლ ვირხოვი (გერმ. Rudolf Ludwig Carl Virchow; დ. 13 გჷმათუთა, 1821, სვიდვინი, პომერანია, პრუსიაშ ომაფე, გერმანიაშ კონფედერაცია — ღ. 5 ეკენია, 1902, ბერლინი, პრუსიაშ ომაფე, გერმანიაშ იმპერია) — გერმანალი ექიმი, ბიოლოგი, პათოლოგი, ციტოლოგი, ანთროპოლოგი, ჭარუ დო პოლიტიკოსი, შინელი რე მუჭოთ პათოლოგიაშ მუმა დო სოციალური მედიცინაშ დუმარსხუაფალი.

ბიოგრაფია დო მენცარული რკვიებეფი

რუდოლფ ვირხოვი გურაფულენდჷ მედიცინას ბერლინიშ უნივერსიტეტის, სოდეთ თხილუ ოდოქტორე დისერტაცია 1843 წანას იოჰან პეტერ მიულერიშ ხემანჯღვერობათ. გურაფაშ თებაშ უკულ მუშენდჷ შარიტეშ ჰოსპიტალს. 1847-1848 წანეფს ვირხოვიქ გიმირკვიუ ტიფიშ პანდემია ჟინ სილეზიას. მალას, 1848 წანას, გერმანიაშ რევოლუციას ქაკათჷ. ჸათეშ გეშათ ვირხოვი შარიტეშ ჰოსპიტალშე გუტეს. (ხუთ წანაშ უკულ შარიტეშ ჰოსპიტალშა კინ დართინეს). 1848 წანას ვირხოვიქ ბერლინი ქიდიტუ დო გეგნორთჷ ვიურცბურგიშ უნივერსიტეტიშა, სოდეთ რდჷ პათოლოგიური ანატომიაშ პროფესორი. 1856 წანას ვირხოვიქ კინ ბერლინშა დირთჷ დო მუშობა ქიდიჭყჷ ბერლინიშ უნივერსიტეტის დო შარიტეშ პათოლოგიაშ ინსტიტუტის. რდჷ პათოლოგიაშ ინსტიტუტიშ დირექტორი. ჸათე პოსტი უკებუდჷ 20 წანას. ვირხოვი რდჷ მაართა მენცარი ნამუქჷთ გიმირკვიუ შხვადოშხვა ლახარეფი: ლეიკემია, ქორდომა, ემბოლია, თრომბოზი. ვირხოვიქ მიშეღჷ ბიოლოგიური ტერმინეფი: ქრომატინი, ნეიროგლია, პარენქიმა, ამილოიდოზი, სპინა ბიფიდა დო შხვეფი. ვირხოვიქ დარსხუ აუტოპსიაშ მაართა სისტემური მეთოდი. ვირხოვი რდჷ თოლური თეორიაშ დუმარსხუაფალი. 1892 წანას ლონდონიშ ომაფე ჯარალუაქ რუდოლფ ვირხოვის გინოჩჷ კოპლიშ მენდალი. ვირხოვი რე 2000-შე უმოსი მენცარული სტატიაშ დო პუბლიკაციაშ ავტორი. ვირხოვი რდჷ ჩარლზ დარვინიშ ევოლუციაშ თეორიაშ ოპონენტი. რუდოლფ ვირხოვი ოკათუდჷ პოლიტიკას ხოლო დო ართ პერიოდის რდჷ პრუსიაშ პარლამენტიშ მაკათური.